Ke Alaula, Volume VII, Number 8, 1 November 1872 — Page 32

32 KE ALAULA

LAAU NANI.
Leo: “THE BEAUTIFUL TREE OF LIFE.”---Fresh Laurels.

Ma ka pu-u he la-au mai-kai e, He gu-la na hu-a a pau: No na ki-ni a pau ke kii ae, Ko-na wai-wai a kau mau. Ua u-li a mau kona lau, Na pu-a he a-a-la e, He na-ni na la-la o-ma-o, A ka-ni na o-li ma-i-kai. A ka-ni na o-li mai-kai.

2. Tausani, tausani ka i kii
A ohi na hua maikai,
A ai a maona lea'e.
A koe nae kona waiwai.
Owai kou inoa? hai mai
A mahea kou puu uli e?
Kau mai i kou malu maikai;
Laau kamahao nani nei.

3. Ma ka puu o Ziona Laelae
Ku mau ia laau kamahao,
Olino na lau gula e,
A pii i ke ao ka welau.
Laau nanai e! na Iesu
I kai mai na puu lani mai;
Oiaio ka inoa mao,
Baibala ka inoa maanei.

E HANA E LIKE ME KA HIKI.

                Aole anei e hiki ia oe, e Debora, ke hana maikai, e like me ka makemake o kou makua, a kou kumu paha? Ina ua hiki, no ke aha ka hana ole e like me ua hiki nei? He mana no kou e hana maikai ai, ma na mea he nui wale. Ke huna nei no nae paha oe i keia mana.
                Ia'u i kamalii ai, wahi a kekahi kanaka, ua hele au e ike i kuu kupunakane, he elemakule poohina maikai oia ; lealea au i ka ike ana iaia, i ka owili ana i kona lauoho a umiumi loihi e pili ana i kona poli; a lealea hoi kuu kupuna i ka ike ana ia'u, me ka paani pu.
                A, i ka pau na o ka ike, a makaukau au e honi iaia a hoi aku, apo mai kela ia'u, a hoopili i kona poli, a olelo, e kuu moopuna, he wahi kauoha ka'u ia oe; hiki anei ia oe ke hoopaa a hookua, e hana no manao mau ? Haka pono au i kona maka, me ke kunou iho o kuu poo, no ka mea, makau au e ae me kuu leo. E'a ua kauoha nei, wahi a ke kupuna: "Ma na hana a pau au e hana'i, e hana maikai oe e like me kau hiki."
                Me he kauoha hooilina keia a kuu kupuna maluna o'u, a ua mau no kuu hoao ana e malama.
                Ia'u i hoi ai i kuu home, haawi mai kuu makua i kekahi hana ia maua me kuu kaikaina, Mareko, oia ka waele ana iloko o ka mala i paapu i ka nahelehele. Hana kuu kaikaina me ka ohumu, a hoohalahala, a ukiuki, no ka mea, ua makemake oia, maua pu hoi, e hele i ka paani me na hoa. Hana kapulu wale o ia me ka molowa. Owau hoi, ko'u manao mua e hana pela, e like me Mareko, hoomanao no nae au i ke kauoha a kuu kupunakane, e hana maikai oe, e like me kou hiki, a hana au pela.
                A, mahope hele mai ka makua e nana i ka maua hana ana; nani kuu olioli i ka ike ana i kona maha'o ana mai i ka'u hana, me kona makana ana mai mahope i hapawalu no'u, me ka olelo, ua hana maikai oe. Pau e ka'u hana a hoi au noho nae kuu kaikaina e hoi hou, a hana hou i kana wahi i waele ai a po ka la.
                A, mahope, hele au i ke kula hanai; nui na mea kula, a paakiki no kekahi, a ane makau, a hana kapulu au me ka hoopaa pono ole, aka, hoomanao au i ke kauoha a kuu kupunakane, "e hana maikai oe e like me kau hiki, a hooikaika no au ma ke ao maikai ana a mau, a loaa ano, lilo i haumana i mahaloia no ka naauao.
                A, mahope, huli au ma ka pono, a lilo i hoahanau ekalesia, a ma na hana ekalesia a pau, na hana.
                Pela oukou e hana'i, e na keiki, na ui, na makua, e hana no a maikai ae, e like me ka hiki. Kek. 9: 10.

HUMANITI.

                Heaha keia huaolelo? Pohihihi, oa. Ua lohe, ua heluhelu kekahi mau haumana i ka huaolelo kuaniti, a hiki paha ke hai mai i ke ano. He mea pili i na mea i hiki ke anaia a kaupaonaia, e like me ka pa laau a me ke ko. Iwakalua anana ka loihi o ka pa, iwakalua paono ko. A o keia huaolelo humaniti, he huaolelo haole no ; a eia ke ano, o ke aloha kanaka. Ina ikea oe, e Mere, i kekahi keiki, a kanaka makua paha, ua haule a eha, ua pololi, ua nele, e waiho ana paha ma ka hale me ka mai, a holo oe e hoala, e wahi i ka eha me ka welu, a e kii i ke kauka e lapaau a e lawe i ka ai, a hanai i ka mea pololi, a e haawi i ka palapala i ke keiki i nele a hiki ole ke kuai, oia ke ano o ka humaniti, oia hoi ke loha i hui pu ia me ka hana. Ua loaa anei keia aloha, keia humaniti ia oukou, e a'u poe pokii, me ka poe nunui ili ae? Ka naau ke kumu o keia aloha, he naau menemene, he maka uwe, he waha aloha, a he wahi hana e maopopo ai ke aloha io.
                Nui ka poe pilikia; ua puni kakou ia lakou ; eia lakou maanei, ma ke alanui, mauka, makai, ma ka hale, he naaupo, he nele, he hele ole i na kula, i na halawai, he ai ole, he lole ole, he palapala ole, he ALAULA ole, he makua ole, he makamaka ole. Pono ke aloha a kokua i ka hoolako iki ana. Aia ma Fatuiwa ma Maikonisia, he nui ia poe pilikia, naaupo, ike ole, palapala ole. E na kaikamahine, a keikikane, lulu mai i na hapawalu kokua mahina hou no lakou.

HE NANE.

Ko'u mua me ka lua, he alii no Aigupita.
Ko'u mua, 2, 3, he lama nui ma ka olelo Latina.
Ko'u mua, 2, 3, 4, pili i ke mele hookahi ana.
Ko'u 2, 3, 4, he hana ia na ke kamana.
Ko'u 3, 4, 5, 8, pili i ka molowa.
Ko'u 7 me ka 2, he kulanakauhale nui ma Aigupita i hoohioloia.
Ko'u 3, 4, 7, 6, he akua kahiko o Hawaii a nalo aku.
Ko'u 8, 5, 6, pili i kekahi laau.
Ko'u 2, 7, 8, pili i ka mea hale.
Ko'u 8, 7, 6, pili i na mea he nui wale.
Ko'u 2 me ka 4, pili i ka mahiai.
Ko'u 2, 4, 6, pili i ka mea a Petero i lohe ai a mihi.
Ko'u 8 me ka 2, puka mai ia ke pau ka moe.
Ko'u 2 me ka 8, pili i na hale.
Ko'u 5, 6, 8, he mea i hanaia, ma ka la elima.
Ko'u 5, 8, 7, 6, he helu Hawaii.
Ko'u 2, 5, 6. pili i na keiki liilii.
Ko'u 7, 8, 3, 4, he mea kolo, a lele a hoonaukiuki mai.
Ko'u 7, 8, 6, pili i kekahi kula.
Ko'u 5, 2, 4, he mea kolo, he mea haumia i ka poe Iseraela. Oihk. 11: 30.
Ko'u huina oia ka oukou e imi ai, a hai mai, he haku mele no, a he alii no hoi. Owai la ?

                Ka haina o ka nane i paiia ma ke ALAULA no Sepatemaba. Eia ka haina, Honua. Hooiaio: 1, H ; 1, 2, Ho; 1, 4, Hu ; 1, 5, Ho; 2, 0; 1, 2, 3, 4, Honu; 1, 5, 4, Hau; 1, 2, 5, Hon; 1, 4, 3, 5, Huna ; 2, 3, 4, Onu ; 2, 5, Oa; 2, 3, 5, Ona; 2, 4, Ou; 3, 2, No; 3, 5, 1, 4, Nahu ; 4, U; 3, 4, 5, Nua; 3 4, Nu; 4, 5, Ua; 5 A; 3, 5, Na; 5, 4, Au ; 5, 3, 4, Anu ; 5, 2, Ao; 5, 3, 2, Ano; 4, 3, 5 Una; 4, 1, 5, Uha; 1,4 5, Hua; 1, 2, 4, Hou ; 5, 1, 2, Aho; 5, 1, 4. Ahu. Haina, Honua. Loaa like ia Keni Maukaa, no Waimea, Hawaii, he kaikamahine kula ia ; ia Charles Broad, he keikikane, 11 makahiki no Kaumakapili, Honolulu ; ia R. Kuikahi, no Hamakua, Hawaii; ia I. Kaaukai, Hamakua, Hawaii, e mau kanaka makua laua ; ia S. Kaaloleo Kaneakua, no ke Kula Sabati o Haili, Hilo. Lakou nei wale no ka i hooili mai i ka haina. Ua nui loa paha ka poe i loaa, aole nae i puka mai ka haina i ka Luna Hooponopono.

                                Pule na kamalii,
                                Ia Iesu ke Alii.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta akahi ka uku no na pepa he iwakalua a oi aku paha ma ke ope pokahi, ME KA HOOKAA MUA IA MAI.
L. LAIANA Luna Hoopuka.