Ke Aloha Aina, Volume I, Number 2, 1 June 1895 — HAUOLI I NA MELE HAWAII. He Anaina Nui kai Akoakoa ae e Hooloha i ka Poe Mele Mai ka Aina E Mai. [ARTICLE]

HAUOLI I NA MELE HAWAII.

He Anaina Nui kai Akoakoa ae e Hoolohe i ka Poe Mele Mai ka Aina E Mai.

O na mele ka mea hauoli loa ia iloko o na haawina hana o ke ahiahi. Ua haawi ae ka Puali Puhiohe Lahui Hawaii i ka eha o kana aha hoike ma ka Metropolitan Hall i ka ponei. He nui wale na haneri o na poe ike puni himeni o Kapalakiko i hiki kino ae, a ua hikiwawe nohoi ko lakou hoike ana ae i ka ulumahiehie no na mele. O ka haawina mua loa ma ka papa kuhikuhi hana, oia no Boetiger's "Volunter" i pakaliia mai e ka mele Suppe's "Poet and Peasant." O keia mea hope ka mea i ikaika loa o ka paipai ia, a elua mau mele e ae nana i hoouluku ae i ke anaina me ka hauoli palena ole. O ka mahele hana maikai loa oia no na mele Hawaii. O keia ka mea nana i hoohauoli palena ole ae i ke anaina, a lohe ole ia aku ka puali mele, no ka uluku haalele loa o ke anaina i ka hauoli. O kekahi o na me!e Hawaii, oia no o "Lauonaona," a me Na Pua o Hawaii." He ku i ka iini a me ka makemake; nolaila o na mele a pau loa a ka poe mele o kahi aupuni uuku o ka Pakipika, ua apo ia mai ia me ka hauoli nui. O ke kani hone hoi a ke Kalionete a D. Kaleikoa, oia oi aku no hoi ia, no ka mea he ekolu ona kahea ia ana e ke anaina e puhi mai. O Senor Libornio ua hana oia ma na a pau e paulehia ia mai e na poe puni mele o Kapalakiko, a o ka pii mau ana o ke anaina i kela a me keia ahiahi, he hoike ia ua piha hauoli ia kana hana.