Ke Alaula, Volume VII, Number 7, 1 October 1872 — Page 25

KE ALAULA.
BUKE VII. HONOLULU, OKATOBA, 1872. HELU 7.

KA HONU A ME KA AETO.

                He mea mau i na kamalii ka paani ma na lio, ka hoolilo ana hoi ia lakou iho, me he mau ilio a popoki la hoi. A he mau mea oluolu pono hoi keia mau hana i na kamalii. I kekahi manawa oiai lakou e noho ana me ko lakou mau makua, e hana no lakou e like me keia, e aoaoa ana, e miao ana hoi, e like me ka ilio a popoki paha. Aohe mea opio i hiki ole ke hoohalike aku me ka mea a lakou i makemake ai. A o ko kakou moolelo oia no "Ka Honu a me ka Aeto," a he haawina maikai keia no na opio e hoomanao ai a malama.
                O ka Honu, he wahi mea ola no oia i noho ma ka wai, a ma ke kai, a ma ka aina no hoi.A o ka Aeto, oia no hoi ke alii o na manu, he manu nui, a hiki ke lele a kiekie loa ma ka lewa anuu o na ao, a hookokoke aku no hoi i ka la i kekahi manawa. O keia Honu, ua nui kona makemake e lilo i manu a lele i ka lewa; ua manao oia e hiki iaia ke lele ina oia e hoowalea ia, oia ka mea e maa ai a hiki ke lele me ka mama i ka lewa a kau aheahe hoi.
                I kekahi la, aia hoi ka Aeto e lele ae ana, kahea aku la ka Honu a olelo aku la iaia, "E oluolu oe e ae mai ia'u e lele i ka lewa?"
                Pane mai la ka Aeto, "Aole hiki ia oe ke aoia e lele, no ka mea, aole ia o kou haawina a ke Akua i hana mai ai."
                Aka, aole pau ko ka Honu iini ana e lele i kalewa. Ua noi hou aku no ia i ka manu nui e lawe iaia a hala loa iluna, alaila e hookuu mai iaia e haule malie i hiki ke lele aku e like me ka manu nui.
                Noonoo iho la ka Aeto aohe mea e ae e pau ai kona iini, o ka hooko wale aku no, e like me kona makemake.
                Lawe aku la oia i ua Honu nei, a hiki i ka lewa iluna loa, alaila hookuu iho la oia i ua honu naaupo nei, o kona haule iho la no ia i ka honua a paki liilii maluna o kekahi puu pohaku nui.
                Ano, e na opio, mai iini i na mea ino; mai hoopa, mai lawelawe, a mai hooko i na iini ino loa, o like auanei me ka Honu nui naaupo, a he hopena kaumaha loa no hoi.

MINAMINA.

                Pela io, he mea minamina ka ike ia ana o kekahi poe keiki e auwana wale ana i ka la Sabati, me he mea la, aole o lakou uhane.
                "Ua ike no ka bipi i kona haku. A o ka hoki hoi i kahi hanai o kona kahu." Aka, o kekahi poe keiki, aole no lakou i malama i ka la Sabati, a, aole hoi i huli i ka Baibala i loaa ke ola no ko lakou mau uhane.Auwe! auwe! ua poe keiki nei! Minamina maoli ko lakou hele ana ma ke ala e hiki aku ai i ka make.
                Ina ma na aina pegana wale no ua poe keiki nei, aole hoohalahala nui ia, no ka mea, he mau aina pouli kela, aole i aoia na kanaka ma na hana o ka pono. Aka, no ka mea hoi, eia lakou mawaena o kakou ma Hawaii nei, nolaila, i haohao ai ka manao no lakou, a i kaumaha ai ka naau.
                Heaha la ka mea hiki ke nana aku no ua poe keiki auwana nei i lilo lakou i poe keiki malama i ka la Sabati, a hele i ke kula ao Baibala? Owai la ke Daniela nana e hoike mai?
                E lilo keia i kumu noonoo no ka poe lawe ALAULA.

                                Hoao kakou i like
                                Me ko kakou Iesu,
                                Maemae, a hemolele,
                                Haahaa, a akahele,
                                A lokomaikai pu.
                                Hui—Hoao, hoao kakou la, &c.
                                —Hae Hoonani.