Ke Aloha Aina, Volume I, Number 3, 8 June 1895 — I AUPUNI PAULELE IA. [ARTICLE]

I AUPUNI PAULELE IA.

O ka makemake o ka Lahui, oia ke aupuni ana i paulele ai, oia ke ana a me ka rula lawe kulana hookumu a hookahua aupuni naauao, e ikeia nei mawaena o na lahui i noho ia e ka malamalama. O keia ka mea i ano e ai, a like ole hoi me ko na lahui naaupo, no ka mea, aole no ka hapanui e hooholo, na hana a me na alakai ana iloko o ke aupuni, aka, na kekahi poe uuku kakaikahi loa, a i ole, na ke Alii hookahi wale iho no. He mea paakiki loa, a he mea hoopoino, ka lawe kaihi ana ae i na mana a pau iloko o kekahi aina, a lahui paha, ina aole i ninauia aku ka manao a me ka makemake o ka lahui no ia mea, no ka mea, ua kukulu ia ke aupuni no ka pono, ka pomaikai a me ka hanohano o ka lahui holookoa, a ma ia mea, ua kupono loa e ninau ia, a e hoike ia, a e koho paha ka lahui i ke kupono a me ke kupono ole o ia hana. Eia hoi kekahi, o ka lahui ka mea nana na dala i auhauia no ke aupuni, a e uku ia no na hana, a me na Luna o ke Aupuni. Nolaila, o ke aupuni a ka lahui i paulele ai, oia ke aupuni maikai loa.