Ke Alaula, Volume VI, Number 10, 1 January 1872 — Page 40
40 KE ALAULA.
ANO NO.
Leo: "RIGHT AWAY."--Fresh Laurels.
He-le ae ia Ie-su a-no no, a-no no. He-a ko-na le-o ia ou-kou. Na ke Ka-hu-hi-pa E apo a hoo-ki-pa. He-le ae ia Ie-su ano no, a-no no He-le ae ia Ie-su a-no no.
2 Pule ae ia Iesu ano no, ano no;
Pule Iaia i na la a pau;
Pule e hoola
I ola mau oukou la,
Pule ae ia Iesu ano no.
3 Malama ia Iesu ano no, ano no;
Mau no kona hea ia oukou,
Lohe i kona leo
I ka wa opio;
Malama ia Iesu ano no, ano no,
Malama ia Iesu ano no.
4 Mele ae ia Iesu ano no, ano no,
Na pokii uuku, mele pu;
Mele a hoonani,
I ka Haku lani;
Mele ae ia Iesu ano no, ano no,
Mele ae ia Iesu ano no.
5 Lilo ae no Iesu ano no, ano no,
Lilo ma ka makahiki hou
I haumana nana
Nona mau ka hana;
Lilo ae no Iesu ano no, ano no
Ano ma ka makahiki hou.
KE KUENE ANO E.
HELU 1.
I na makahiki i kaa hope ae nei ua hele au ma kahi kuaaina i ka la Karikimasa (Christmas) e ike i na makamaka o'u. Aole nui na mea lealea i hanaia ma ia kauhale uuku i ka wa hooilo, a kena mai na hoahanau o'u e hele e makaikai i kekahi mala laau nani e kokoke ana ma ia wahi, a ina makemake au e hele no lakou e hoikeike ia'u i ka hale alii malaila, me ka haawi makahiki ana i na makana no ka poe ilihune ma ia la ae; no ka mea, wahi a lakou o ke keonimana ka ona nona keia hale he kanaka waiwai, a manawalea no hoi.
Ae koke no au, a i kakahiaka ua hele makou; emoole no a hiki makou i kekahi hale maikai, kuonoono e ku hamama ana ka ipuka, a o na alapii ua paapu i ka poe ilihune.
Ma ka ipuka e ku ana he kanaka loloa, puipui, me ka helehelena oluolu; mahope ona he mau paahana e paa ana i na puolo lole mehana, na hinai palaoa me ka i-a, a maloko loa he ahi maikai e lapalapa ana, e hoomahana i ka ea anuanu oia la o Dekemaba.
E ku ana ke kiai puka a me ka mea malama i ka mala pua, ma na aoao o ke alapii e hooponopono. I ka peahi ana kekahi paahana ua hele nui mai na elemakule ilihune; a ua haawi ke kanaka ma ka puka i kuka manoanoa no kekahi, i kihei huluhulu no kekahi, a i kekahi he kapa apana, a pela aku. Alaila ua ku oia ma kapa alanui a haawi i na mea ai.
Hoea mai na luwahine e kii ana i na koloka a me na lole mehana. O aku ka mea mua e lalau i ke koloka ulaula, mehana, hoo kekahi i wahi apana pepa ma ka lima o ke keonimana, kali iho oia e heluhelu, no ke kahunapule keia, a ke noi mai nei oia ia'u, mai hoonele ia Beke Ioane i ke koloka. "Ae, owau no o Beke," wahi a ka luwahine i lawe mai i ka palapala.
Ke i mai nei oia ua malama maikai oe iaia i kou wa ui, nolaila makemake oia e uku pono ia, aole hiki ia'u ke hoole i kona ao ana nolaila eia kau ; a kii hou ke keonimana i ke koloka a Poli i lalau me kona lima minomino a haalulu, a haawi ia Beke. Ano e no hoi ka ia nei hooponopono ana, wahi a'u i ko'u makamaka.
Oia ke kuene, ka mea e malama ana i ka waiwai a kona Haku, a ua maopopo loa, kona ano e. Pehea nona ponoi anei keia mau makana?
Aole no, he kuene wale iho no ia, aka o ka wae ana a me ka haawi ana, ua waiho no iaia. Eia hou, ua waihoia iaia he puu dala nui, a iaia no ka mana e hoolilo ai ia dala ma kahi ana i manao ai he pono. O kekahi no ka manawalea a o ke koena nona iho. Paulele nui kona Haku iaia. Ea, e nana, aia ke wehe nei i ke kuka ma ke kua o Beni rumatika, a ke haawi nei ia Toma ka mea hookani bele. Pilikia like no laua. Hamau, o lohe oia ia kaua; ea, ke hali ia mai nei ka ai.
I ko maua kamailio ana ua waiho ia mai elua hinai nunui imua o ke kuene, a hoomaka koke oia i ka haawi ana i na popo palaoa, a me na iwi bipi. Nui ka hoomaikai ana o kanaka iaia, ohumu malu nae kekahi no ka lilo ana o na lole o lakou.
A pau keia haawi ana hoea mai he malihini ilihune me na keiki elua ana. He hapa wale no ka aahu o laua. Noi aku oia i wahi popo palaoa hookahi me ka i ana he loihi ke ala ana i hele mai ai, a e naue aku ana no e hui me kana kane e hana ana ma ke alanui hou, he umi paha mile ma ia wahi aku. Uwe na keiki no ka pololi. Aole i pau.
HAINA NO NA NINAU MA DEKEMABA.
1—Elisai I Na Lii 19:19, 21.
2—Elia ma ia pauku no. He hoailona no Elisai lilo ana i kaula i pani no Elia.
3—Elia, II Na Lii 2:11.
4—Elisai, II Na Lii 2:12.
5—Maheleia ka wai Ioredane. II Na Lii 2:13.
6—He mea make, a he palaoa ka mea e pau ai. II Na Lii 4:40, 41.
7—Hoolanaia ke koi lipi. II Na Lii 6:5, 7.
8—42 keiki, he kuamuamu ko lakou hewa. II Na Lii 2:23, 24.
NA NINAU BAIBALA HOU NO IANUARI 1872.
1—Owai ke kanaka i kanuia ma ke kukulu akau o ka puu o Gaaza? Iosua 24:29, 30.
2—Mahea ke kanu ana o Eleazara, ke keiki a Aarona? Iosua 21:33.
2—Owai ka inoa o ke kaikamahine i lawe i ke kapa inoino a halii maluna o kahi pohaku nui? A heaha kana hana? II Samuela 21:10.
4—Owai ka ona o na kamelo 3000? Ioba 1:3.
5—Owai kai ike i kana kane (mahope mai) e holo ana ma ke kamelo? Kinohi 24:64.
6—Heaha hoi kana hana i na kamelo o ke kauwa? Kinohi 24:19, 20.
7—Owai kai kuai ia i kekahi huakai kamelo? Kinohi 37:25, 28.
8—E komo e ke kamelo mahea? Mamua o ke aha? Mataio 10:25.
HE KEIKI ME KA LUNAIKEHALA.
He keiki me ka lunaikehala, heaha ia? Aole anei he lunaikehala ko na keiki a pau? He oiaio no pela. Aka, ua hana kekahi poe keiki me he mea la aole o lakou lunaikehala. Aole lakou hoolohe i ka mea a ka lunaikehala e olelo ai. E hai aku au ia oukou i kekahi keiki i hoo ia mai he lunaikehala kona, ma kana hana.
O Kimo kona inoa. Oiai oia e paani ana me kona kaikuahine i kekahi la noi aku la oia iaia e hana i kekahi mea, me ka i aku "ina oe e hana i keia e haawi au ia oe i tausani dala."
He oiaio he olelo naaupo kela, a i ka hapa nui o na keiki he mea liilii paha ia, aole e manao hou ia. Aka, ua hnawanawana mai ka lunaikehala o keia wahi keiki, "ua olelo oe i ka mea hiki ole ia oe ke hooko."
Uwe iho la oia a holo aku la i kona makuwahine, a i aku la, "e mama, ua olelo au i kuu kaikuahine e haawi au iaia, he tausani dala, aka, aole au tausani dala e haawi ai."
Ma keia olelo ana ua maopopo ua hoolohe o Kimo i kona lunaikehala ma na mea liilii. He pono ia.
E na keiki hoolohe okou i ka leo liilii maikai iloko o oukou. Ua pane mai ke Akua iloko o kela leo liilii maikai iloko o oukou. E hoolohe oukou; a me kekahi leo e ae o ke Akua iloko o ka Baibala, e hoolohe oukou, a e pono oukou maanei, a e pomaikai oukou mahope.
S. S. ADVOCATE.
Ma ke aha e hoohalikeia ai kamalii me ke kamelo? Ma ka hoomanawanui i ka lawe ana i ka ukana me ka hoohalahala ole.
"E poino ke kanaka ke hoohuli ae i ka makapo iwaho o ke alanui." Kanawailua 27:18.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA, Luna Hoopuka.