Ke Alaula, Volume VII, Number 8, 1 Nowemapa 1872 — Page 29
KE ALAULA.
BUKE VII. HONOLULU, NOVEMABA, 1872. HELU 8.
MAI ILI A NAHA KA MOKU NO KA PONO OLE O KA PAHU PANANA.
Ua ike kekahi poe o oukou, e na ui, na keiki, he mea maluna o na moku i kapaia he panana i hookomoia iloko o kahi pahu poepoe liilii, a e kau ana ma kahi kokoke i ka hoe uli, i hiki i ka mea hookele i ka moku ke nana a hookele pololei.
He moku mahu nui e holo ana mai Nu Ioka a Livapula mamua aku nei. He pailaka akamai maluna ona, a he kapena naauao no hoi. Ua lawe pinepine ua moku nei i ka ukana me na ohua ma ka moana, i kela wahi i keia wahi me ka pilikia ole. A ma keia holo ana, ua hoomaka pono no, e nana mau ana ke pailaka ka i ke panana, a e holo ana e like me ke kuhikuhi ma ke panana. Aole emo he leo hooho nui, "Na nalu ! Na nalu ! Ke holo nei ka moku i uka iwaena o na ale e halulu weliweli ana!" Ma ka noonoo koke, a me ke akamai o ke pailaka, ua pakele ka moku i ka poino. Mai holo a ili ma uka iwaena o na nalu make.
Nohea keia pilikia, keia lalau o ka holo ana? No ke panana anei? Aole, ua maikai ke panana, aka, ua hewa ka pahu poepoe. He wahi kui hao ka i kakiaia ma kahi puka no ke kui keleawe i haule iho. He kui keleawe ka pono, o keia kui hao hookahi ka i hoolalau i ke panana a kuhikuhi hewaia, a hookele hewa ke pailaka i ka moku, a mai pau loa lakou a pau i ka make.
E na keiki, na ui, na makua, ke hoomaka nei paha oukou e holo mai anei aku a i ka lani, kahi e malu i maha oi ke pau na ino na luhi, na kaumaha o keia ao. He Pailaka maikai a akamai ko oukou, o Iesu ia ; a he panana maikai no oia hoi ka Baibala. O ka mea e kuhikuhi pololei ai ke pananu oia ka manaoio, ke kui keleawe ia; a o ka manaoio ole, ka hoomaloka, oia ke kui hao ka mea hoolalau i ke panana a holohewa oukou.
E nana pono ano i ko oukou pahu panana, oia ko oukou naau, kahi i hookomoia ai ka olelo a ke Akua. Heaha na kui iloko? He mau kui keleawe anei? He mau kui hao paha? O na kui keleawe, oia ka manaoio, ka manaolana, ke aloha. Ina me keia mau kui ka oukou holo ana a hiki i ka hopena, e hiki aku ana no oukou i ke awa o ka lani kahi o ka ninini mau loa. Aka ina ua paapu ka naau i na kui hao, i ka hewa, i ke kuko ino, i ka hoomaloka, e komo iloko o na nalu make, a e poino mau ana ko oukou mau uhane.
Hoopaa i keia pauku himeni :
"Iesu ka moku holo,
Holo, holo,
Iesu ka moku holo,
I ke Kanaana hou,
E ee ae oukou a holo,
Holo, holo,
E ee oukou a holo
I ka nani ma ke ao.
Nani haleluia, mele oli na ohua.
Nani haleluia, haleluia ia Iesu."
ALOHA INO O PITA.
Owai o Pita? He keikikane no, a he mau hoa paani kona. A i kekahi la, ua hele lakou i ka lawaia. A i ke ku ana ma ka uwapo e hooponopono ana i ke aho a me ka makau, hihiu loa kekahi keiki ia Pita, a pahu aku iaia iloko o ka wai. A ike ua keiki huhu nei i kona hoa ia Pita, e poholo ana iloko o ka wai, kona luu koke no ia e kii e hoola iaia. Aole nae i hiki ke hoola.
Holo mai na kanaka hana elua mai ke kua mai e kokua i ka hoola, aole nae e hiki, ua hala ka manawa pono, ua laweia o Pita mailoko mai o ka wai, ua make nae. Ua hoihoiiia aku kona kino make i ka hale o na makua. O ua keiki huhu nei ka i hoi pu me ke kino make o Pita, a hai aku oia i ke kumu o kona make, a noho pu a kiai pu, a hiki i ka wa e kanu a ai, hele pu oia i ka luakupapau me ka naau kaumaha a me ka leo kanikau he nui wale. Nui ke aloha o kanaka iaia.
Ke ike nei oukou, e na keiki i ke ano o ka huhu, he pepehi kanaka maloko. Aia a piha ke keiki i ka huhu, ua like oia me ka mea pupule, aole ona manao iki i kana e hana'i, e pepehi me ka laau, e hailuku me ka pohaku, e pahu aku iloko o ke kai.
Ninau o Mere, "E kuu makuakane, aole anei e hoopai nui ke Akua ia keiki no ka pepehi ana ia Pita ?" Ua kaumaha hoi, a mihi nui oia, wahi a ka makua; aole anei oe e kala aku iaia, a e hoao e hoolilo iaia i keiki maikai ma keia hope aku? Na ke Akua oia e kala ma o Iesu la wahi a Mele, me ka leo hawanawana.
Na kamalii makalii,
Mai huhu, a hakaka,
Mea ino lapuwale.