Ke Alaula, Volume VII, Number 7, 1 October 1872 — KELA MEA KEIA MEA. [ARTICLE]

KELA MEA KEIA MEA.

Nui ka la, ka wela, ka maloo, i keia malama ma Kohala Hema, Kohala Akau, Hamakua a me Hilo aku. Nui nae ka ua ma Kona Akau a me Kona Hema, kahi maloo a panoa mamua aku. E pule i haule mai ka ua ma na wahi maloo. Ka pule me ka manaoio ka mea e loaa'i ka ua. Ikaika ka aa ana o ka pele ma Mauna Loa. Paapu ka lani i ka uwahi ma ke ao, a i ka lapalapa ahi ma ka po. He hoailana ia no ka uwahi a me ka lapalapa ahi o Gehena e punohu mau ana. E pule ikaika i ole e paa o Hawaii i ka pele. Makena wale na mai, na kuna, na fiva, mamua aku nei; ua emi nae a ane pau i keia manawa. Ua auhee aku hoi ka mea hepelu, ua holo la ihea? E hoomaikai aku i ke Akua no ka hoopau ana i na mai. Ua kukulu ia ka Aha Euanelio o Hawaii Komohana ma Kona mamua aku nei. Malaila no o Rev. J. F. Pokue. Maikai no ka halawai wahi ana, palaka nae na ekalesia me na kula Sabati. Hookahi kahunapule hou, Nawahine. Hiamoe loa o Kailua; aole ka o lakou makemake i kahunapule hou i pani no Pilipo. Naaupo maoli. E pule na hoa no na Kona elua i ala. Palaka loa o Waipi mamua aku nei. Ua ala hou nae i keia wa, ia haae, ka haiolelo hou. Ua ala na halawai me na kula Sabati. E pule i mau ke ola ona.