Ke Aloha Aina, Volume I, Number 1, 25 May 1895 — Ua hoi hou mai ka Maluhia. [ARTICLE]

Ua hoi hou mai ka Maluhia.

Ladana Mei 3—Ua hoike pili oihana ia ae, o ka hopena o na kukaiolelo ana mawaena o Haku Kimberly Kakauolelo o na Aina E, a me Medina, Kuhina o Salvadoa e hana ana no Nigaragua, a me Amabasedoa Bayard e ke aupuni Amerika, ua ae o Beritania i na e waiho aku ana o Nigaragua he nota ia Rear Adimarala Stephenson e ae ana i ke koi a Beritania mamuli o ka noho hope ana mai o ke aupuni o Salvadoa, a o ua koi poho la, e hookaaia no ma Ladana, i ka wa e hookoia ai e haalele koke no na aumoku kaua ia Corinto. O kekahi mau koi poho e ae a Beritania e hooponoponoia no e na komite hui. O ke aupuni Beritania, aole paha oia e kue ana i ko Amerika noho hoomalu ana ia Amerika waena, oiai i keia noii ana mai nei a Kimberly, ua olelo ae oia, he pono paha ia Amerika e noho hoomalu maluna o na aupuni o Amerika waena, a e kau maluna ona na koikoi no na hana a na kanaka oia mau aina. PAU KO KA MAKIKO NOHO KAOKOA. Wasinetona Mei 3—Ua hoopau iho uei o Nigaragua i ko ka Makiko noho kaokoa ana, ke kumu nana na pilikia i hoala, a ua hookomo ia mai he mahele mokuaina no Nigaragua me kahi oihana o Xelaya malalo o ka Peresidena o ke aupuni o ka Repubalika, ua hoike pili oihana ia mai keia i ke keena oihana o Amerika. O na hoailona o ke ala hou mai aole ia i nana ia aku e ka lehulehu, aka, ua hai ia ae nae he mea e komo hou aku ai iloko o na uluaoa ana i oi aku i ko ka noho ia ana o Corinto e na puali kaua Beritania. Nolaila, o kela pilikia mua, ua pau ia, a ke huli ae nei a nana aku heaha la ka Beritania hana i ka Nigaragua hana e pili ana i ka mokuaina hou e hooko ole aku ana i ka manao o na Beritania, a i ka hoolauna ana paha me ka aina mua o na poe Makiko.