Ke Aloha Aina, Volume I, Number 3, 8 June 1895 — Ka Moku Heihei Valkyrie O Enelani. Ka Moho Paio no ke Kiaha Amerika. Ua Makaukau no ka Hoolana ia. [ARTICLE]

Ka Moku Heihei Valkyrie o Enelani.

Ka Moho Paio no ke Kiaha Amerika.

Ua Makaukau no ka Hoolana ia.

(Mai ka WORLD mai o Nu loka.) Ladana, Mei 24.-Na ka mea kakau mai o ka ʻWorldʻ o Glasgow, i telegarapa mai, e olelo ana, ua aneaen e makaukau loa ka moku heihei Valkyrie no ka hoolana ana i ka wai. I keia po, a i ole ia i ka la apopo paha e hoolana ia ai i ka wa nae e pii mai ai ke kai. Aole no he anaina makaikai no ka hoolaa ana. O Mr. Watson ka mea nana i hoolala a i kapili i keia moku, ka mea e hiki mai ana. Ua hoike ae o Mr. Watson i keia auina la no ke ana piha o keia moho paio hou. O ka loihi o ka laina iliwai e lana ai ka moku, he 89 kapuai, a o ka loihi pau loa nae o ka moku he 128 kapuai. O keia moku Valkyrie, oia wale no ka mea i oi aku o ka nui o na tona mamua o na moku heihei a pau loa, koe nae malalo iho na moku heihei Ailsa a me Satanic, a nona hoi na pea hihimanu i oi loa aku ka hihiu mamua o na moku heihei a pau loa i paio no ke Kiaha Amerika. Ma na oleloia, ua ano like kona kii me ka moku heihei "Beritania." Ua hoomakaulii loa o Mr. Watson e loaa iaia no keia kau aku ka moku holo loa, a ua nana nui oia i na wahi kinaunau a pau loa e loaa ole ai na kula. Pela no hoi, ua kukulu kaokoa ia he ano mikini heihei kokua, a ua hooponoponoia ka moku no ke kupono a me ka oluolu o na poe kolu a me ka ona, a ua kaupalena ia no nae ma ke ano e mama ai. O mua mai ka ilikai ae, ua anoniia ke kapiii ana, ua hanaia me ka papa kila i hamoia me ka wai dala, a i hoomaopopoia hoi he metala lenalena. O lalo ae o ka iwikaele, ua kapiliia me na papa Elm Amerika; a o luna ae, me ka paina melemele. O ka papahele no hoi, ua kapiliia me ke paina melemele, o ka nui o ke kepau maoli i hanaia malalo o ke kila, aole no i hoikeia mai aka, ua oleloia, ua aneane no he 100 tona. O ke kia, ka laau ihu a me na i-a,

ua oi loa aku ka nui mamaa o ko ka "Beritania," a ua hoolakoia ka makaukau no ka hoomahuahua hou ana aku i kona mau pea. E hao ana ka Valkyrie a paihi no ka heihei ana, he 20000 kapuai kuea ka ili o kona mau pea, (ua like ka nui e uhiia me ka ili o kekahi pahale o Honolulu nei, he 141, 41 kapuai ka loa a me ka laula.) Ua oi aku keia he 3,000 kapuai kuea, mamua o ka ili o na pea o ka moku heihei Beritania o ke Keikialii o Wale, a ua oi aku no hoi mamua o ka nui o na pea o ke "Defender" o Amerika e hiki ai ke lawe nona. Nolaila, ua manao ka mea nana i hoolala a i kapili, e oi loa aku ana ka holo o keia moku mamua ae o na moku a pau loa o ke au i hala aku la. Ma Meadowside, ua nana ia no ke kaumaha loa o ke kia a me ka loihi, e lawe ia ana i ka uwapo Finnieston, mamua o kona hookomo ia ana e kukulu iloko o ka moku. Mahope koke iho no o ka hiki ana aku o ka Valkyrie i ke Clyde, a mahope hoi o kona hoau ia ana ma ka muliwai Firth, alaila, e holo loa aku ana oia i kahi hoolulu moku heihei o ka Royal Harwich Yacht Club, e weheia ana iloko o lune. Hookahi mea ano nui ma ke kulana i hanaia ai keia moku, oia keia: Oiai ka moku Beritania a me ka Haku Dunraven hoi, ua uhiia me ke keleawe holookoa, aka, o ko ka Valkyrie, ua uhi wale ia no a like me ke kila kepau, a o ke koena ae, ua hapala ia me ke pena eleele i anai hinuhinu ia. Ma kekahi mau ano e ae no hoi, ua oi aku ko ia nei nani i ko kona mua aku i hala e hea ia nei i keia inoa hookahi. Ua holopono ka Haku Dunraven wae ana i na poe kolu e hana ai iluna o ka moku, oiai, he mea paakiki loa ka loaa pono ana aku o ka poe kupono i makemake ia. O kahi mea hookuemi hope wale no mamuli o ka manao o ka hapanui o ka poe nana aku, oia no ke kaupalena ia o ka nui o kana mau holo heihei ana iloko o keia kau heihei ae, a ma ia mea e haule ai kekahi mau pili makana ana. He 40 ka nui a pau loa o na kanaka o luna o ka Valkyre ke huipuia na kolu, elua kokua a me ke Kapena Cranfield a me Sycamore. Ua makaukau loa lakou a pau loa no ka pu-a ana i na pea i ka wa e holo ai ka moku heihei iloko o ke kai. Ua hele aku o Haku Dunraven i Clyde i kela pule aku nei, a ua nana pono i na mea a pau loa o ka moku no kona kapili paa ia ana a pau pono.