Ke Alaula, Volume VII, Number 3, 1 June 1872 — Page 11

KE ALAULA 11

pii aku la o Mose. A i kona hoopau ana i ke kamailio me Mose, maluna o ka Mauna o Sinai, haawi mai la oia iaia i elua papa kanawai, he mau papa pohaku, ua kahakahaia e ka lima o ke Akua." Pukaana 19; 20: 31; 18.

Papa kaikamahine - Aia mahea Mauna Sinai ? Aia no ia ma Arabia, mawaena o na olelo elua o ke Kai Ula.

Heaha keia mau olelo? He mau kaikuono no o ka welau akau o ke Kai Ula.

Heaha he ano o ka hua, Sinai? He aina pohaku wanawana, me kekahi aina aa o Hawaii.

Mauna Sinai, Mauna Horeba, hookahi anei laua ? Hookahi no lalani mauna, elua nae piko. O. Horeba ka inoa o ka piko akau; a o Sinai ka inoa o ka piko hema.

Owai ka inoa o Sinai i na Araba? Ka Mauna o Mose.

He wahi aha ia ? He wahi neoneo, he aa, he aina pali, a piha i na awawa me na kahawai.

Pehea ke kiekie o Sinai ? 7,000 kapuai a oi, a ekolu mile ka loa o ua lalani mauna la.

Hai paanaau mai i keia pauku himeni:

"Lohea ka leo mai Sinai,

Loaa kuu mea e hewa ai;

Haalulu kuu naau –

He leo weliweli no,

Hoolohe, a hoopono mau,

O make mau oukou.

Mele - Buke Himeni 117, 2 pauku.

Papa kane - Owai ka mauna ma Hebera 12;18-21?

Ku a heluhelu like mai ia mau pauku.

Pili keia mau pauku i ka mauna hea?

Papa wahine - He mauna okoa ma Heb. 12:22.

Owai ia mauna? Hai like mai pauku 22 -2 4.

Owai ka mauna i oi, Sinai, Ziona?

Mahea ka oi ana ? He leo make ka i pa e mai mai Sinai mai, he leo hooweliweli loa. Aka, he leo hooluolu ka i pa mai Ziona mai, he leo no ke O a.

Hai mai i keia mau pauku himeni ?

"Poha ka leo kanawai,"

Kuu hewa hoi ua nui ae,

Kaumaha maoli no;

A nana wau, ua akaka mai,

E hanau hou e pono ai

Na lawehala a pau."

"Pau ka kakou aie nui,

Paa ke kanawai maikai,

Pau ka mana o ka make,

Pau ka hana e ola'i -

Pau ia Iesu,

Ahonui ! akahai !"

Papa pokii - Ehia papa kanawai i haawiia mai ia Mose? Elua.

Ehia kanawai? He umi.

Ma ka mauna hea i haawiia mai ai?

Hai pualu mai i na kanawai i paanaau ia oukou. Kanawai akahi, alua, ekolu, aha.

Ua papa anei kekahi kanawai i ka wahahee Ua papa anei kekahi i ka aihue?

Heaha ke kanawai no ko la Sabati?

Hai paanaau mai i keia mele;

"Aloha 'kahi i kekahi,

Pela Iesu i ao mai;

Waiho i ka alapahi,

Malama i ke kanawai,"

Mele - "Honi maikai." Hae Hoonani,

Ke kula a pau - E huli, a hoi mai i kekahi mau pauku e ae no Mauna Sinai. Puk. 19: 18; 24:16, 17; Neh. 9:13; Oih. 7: 30; Gal. 4:24, 26; Lunak. 5:5; Hal. 68:8, 17.

Papa keiki kane - Hai mai i na kanawai ma ka papa akahi, oia hoi na kanawai 1, 2, 3, 4.

Papa kaikamahine— Hoi mai i na kanawai ma ka papa elua, oia hoi na kanawai 5, 6, 7, 8, 9, 10.

Ku no ke kula a pau, a pualu mai i na kanawai he umi a pau.

Make kakou i ke kanawai, ola i ke aha ? Ehia mauna i pau?

Papa kane — Owai kekahi mauna Baibala? Mauna Hora.

O wai ka i pii ae a make malaila ? Aarona.

"Hana iho la o Mose e like me ka Iehova i kauoha mai ai; a pii aku la laua ma ke kuahiwi o Hora imua o ke anaina kanaka a pau. Wehe ae la o Mose i na aahu o Aarona, o hoaahu ae la maluna o kana keiki o Eleazira; a make iho la o Aarona malaila ma kahi oi o ke kuahiwi; a iho iho la o Mose laua me Eleazara mai ke kuahiwi mai." Nahelu 20: 27, 28.

Papa wahine - Aia mahea Mauna Hora? Aia no ia ma Arabia Pohaku, ma ka hema o Idumea, mawaenakonu o Kai Make a me ke kai kuono akau o Kai Ula

Owai ka inoa ma keia wa? Ka Mauna o Aarona i na Araba. Aia ka ilaila ka lua kupapau o Aarona i keia manawa, wahi a na Araba. Make e ka o Aarona mamua o ka puka ana aku i Kanaana!

No ke aha ? No kona mau hewa no.

Heaha kona mau hewa ? Ka hana ana i ke kii pipi gula - ka ohumu pu me Miriama ia Mose - o ka hui pu me Mose ma ka hoopuka ana i kekahi mau hua olelo ano hookiekie, a hoomaikai ole i ke Akua.

Aole anei oia i mihi ? Ua mihi no, a komo iloko o Kanaana hou.

E makau i na hewa a pau.

Na pokii - E pule pu oukou penei: E Iesu, e aloha mai oe ia makou i na keiki hewa, e kalamai, e hoola mai ma kau koko, me kou pono; Amene.

Na manao paipai,

Mele - "A ike maka'e." Alaula.

Pule hui, a hookuu aku ke kahunapule.

NO KA LAWE LETA ANA A ME NA HALE LETA. - Helu 2.

I ka hoomaka ana i ka palapala, ua haalele ka inoa o ke koona a me ka aina, a o ka la me ka malama wale no, aole moakaka penei: Chicago, Ill. Jan. 7, 1869. Eia hou, ma ka hoopau ana i ka leta, o ka inoa mua wale no ka i kakauia, o Ioane; o Wiliama, o Mere, a pela aku. Nui wale na Ioane, na Wiliama a me na Mere, a ia wai e hoouna ai ke ole o Ioane Bu, o Wiliama Smith, a o Mere Nape? A me nei paha hoopauia ana: "Na kau keiki punahele," "kou makuahine aloha," a pela aku.

O na mea maopopo ole ka mea nona ka leta, kahi e hoihoi ai; ua laweia i ka hale hana pepa kakau, a puka hou mai he pepa aiai maikai.

Eia kekahi mau mea i hoikeikeia ma kekahi keena o ua hale nei, i laweia no loko o na wahi alaila ; Kamaa lahilahi, he poo koloa, he niho elepani. pu-panapana, he miki lima, lau nahele, lauoho hookui, lihilihi, ipu baka, hupa, buke kii, keiki (elua kapuai ke kiekie), pulelehua, moena, laau lapaau, kiaha gula, pahi waiu-bata, puna kala, gula pepeiao, wati, pupu o kahakai, eke waiho kala, kopa, ko, ti, kope, pua me ke kakaka, kii, buke, pahu kika, huelo o ka iole o na aina e, na kahi lauoho ipu-boki, a nui wale na mea e aku. A i ole e hoomaopopoia ka ona, e kukalaia ana keia mau mea; a no ke aupuni ke kala.

(Ma ka aina naauao o Enelani he 13,000 leta ka i hoounaia i ka makahiki me ka inoa ole. Wahi a ka poe naaupo, e make ana kekahi ke hoihoiia mai ka leta.)

I ka po e haliia ana na eke leta nui, aole o kana mai, mai o a o o ka aina. Ma ke "kaa leta" ka hooponopono ana i makaukau no ka haawi ana ke hiki ma kau wahi.

Mai ke kiko waena ae o ka lehulehu o ka aina ua haliia ke aloha; na nuhou o kela ano keia ano, mamua o ka puka ana o ka la.

O ka nupepa ka ai o na miliona kanaka, a ke ole puka aku ka nupepa o kakahiaka i kona wa kupono, e pilikia auanei kekahi poe. Ma kahi holo ai ka hana, ke kalepa, malaila e ukali ana ka hale leta. He mama kona ulu ana, kona holo ana imua.

I ka makahiki 1808, o na leta no ka hema a pau o Amerika Huipuia, ua haliia ma ke kua o ke kanaka hookahi i ka waapa uuku, e lawe ana i ka hema. I keia wa ewalu kaa lio e kokua nei i ka lawe ana i na eke leta a kau ma na kaa mahu ekolu, e halele ana i Nu Ioka i kela la i keia la.

Na moku lawe leta,

E holo, mai kaukai—

Na lio lawe leta,

E lele peke ae —

Na kaa i lawe leta,

E kaa, mai kali e -

Na weia lawe leta,

E ao o moku ae -

Na kanaka lawe leta,

Mai lohi, e awiwi -

Na baluna lawe leta,

Mai lele hewa e -

Na manu lawe leta,

E lawe pololei.

Kini na lawe leta -

Nani ka pomaikai;

Hoopiha i na eke,

A heluhelu e. W.

KE ALAULA.

He Nupepa Hoikeike Kii.

Hoopuka mau ia ma Honolulu, i keia malama keia malama o ka

PAPA HAWAII, no na Kamalii Hawaii.

2 1/2 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope L. LAIANA Luna Hoopuka.