Ke Aloha Aina, Volume I, Number 3, 8 June 1895 — HEAHA LA KE KUMU? [ARTICLE]

HEAHA LA KE KUMU?

No ka ninau e pili ana i ka mea i haule ai ke kuikahi hoohuiaina a Kakina ma, ua maopopo loa ia makou ke kuumu, aole he pohihihi no ia ninau. Oia ka KE ALOHA AINA e hoike aku nei, penei: 1. Aole mai ka lahui Hawaii aku ua kuikahi hoohuiaina la. 2. He apuka na hana i hoomaopopo ia, a i olelo ia e ke komisina, ua ae ka lahui Hawaii i ua kuikahi la. (a) Ua loaa ia Peresidena Kalivalana ka hooiaio ana no ko ka lahui Hawaii hoole ana i ke kuikahi hoohuiaina. (b) Mamuli o ka hookuku ana i ka manawa a ke komisina i haalele ai ia

Honolulu nei; a hiki i ka hookomoia ana aku o ke kuikahi ma Wasinetona ia Peresidena Harrison. (c) Mamuli o ka loaa ana aku o ka palapala hoopii hoole mai na 8,000 poe Hawaii kupono i ke koho balota ia Peresidena Cleveland ma o Hon. J. H. Blount la. (d) Mamuli hoi o ka palapala hoopii hoole a ka Moiwahine Liliuokalani, e kue ana i ka noho aupuni ana a ka poe hookahuli aupuni. (e) Ilaila i ike ia ai, ua okea ka Iʻa a Umiamaka, ua piha i ke one. (3) Nolaila, hoole loa mai la o Cleveland a me kona aha kuhina i ka hoohuiaina palakai a Kakina ma. Pela e nele mau ai a pau ko Cleveland noho mana ana maluna o Amerika Huipuia, a na ke Akua e hoonoho hou ae i Peresidena e hoole loa mai ana i keia manao akualapu o ka poe hoahui o diabolo ma.