Ke Alaula, Volume VI, Number 12, 1 March 1872 — Page 47

KE ALAULA. 47

KE KAIKAMAHINE PAULELE.

                Ua hele o Nele Pa sana i ke kula, ma kekahi wahi i aneane hookahi mile mai kona hale aku. He loihi loa ia wahi iaia ke hele wawae i ka wa hooilo. Ua lawe mau kona makuakane iaia i ke kula i kakahiaka maluna o ke kaa lio, a kaaholohau paha; a pela no ke hoihoi mai iaia i ka hale, ke ahiahi.
                I kekahi auina la, ua ku iho oia mawaho o ka hale kula a kahea aku ia Nele e puka mai, me ka olelo aku, "E pii ana au ma ke alanui i kekahi mau mile; aole paha au e hiki koke mai ana mahope iho o ka pau ana o ke kula. Aka, e kali oe ia'u a hoi mai au; e hiki mai no au i anei mamua o ka poeleele ana."
                I ka pau ana o ke kula, owili ae la na keiki ia lakou iho, iloko o ko lakou mau koloka, na kuka, a me na kihei, a puka aku la a hoi i ka hale.
                "Aole anei oe e hoi ana?" wahi a kekahi kaikamahine, ka mea hope loa e haalele ana i ke keena kula, iaia i ike aku ai ia Nele, e noho ana ma ke kapuahi hoomahana.
                "Ua i mai kuu makuakane e kali au iaia," wahi a Nele.
                "Aohe anei ou makau i ka noho mehameha iho i anei?"
                "Heaha la ka mea e makau ai? he maikai no keia wahi, a he mehana no hoi."
                "He makau au ke noho iho i anei owau wale no," wahi a ke kaikamahine, "ke poeleele aku nei."
                "Ua i mai kuu makuakane e hiki io mai no ia i anei, mamua o ka poeleele ana."
                "Pehea oe ina aole ia e hiki mai?"
                "E hiki mai ana no ia pela mai no."
                Koe iho la o Nele wale no ma ka halekula. Ke nee malie aku la ka manawa me ka lohi loa, ke iho aku la ka la ilalo, a ke hoomaka mai la ke ano poeleele. Hele aku la oia ma ka puka e nana i kona makua. Aka, aole ona ike ia aku ma ke ala ma kahi i aneane he hookahi mile mai ka puka aku o ka halekula. Ma ia wa no hoea mai ana he kanaka me ka lei-bipi maluna o kona kaa-holohau; he makamaka no ia no lakou mamua. "E aha ana oe maanei?" wahi ana ia Nele iaia i ike aku ai e ku ana ia ma ka puka.
                "E kali ana au i kuu makuakane," wahi ana.
                "Mamuli poeleele," wahi a ke kanaka; he pono e kau mai oe ma ke kaa a hiki aku i kuu wahi; aole pono ia oe e noho maanei a ao keia po."
                "Ua maopopo no e hoi mai ana kuu makua ia'u," wahi a Nele, "ua kauoha mai oia ia'u, e kali au iaia a hiki mai oia."
                Ua kokoke loa e poeleele, aka, aole nae i kuu iho, kaalo ana kona makuakane ma ka puka. Ua holo ikaika mai oia, nolaila, ua hele a auau kona lio i ka hou. Ua lohi loa oia a hala ka wa kupono ana i manao ai, nolaila ua haalele aku oia i kana hana ana me ka pau pono ole, i mea e hooko ai oia i kana olelo, e hiki mai oia i kana keiki mamua o ka poeleele ana.
                "Ua makau anei oe o hiki ole mai au e Nele?" wahi a kona makua; iaia e owili ana i kana keiki iloko o kekahi kapa hulu mahana.
                "Aole," ka pane a ke keiki aloha, "ua i mai oe e hiki mai ana oe; a ua hoomaopopo no au e hiki no ia'u e paulele aku ia oe."
                Nani ka maikai o keia! Ina e loaa ia kakou ia ano paulele i ko kakou Makua ma ka lani e like me ko Nele Pasana i kona makua ma ka honua nei, nani wale ka nui o ko kakou pomaikai!
                O ka makua o Nele, aole oia i hana i hookahi wahi hapahaneri o ka mea e pono ai kona keiki, e like me ko ka Makua Nui ma ka lani haawi ana mai i na mea he nui wale e pono ai kakou. Oia no ke Akua, "ka mea nana i hoike mai i ka heluna o na hoku, a kapa aku ia lakou ma na inoa." He pono ia kakou e paulele aku me ko kakou naau a pau, i na olelo a pau ana i hai mai ai. S. S. WORLD.
                Mahoe, e hai mai oe i ke kanawai elima.

MA KE AHA E LANAKILA'I.
HELU 2.

                Ua lanakila paha, ina aole, aole paha oia i lilo i kahunapule.
                He kahunapule maikai anei ia ke hiki ole ia a ke hoomalu pono i kona uhane, a uumi iho i kona huhu? Aole paha.
                A pane o Kale aole paha i loaa iaia ke kumu hoonaukiuki nui iaia i kona wa kamalii me ka'u i loaa iho nei.
                Heaha ia kumu? Ka, ua olelo mai kekahi keiki iloko o ke kula ua wahahee au, a ua hehena au i ka huhu, a hoopuupuu i ko'u lima, a makaukau au e kui aku iaia a hina. Pehea la e hiki ai ia'u ke uumi i ko'u inaina e noho me he keiki oluolu la?
                Nui na haumana hoohune mai, iniki mai, imoimo mai, a hoonaukiuki mai, ia'u e nana ana i ka'u buke Helunaau me ka imi i loaa na ninau paakiki. Lakou nae he poe molowa, imi ole, makemake ole e loaa, a keakea wale i ka poe makemake e loaa.
                Paila loa ko'u huhu ia lakou. Pehea la e kaomi ai ka baila ana?
                Aloha oe e mama, eia au la ke hoomakaukau nei e hele i ke kula. E loaa hou ana paha na olelo ino, a hana ino e ukiuki ai. Ma ke aha au e lanakila ai maluna o kuu enemi nui o ka huhu.
                Aole ma ka hoopuupuu ana i kou lima a kui aku a kulana ia, wahi a ka makua. He kaua bipi uwo ia. Aka e komo e oe iloko o kou keena malu a e pule ia Iesu e kokua ia oe i ke kiai ana i ka hoomalu ana i kou uhane, i ka uumi ana i ka huhu ke hoea mai na kumu e huhu ai.
                Ae pono ia, e hoao paha au, lanakila paha, lanakila ole paha.
                Hele o Kale e pule e mamua, a mahope holo kiki oia i ke kula. Ma ka hoomaka ana i ka hana, maikai no, holo pono, aohe mea hoonaukiuki; lilo o Kale i ka imi i na haina no na ninau Helukakau me ke kakau iho ma kona papa pohaku, a kokoke ka wa hoomaha iki lalau kekahi keiki kolohe i kana papa a holoi me ka welu i pulu i ka wai i kona mau haina a pau. Ke ala mai no ia o ka huhu iloko o ka naau o Kale a manao e nuku ino aku e like me kana hana mamua, a manao no ke keiki kolohe e kuiia ana no oia. A pehea, ua hooko anei o Kale i kona manao huhu? Aole, hoomanao oia i kana pule ma ke kakahiaka; eia hoi ia: "E Iesu e, he keiki hikiwawe o ka huhu au, ke hele nei au i ke kula, e kokua mai oe ia'u i keia la i ka uumi a pale aku i ka huhu. Amene." A ma ka hoomanao ana i keia pule, uumi no o Kale i kona huhu, a nana aku i ke keiki kolohe me ka mino aka; a haohao loa oia, ka, kuhi au a kui mai ana o Kale ia'u, aole ka, e nana mino aka mai ana no. Heaha keia ano hou ana o Kale?
                A noho iho la ke keiki kolohe ma ka aoao o Kale a kokua iaia i ke kakau hou ana i na haina i holoi koloheia. Pau ke kula hoi aku la o Kale a hai aku i kona makua i kona lanakila ana maluna o kona enemi o Huhuhikiwawe. Olioli oia i ka lohe ana ia lanakila, a olioli pu no hoi paha o Iesu me na anela ma ka lani.
                Ma ia hope mai lawe o Kale i moto nona i kela a i keia la, i ke kumu olelo maluna. "Maikai ke ahonui mamua o ka ikaika; a o ka mea i hoomalu i kona uhane mamua o ka mea hoopio i ke kulanakauhale."

KA WAKI A AL FRED KE ALII.

                Mai manao kuhihewa kakou he mea kahiko loa ka waki i mea kuhikuhi manawa; aole no. E like me ka hoomaopopo ana o kanaka Hwaii i ka manawa ma ka nana ana i ka la, pela no na kanaka ma na aina naauao i na kau i hala. Ina paa ole i na ao ua ane hiki ke hai pololei mai lakou i ka hora.
                Aole he waki i ka wa e ola ana o Alfred ke Alii o Enelani. He alii naauao, a ua iini nui oia e heluhelu a huli no hoi i na buke a pau, he kakaikahi wale no ia ia wa. Aole ikeia ke pai ana ia lakou, a o na palapala a pau a Alfred ua kakau maoli ia me ka peni ma ka pepa ano e, a no ke kakaikahi o ka poe ike i ka heluhelu, ane loaa ole ke kumu makaukau e ao aku iaia. Manao nae oia e hana i ka mea hiki iaia, a e hoolilo i ka hapakolu o kona manawa i ke ao ana, ka huli ana i keia mau buke; hookahi hapakolu i na oihana o kona aupuni, a o ke koena no ka hooluolu a hooikaika kino. No ka nui o kana mau hana, minamina ia i ka hoomaunauna i kauwahi iki o ka manawa. A pehea la e hiki ai iaia ke mahele pono i kona manawa no kela hana keia hana, oiai ua nele ia i ka waki?
                Penei kana i hana ai. Ua hoomakaukauia he kukui ihoiho, a ma ka hoopauia ana ma ka a ana ua akaka iaia ka holo o ka manawa. Ua penaia keia mau kukui me na apo ano e ua like ole kela a me keia ma ka wai hooluu, a me ka laula. Ma ka a ana o keia kukui ua maopopo iaia ka wa e haalele ai i kekahi hana no ka mea e, i ole hooloihi ma kekahi a hoopokole ma kekahi, a haalele loa paha i kekahi me ka hana ole ia no ka pau e o ka manawa.
                E na pokii, e makaala oukou i ole ai ka laula o na apo paani, lealea, i ko na apo huli palapala, o hemahema oukou. A o ai e oi ana ka maikai a me ka lehulehu o na palapala a oukou i ko na buke a Alfred, e like ole auanei ko oukou naauao me kona. W.