Ke Alaula, Volume VII, Number 11, 1 Pepeluali 1873 — Page 41

KE ALAULA.
BUKE VII. HONOLULU, FEBUARI, 1873. HELU 11.

NA MAHOMEDA.

                E nana oukou i keia kii nui. He poe aha keia? He poe Mahomeda e hoomana ana. Anoe ko lakou papale ame ka hoomana ana. E ku ana kekahi, e kukuli ana kekahi, e noho ana kekahi iluna, e moe ana paha kekahi ilalo. He poe opiopio oukou, ua lohe nae paha i keia inoa, Mahometa, me keia hoomana, Mahomeda, aka, aole paha i maopopo ke ano o keia mau huaolelo. Ina makemake oukou e lohe, ke ae nei au e wehewehe iki aku.
                Mahometa, oi i ke poo, he kanaka maoli no, aole ona ano nui ma ka hanau ana. Abedala kona makuakane, ua hanau ia ma Meka, ma Arabia. He poe hoomanakii kona poe hoahanau apau. I kona lilo ana i kanaka makua, paa kona manao e hoopau i ka hoomanakii ana o kona hanauna, a e hoohuli ia lakou mamuli o ka hoomana i ke Akua hookahi wale no. Ke Akua ka mea nui, a o Mahometa oia ke kaula nui ona.
                Ma kana olelo hoopunipuni ua pii oia i ka lani, a ike i ke Akua, loaa mai na kauoha mai ke Akua mai, e hele e hoohuli i na hoomana mamuli o kona aoao. Manao anei oukou e na keiki, he oiaio keia olelo a Mahometa? Owai kai pii i ke lani, a hoi me na kauoha mai ke Akua mai ? Ua pii aku o Mose i hea, a loaa na kanawai o ke Akua ? Ua pii aku o Iesu i ka lani, ua hoi mai anei me na kanawai o ke Akua ? Aole, ua haawi e mai oia i na kanawai, i na kauoha. Iesu ke kaula nui. Aohe kaula nui e like me ia mahope mai.
                Ehia makahiki mahope o Iesu, a puka mai o Mahometa? Kokoke eono haneri.
                Hoohuli oia i kona hanauna paakiki, a hoomaloka lakou mamua. Mahope huli iki mai. A mahuahua na haumana, a nui, alaila lawe o Mahometa i ka pahikaua a lilo i Alihikaua, a hele pu me na haumana ana e kaua aku i ka poe hoole ia ia, a ma ka pahikaua, a me na olelo wahahee i hooili ai oia i na kanaka he nui wale mamuli o ka hoomana Mahomeda.
                Pehea, maikai anei keia ano hoohuli? Aole, aole ma ka pahikaua e hoohuli ia'i kanaka, kamalii, ma ka pono. Olelo o Iesu, "Aole no keia ao ko'u aupuni." Olelo o Paulo, "Aole no ke ao nei na mea kaua o ko makou kaua ana." Ka olelo a ke Akua oia ka pahikaua e huli ai kanaka ma ka pono, me ka pule no hoi. He Baibala okoa ka Mahometa, Korana ka inoa, aole nae na ke Akua mai keia buke. He wahahee ia, na ke kanaka mai no ia. Ua like paha kekahi mau olelo, mau kauoha me ka ke Akua kue nae kekahi.
                Nui na pule, na manawalea, na hooke ai i kauoha ia. Pule pinepine na Mahomeda; ua kapu hoi ka inu waina me na mea ona. Nui loa nae ke kuhihewa o lakou. Ehia lakou? He haneri miliona a oi aku. Ua paapu i ka pouli. Ua malamalama iki kekahi poe, a ua huli mai mamuli o Iesu. Aole nae he nui. E pule nui kakou no lakou i hoohuli nui ia ma ka pono. Aole hiki ia'u ke wehewehe loihi, aia a nunui iki ae oukou e na pokii, alaila wehewehe hou aku au.

PAUPAUAHO O KINI.

                He helehelena kaumaha kou e Kini, wahi a ke kumu ana, no ke aha ? Ua make anei kuu makuahine?
                Aole i make ko'u makuahine, aka, ua ane paupauaho au.
                Peha kau himeni e himeni nei?
                                "Mai paupauaho oe,
                                Iesu ke hoa ou?"
                Ua paanaau no ia himeni ia'u, a ua kuhi au he koa au no Iesu, e paio ana iloko o kona puali, a malalo iho o kona hae. Ua kuhi hewa paha au.
                No keaha kou manao ana pela? wahi a ke kumu; ua hana hewa anei oe ia Iesu, ka makamaka maikai?
                Ua hana hewa no au, ua ae aku no i ka hoowalewale, ua hai aku no nae au i kuu hewa ia Iesu me ka mihi nui no.
                Ina pela, aole anei e kala mai oia ia oe? E kala mai no oia, a e oluolu mai no. No keaha kou kaumaha, a hoole, aole paha oe he haumana na Iesu?"
                Eia, ohumu, a hoohalahala a ae ole paha au ke kau mai na pilikia nui maluna o'u.
                Ina i make ko'u makuahine aloha, kuu kaikaina liilii a makamae, aole paha au e ae oluolu aku i ka ke Akua hana. Ina kau mai ka ilihune, a nele au i ka lole mai-