Ke Aloha Aina, Volume I, Number 1, 25 May 1895 — KA HOOPAAPAA NO VENEZUELA. [ARTICLE]

KA HOOPAAPAA NO VENEZUELA.

Ke mau nei keia kumu hoopaapaa mawaena o Beritania a me kela aupuni repubalika o Venezuela ma Amerika Hema. O ke kumu hoopaapaa, oia no kekahi mahele aina waiho wale mawaena o Guiana Beritania a me Venezuela. Ua noho aku nei na Beritania ma keia apana aina he aneane e piha na makahiki he iwakalua. A ua kukulu i papu kaua ma kahi kokoke loa i ka palena hikina o Venezue!a. Ua manao na poe Venezuela, o lakou kekahi mea kuleana ma ia aina, a ke koi nei me ke apuepue nui e loaa ia lakou he kuleana ma ia wahi, a ke koi aku nei e waiho na Amerika Huipuia e noho hooponopono mai mawaena o laua no keia ninau. Aia na puali o laua a elua ma na palena kahi i ku ai me ka makaukau mau e paio no ka lilo mai o keia apana aina mawaena o ko laua mau palena. Ua olelo ia, e komo mai ana Amerika e kokua ma ko Venezuela aoao e hooponopono ai; o ka hopena o na hana i manao ia, ua maopopo ka paakiki o na aoao a elua, a he hookahe koko ka hopena aku. Ke manao la na Beritania ua waiho wale ia no ia wahi, aole noho iki ia e na poe nana e koi nei; a i ka wa i hoea ae nei o ke gula ma ia apana, ua puoho mai la keia poe Makiko (Inikini Hapa Paniolo) a koi no lakou kekahi mahele o ia aina waonahele kanaka ole mamua. Oiai, ua loaa ia Beritania ka waiwai ma ia aina, malalo o ka hooikaika ana a kona poe kupa, nolaila, ao!e no lakou e ae mai ana a hiki i ka wa e punohu ai ka uahi o ka pauda ma kona mau palena e hoopaapaa ia nei. O na wahi a pau loa a Enelani e ku ai kona mau wawae, ua hookuonoono iho la kona noho ana. He 3 miliona pnha a oi aku ka nui o ka Lahui Venezuela.