Ke Aloha Aina, Volume I, Number 2, 1 June 1895 — KA AINA ALOHA. [ARTICLE]

KA AINA ALOHA.

He nui na aina mawaho aku o na aekai o ka Paeaina Hawaii nei; he mau aina nunui a palahalaha maoli e waiho ana mai ka akau a ka hema, mai ka hikina a i ke komohana. He mau aina i piha i na kuahiwi, na awawa, na puu a me na ululaau pouli. He mau aina i holo ia e na muliwai loloa akea e hiki ai i na moku ke komo he mau haneri, a he tausani o na loko wai akea ma ia mau aina i piha i na mea hauoli o na ano ia he lehulehu wale, a uhi ia hoi na kula me na huaai a me na mala o na poe mahiai i piha me na ohana holoholona he lehulehu wale, me na manu he nui wale ke ano, aka, auhea ka aina aloha i ko Hawaii Lahui ponoi? Maluna'e o na mea a pau loa e hiki ai ke olelo aku, he hookahi wale no mea e hiki ai ke pane ia oia @. O Hawaii, oia ka Aina Aloha @ Ma na mele a na kupuna o @ ma na kaao, ma na pahapaha ana, a iloko o na kalai olelo a me na ao haipule ana o ka lahui Hawaii kahiko, ua loaa na puana o keia Pae Aina nani o Hawaii oia ka Aina Aloha. O ka aina a ke Akua i haawi ai ia Aberahama a me kana poe mamo, oia hoi ka aina o Palesetina, oia ka aina o ka meli a me ka wai e kahe ana, he aina i piha i na mea e pomaikai ai na kanaka oia mau aina. O ka aina o Beritania, oia kai olelo ia, ka aina e napoo ole ai ka La, a pela aku. O ka mea i oi nae, oia no ke aloha, o ka aina o ke aloha, oia no o Hawaii.