Ke Aloha Aina, Volume I, Number 2, 1 June 1895 — KO KE KUOKOA MANAO [ARTICLE]

KO KE KUOKOA MANAO.

Ua ike makou i na manao hoomau hala a hookekee o ke Kuokoa, a e pa henehene ana i ko makou hoala ana nupepa ahai lona mawaena o ko makou lahui ponoi, me ka olelo ana, he kupapaa ka Nupepa "Ke Aloha Aina," a makou i hoala ae nei, a pela aku. Ke hoomaikai aku nei makou ia oe e ke Kuokoa, no kau mau olelo naau lepo lokoino, no ka mea, oia ke ano mau o ka Nupepa Kuokoa mai kinohi mai. Eia wale no ka makou e olelo aku nei: Ua make io no o Lazaro, aka, ua hoala hou ia mai la oia e ka mana o Karisto. Ua make o Karisto, a ke kolu o ka la, ua ala hou mai oia, a mahope, ua pii i ka Lani, a ke ola nei a hiki i keia la. He mau kino kupapau laua a elua i waiho iloko o ka luakupapau, aka nae, ua ala mai laua, a ua ola hou; a ke manaoio nei ka Lunahooponopono o ke ALOHA AINA, (koe aku no ko ke Kuokoa) aia o Lazaro a me kona Haku Iesu Karisto i keia la ma ka Lani e ola mau ana. Pela ke ALOHA AINA, e ola mau aku ai iloko o ka puuwai o ka Lahui Hawaii, e noke ia nei i ka hoino, me ke ka-make ia e kanu ola iloko o ka lua kupapau o na manao hoino a ke Kuokoa.