Ke Aloha Aina, Volume I, Number 3, 8 Iune 1895 — KA MOOLELO O W. Q. GRESHAM. [ARTICLE]

KA MOOLELO O W. Q. GRESHAM.

O Lunakanawai Walter Q. Gresham, oia no ke Kakauolelo Nui o na Mokuaina o Amerika Huipuia, maloko o ka Aha Kuhina o Peresidena Cleveland. Ua hanau ia oia ma ka la 17 o Maraki 1834; ma kekahi wahi mahinaai, ma Corydon, ma ka Mokuaina o Inidiana ma Amerika Huiia; a ma ke kulana o kona helehelena, me he la, he kanaka opiopio loa no oia. He elima lakou mau keiki o ka ohana hookahi, ua make kona makuakane i ka wa he elua wale no ona mau makahiki nolaila, ua lilo kona mau makahiki opio, i wa hooikaika loa i ka hana i loaa kona ola. He Makai Nui kona makuakane, no ka Mokuaina ana i noho ai, a ua pepehiia oia a make, no kona hoao ana, e hopu i kekahi poe hoohaunaele. Ua hana oia ma ka mahinaai a piha kona 18 makahiki, a Ioaa no hoi iaia ka hoonaauao ia ana ma ke kula apana iloko o na wa hooilo, ua ao ia oia i na hana oolea mamua o kona puka akea ana ae imua o ke ao holookoa e imi i pono nona. Ma-

hope o kona waiho ana i ka hana ma ka mahinaai, ua hoolimalima ia oia e noho hope Kakauolelo no ko lakou apana, no kahi uku, he $8.00 no ka mahina me ka ai pu; a o kahi koena iho, ua malama oia no ka uku ana aku i na lilo no kona noho ana ma ke Kula Nui no ka makahiki hookahi. I ka pau ana o kela manawa, pau iho la kahi dala, hoi hou no oia e noho hope Kakauolelo no ka Mokuaina o Corydon, eia nae, ua pii iki ae hoi kahi uku he $1.00 no ka la, me ka hooikaika nui ana i ka huli ma na kanawai, i na wahi wa kaawale ae. Oiai kona wa e huli kanawai ana, a e hoomaamaa ana hoi i kona makaukau, ua puka aku la oia imua o ke akea naauao o na poe ao kanawai, a he loio kaulana, iloko o na makahiki opio wale no he 23, e heihei ana he moho Ahaolelo iloko o ka Mokuaina o Indiana i ka 1856 ma ka aoao Repubalika, e hooikaika ana hoi mamuli o Fremont, he kanaka hoole kauwa kuapaa. O kona komo hookahi wale ana no iloko o ka Ahaolelo Mokuaina o Inidiana, oia no ka 1860. Ma ia Ahaolelo, ua hoomakaukau oia, a ua hooholo i ke kanawai no na Inikini. Ua komo oia malalo o na kauoha a ke aupuni Amerika i ka wa i hoea ae ai ke kaua huliamahi ma ke kulana he Kapena no kekahi puali pualu. Ua pii mau kona holomua a hiki i kona lilo ana he Brigadia Generala. Ua komo pu oia me Sherman ma Kenekute, a me Grant hoi ma Shiloh, Corinth, a me Vicksburg, a ano kupilikii oia i ke kaua ana ma Muliwai Laau Pea iloko o ka 1864. Ma ka 1865, ua hoomau hou oia i ke ao kanawai ana me Kenerala John M. Buttler ma New Albany. Ma ka 1869, ua noi ia oia e holo lunahoomalu no ka Hale o na Lunamakaainana e kue ia Kerr, aka, oiai he ikaika loa ka poe Demokarata ma ia apana, ua lilo aku la ka lanakila ia Kerr. Ua waiho hou ia mai kona inoa he moho no ka Ahaolelo Lahui iloko o ka 1868, a haule hou no oia i ka poe Demokarata. Ma ka 1869, ua hookohu aku o Grant iaia i Lunakanawai Apana. Ua noho oia ma ka Aha Piha me ka hooko pono i kana oihana, a malaila mai kohoia oia e Peresidena Arthur i hoa no ka Aha Kuhina. Ua noho oia he Luna Leta Nui, a he Kakauolelo no ke Keena Waiwai malalo o Arthur, alaila, mahope mai hookohuia he hoa no ka Aha Kaapuni Piha. Mai anei aku, laweia ae nei e Kalivilana ma ke poo o ka Oihana Kakauolelo o na Mokuaina Huiia o Amerika.