Ke Aloha Aina, Volume I, Number 2, 1 Iune 1895 — KE ANAINA IKE [ARTICLE]

KE ANAINA IKE

O kela anaina ike a ke Komisina Beritania Haws, i malama ai, no ka hoohanohano ana aku i ka la hanau o kona Moiwahine Victoria, oia kekahi o na anaina i piha i ka mahaloia, a me ke ohohia nui ia e na kupa Pelekane a me na ano lahui e ae. Ua nui na lako paina haole i hoomakaukauia, no ka la hanau o ka Emeperesa kaulana o Inia, a me na Panalaau o Australia a me Kanada. Ua nui no hoi ka oluolu o ke Komisina a me kona hoahanau i ka hookipa ana aku i na malihini. Malaila na Luna Aupuni Kiekie, o na ainae, na poe hanohano o anei nei, na Luna Aupuni, a poo Aupuni o ka Repubalika. Ua komo no nae mawaena o ia lehulehu, he heluna o na poe Hawaii i hiki aku e hoomaikai i ka la hanau o Victoria ma o ke Komisina la. Ma ko makou hoomaopopo ana aku, aole i emi iho ko ke Komisina manao puili aloha i na Hawaii ana i hookipa ponoi aku ai, mamua o na makamaka o na lahui e a me kona iho. Ua hiki kino aku ilaila ka Peresidena o ka Hui Aloha Aina o na wahine, a pela no hoi he mau lede kekahi o na Hawaii i hiki aku ilaila. Malaila pu no ka Lunahooponopono o Ke Aloha Aina, i hiki aku oia ma ka aoao o ka Lahui Hawaii, e pahola aku i na hoomaikai ana o ka Hui Aloha Aina o ka Pae Aina o Hawaii, no ka Moiwahine Victoria ma o kona Komisina la. Ua ike no hoi makou he mau boke pua, e luluu ana maluna o ke pakaukau me na pepa i hoopaa ia, a mai ka Hui Aioha Aina aku kekahi o na wahine. Nui na launa hauoli o na mea a pau loa me ka hoomaikai nui i ke Komisina Beritania Haws, pela ka luana ana a hiki wale i ka huli hoi ana mai. Mamua nae hoi o ka haalele ana i ke Kuhina, ua kipa aku la makou e kakau i na inoa ma ka buke inoa o na malihini i kipa aku e ike no ka hanohano o ka Moiwahine kaulana o ke ao nei.