Ke Aloha Aina, Volume I, Number 1, 25 Mei 1895 — Ka Manao Kupaa. [ARTICLE]

Ka Manao Kupaa.

O ka manao kupaa o ke kanaka, a o ka Lahui no ka pono io maoli o kona aina hanau, oia ka mea waiwai nui. Mamuli o ia manao, ua maopopo loa ia makou, e like me ka ke Akua i hoike mai ai i ko makou uhane; oia hookahi ka puuhonua no ka poe e paulele ana he Akua hoopono o Iehova. I na Oia he Akua hoopono, a he oiaio, he kue loa Oia i ka hewa, alaila, i ka wa hea e hiki ai ke hoololi ae ke kanaka, a o ka Lahui paha, a olelo mai, o ka hewa he mea pono ia? Ua hiki anei ke olelo mai, ua hiki iho la no keia hana hewa pela e pono kakou e lokahi a apono aku? E mau anei ke ku ana o na hana hewa a ke kanaka e kukulu ai? No makou iho, he hoole loa makou ia mea, a oia manaoio, he manaolana o makou, aole loa a mea nana e hoole mai. Mai poina e ko makou Lahui Oiwi ina e hoopuniia kakou e na popilikia o keia noho ana, hookahi mea nui, a hoomanawanui aku, e hoomau i ka manaoio a me ka manaolana no ka pono a ke Akua i haawi mai ai. Mai punia ae aku i na hana a ae aku i na hana a ka poe e ake ana e hoohiolo i ko kakou mau pono. Heaha ka waiwai o ke kanaka ke loaa iaia na waiwai a pau o keia ao a lilo aku kona uhane? Heaha ka pomaikai ke loaa i ka Lahui Hawaii na waiwai a pau loa o ka honua nei a lilo aku ko lakou Noho ana kuokoa lanakila? He mea pau wale no na waiwai a me na hanohano o keia ao, aka, o ka noho ana lanakila ana, e ili ana mai na makua a i ka lakou poe mamo, oia ka mea oi loa e pono ai no ka lahui Hawaii.