Ke Alaula, Volume VI, Number 11, 1 February 1872 — Page 42
42 KE ALAULA.
hewa ana?" Ae aku la oia. "Ae, e hiki no. Ua make oia nou, ua mana kona koko i ka holoi ana i ko mau hewa. Kona makemake nui ia oe a e lawe aku ia oe i ka lani e hoohui me na anela, me na kerubima malaila, a e haawi ia oe i lira maikai e hookani ai oe me lakou, a e kau ma ke poo i lei nani mae ole."
Komo liilii no ka malamalama iloko o ka naau o Paulo ma ka lohe pinepine i ko Suki heluhelu ana i ka Baibala. A mahope mai huli io mai oia ma ka pono, a lilo i haumana na Iesu, a paipai oia ia hai e huli pu mai me ia i ola pu lakou.
E na kaikamahine a me na keikikane mai Hawaii a Niihau e lawe oukou i keia moolelo o Suki Hao i kumu hoohalike no oukou. E aloha i ka poe pilikia, ilihune, elemakule, luwahine mai, naaupo; e hele e ike, e kokua, e hoonaauao a e hoohuli mai.
E Emelia, e hoopaanaau ia Mataio 25:34, 35, 36. E Ioane e hoopaa i keia mele:
Aloha i ka poe pololi,
Mehameha, naaupo,
Ilihune, kapa ole,
Paakiki, a huhu no,
Aa e launa e hoolaka,
Hanai i ka ai maikai,
Ao a mau i ka Baibala,
Pela lakou e huli mai.
KE KUENE ANO E.
HELU 2.
"Ea. Mr. Malamapono," wahi a ke kiai puka, "e aloha i keia wahine."
"Ae, ae, o Malamapono ko'u inoa, a pono ia'u e malama pono," wahi a ke kuene. "Minamina loa au, minamina io no au nou, e ka wahine, ke ike nei oe i na kanaka e hele nei me ka palaoa a lakou, aole loaa ia lakou ke alualu aku, a kaili i popo nau, a eia hou na pilikia no makou, a ohumu lakou no ka hoololi ana o kekahi mau mea i haawi ia, na kuka, me na koloka, pilikia auanei ina e hoonele i kekahi o keia poe kahiko e hoolako ia oe."
Aole au i kahaha no ke ano kanalua o ua wahine nei, no ka mea, e ku hamama ana no ka ipuka a ma kapuahi he nui na mea ono, a hiki loa ke ala iaia, a manao paha ia, ina he wahi hunahuna oia mau mea maikai no na kamalii, a pomaikai loa lakou.
"E ka wahine, e hele oe pela, ua pau loa, aole mea i koe," wahi a ke kuene. Me ke kaumaha o ka manao i naue aku la ia, e hahai ana na keiki me ka uwe ana.
Manao iho la au e holo aku a haawi i hapawalu nana, aka keakea mai kuu makamaka me ka olelo i ke kiai puka e kuhikuhi iaia i kona hale."
Huli oia ia'u me ka i ana, "aole o'u waiwai, aka, loaa paha i kekahi mau mea no keia poe ilihune. Pono ia kaua e hoi. E aloha a hoi maua; nani na koloka o keia makahiki."
"Ae, pela no," wahi a ke kuene, "na'u no i nana ia mau mea, he lole maikai a ikaika na koloka o'u. Aloha olua."
Kuhi au o Malamapono he kuene wale no ia na kona haku i hoouna mai i na mea i haawi ia. Ae, eia nae, iaia ka hooponopono ana, a ke manao nei au ua malama oia i ka hapa nui nona iho. Maliu paha i ka hoi ana mai o kona haku i keia makahiki ae, e kapa oia iaia ma ka lua o na inoa ona.
A owai ia? K. Kuhihewa Malamapono oia kona inoa okoa, aole nae oia i makemake i ka mua, a kakau oia i kona inoa, o K. Malamapono, i maopopo ole ia hai kona inoa oiaio. Manao kanaka ua kupono loa keia inoa, no kona olelo nui ana no kana mau hana manawalea; no ke aha kona lawe ole ana i kekahi mea uuku noloko o kona waiwai no keia mau mea ku i ka wa. Aole manao kekahi e make ia no ka pololi a me ka pilikia e ae, aka ua hiki paha iaia ke hoohapa mai i kekahi mau mea, na omole waina, na lei gula me na pihi daimana, a me na mea he nui no kona papa aina, oiai he kuene wale no ia.
O ka manao o K. Malamapono, aole he pono ke hoemi mai i na pili kino a me na mea lealea nona i mea e hoolako ai i ka poe nele, aka o na kala i koe ua hoolilo ma kahi ana i manao ai he pono, a hoomaopopo e no ia i ua mea ana i kokua ai; alaila ina hoea hou mai i kekahi mea e like me ka mea a kakou i ike ai, he malihini pololi &c, eia kona manao e hoonele ia Petero e hoolako ia Paulo; a i ole ia e hoonele no ia Paulo me ka nana ole i kona pilikia nui. Pela kona kii hou ana i ke kuka o Beni a haawi ia Toma, a i kahi wa hoi nele aku no ka makuwahine me na keiki, no ka pau e ana o na popo i wae ia no ka haawi ana aole nae i pau ka palaoa iloko o kona hale.
Ano e loa keia koene? wahi a'u, kapa pono ia o Kuhihewa; aole au i lohe no kekahi mea makaukau ole ma ka hooponopono e like me ia.
Aole anei? Ke hoomanao nei au i kekahi mau kuene i like no me ia, a e kala mai oe ia'u ina e hai aku au i ka oiaio; manao no au he hoahanau oe nona, ua ane like ma kahi mau mea. Owau e like ana me Mr. K. M. Mahea la ka like ana wahi a'u me ka ukiuki.
Aole anei i olelo mai ia'u i nehinei no kou hiki ole e kokua i ka misiona ma Maikonisia no ke ao ana i ka olelo maikai o Kristo, no ka haawi e ana i ka puu dala au i maa e haawi i keia misiona e kokua i na koa eha o Farani. Aole anei i pane aku oe ia Susi kuu kaikamahine i kona noi ana i hapaha no ke kula ma Fatuhiva, ua lilo kou hapaha e kuai i lilina no na koa eha ilihune.
Me ka ukiuki no, ua pane aku au iaia me ka i ana, aole anei he pilikia loa na koa no ka lilina ole? He oiaio, aole nae i makemake o Susi i hapaha, i mea hou aku ana i manao ai. Eia nae aole nui ko'u waiwai e like me kekahi poe, aole nui na kala e haawi manawalea aku, e pono ia'u e wae i na wahi mea kupono na'u e kokua, a eia hou, aole o'u kuene e like me Mr. K. M.
Aole anei? kuhi au o ka poe manaoio a pau he poe kuene lakou. Ua kahaha nui au no ka loaa pinepine ana i na Mr. K. M. iwaena o na kuene o ko kakou Haku aloha. He nui ka poe e i ana aole hiki ke haawi no ka hoouna ana i ka ke Akua olelo i na aina e, a e kokua i ka poe ilihune paha mawaena o kakou, no ka mea ua kokua i na koa pilikia ma na aina e. A no ke aha ke kokua ole ia laua i elua; no ke aha ke aumeume ana i ke koloka o Poli e haawi ia Beke e haukeke nei, a i ole ia e waiho no o Beke e haukeke me ke anu, aole he uhi mehana kona oiai ua loaa no ia Poli.
Ua manao ia e hana pololei ana ke kuene, a oiai he poe hoahanau kakou, aole anei he pono e malama pono, a hana me ka noonoo, alaila ina kahea ia ia kakou e kokua i kekahi mea ku i ka wa, he luakini, he kula, a heaha la, ua makaukau no e kokua ma na hana mau a e haawi no hoi mai loko o na waiwai i wae ia no kakou iho no ia mau mea.
Aole ikaika kakou ma ka oihana kuene, haule ino no au i kahi wa. W.
1 He keiki au, he liilii e,
Ua maa nae i ka wahahee;
Ua wahahee no kuu mama;
Ua wahahee hoi no kuu papa.
2 Ua lohe au he lua no,
He lua ahi ma ka po,
No na keiki wahahee
Owau nei la, auwe! auwe!
3 He keiki au, he liilii e,
Ua maa nae i ka wahahee
E pule no'u i ole au
E haule i ke ahi mau.
HAHAU ANO E BILA.
He wahi amara, ua hahao i kona hao iloko o ke kapuahi; puhi oia me ka upa nui, a enaena loa i ka wela. Unuhi oia i ka hao wela a kau ma ke kua hao a kena aku i kana keiki ia Bila, "e wiki oe e Bila i ka hahau, o malili a pono ole."
Ua ike oukou ka poe i hele i ka hale amala, aia a wela loa ka hao, ua waliwali a hiki ke hahau a hooloihi ae, a hoopalahalaha ae, a pelu ae, a pelu hou ae, a hoa i na puka, a hana i ka hao e like me ka makemake o ka amara. Aka ina maalili ka hao, ua oolea iho, ua paakiki iho la, a hiki ole ke hana, ke pelu, ke hooloihi, &c.
Ma ka hoopili ana ua like ka naau o na kamalii liilii me ka hao i hoowela ia a wela loa. Ua waliwali ia, ua palupalu a hiki ke hoohuli wale i o, a i o, i ka pono, a i ka hewa, i ka naauao, a i ka naaupo, i ke aloha a i ka enemi, i ke akahai, i ka hoolohe a i ka hookuli, i ke ola a i ka make.
Eia ka wa hahau, ka wa kamalii; eia ka wa maikai e ae ai, e hoohuli ai ma ka pono. E hahau ano, oiai ua wela ka hao. E hooloihi, e hoopalahalaha, e pelu ma ka pono, e pelu ma ka maikai, aole ma ka make.
Mai hoopanee, mai kali a nui ae, a oo ae, alaila hahau, hiki ole paha ke hoohuli, ke hoano hou, no ka maalili a oolea a paakiki loa.
E na pokii, na kamalii hele kula Sabati, ano ka manawa e huli ai, ano ka manawa e imi ai i ke Kahuhipa Maikai. Mai kali a nui ae, o maalili e ka hao, a paakiki hoi ka naau.