Ke Alaula, Volume VI, Number 10, 1 Ianuali 1872 — Page 37

KE ALAULA.
BUKE VI. HONOLULU, IANUARI, 1872. HELU 10

KA MAKAHIKI HOU.

E KA POE HELUHELU "ALAULA;" Hape Nu-ia oukou:
                Heaha ke ano o Hape Nu-ia? Nu-ia, makahiki hou; hape, pomaikai; ke ano a pau, e hoopomaikaiia oukou ma keia la mua o ka makahiki hou, a e mau hoi ka pomaikai, a pau ka makahiki. Ka makahiki 71 ua pau ia, ua hala aku la, aole e hoea hou mai ana, aole e hoopuka hou ia ana kona helu. O ka helu 1872 kona pani.
                Ke komo nei kakou iloko o ka makahiki hou oia hoi o 1872. Ma ke aha ke komo ana? Ma ka lokomaikai o ke Akua ma o Iesu la. No ke aha ke komo ana? No ka makemake no o ke Akua, a no ka hana hoi i kona makemake. Heaha ko ke Akua makemake ia oukou e na pokii? E ala oukou ma keia la mua o ka makahiki hou, a e haawi aku ia oukou iho i ke Akua, a e hoomaka koke e malama Iaia, a e hoohiki e hoomau i ka malama Iaia mai keia wa aku a hiki i ka hopena. E hoolilo oukou i keia makahiki i makahiki ano hou. E ano hou, e ano maikai, e ano noho malie oukou, e ano hooikaika oukou ma ka imi ana i ka naauao, ma ka heluhelu a imi a hoopaa a malama i na mea maikai maloko o ke ALAULA, a iloko o na kula Sabati, a iloko o ka Baibala. O ka poe lawe ole i ke ALAULA, e wikiwiki e lawe; e noi, a koi, a koi hou i ka makua e hoolako ia oukou i ke ALAULA i like oukou me na keiki e lawe nei; i ole oukou e hilahila no ke ALAULA ole a loaa ole na mea maikai i pai mau ia maloko.
                E huli oukou i na haina no na ninau i pai ia. A e aa e palapala mai ia'u i kekahi mau mea hou maikai kupono ke paiia iloko o ke ALAULA.
                E hoolana i ka manao o ka Lunahooponopono, ma ka heluhelu mau ana i ke ALAULA, a ma ke kokua ana iaia e hoopiha ia i ka waiwai momona loa.

HE MELE HAPE NU-IA.

                                Aloha oe ka Malihini!
                                Mai hea mai kou hele mai?
                                Me ke aha kou puka 'na?
                                Me na pomaikai anei?
                                Komo mai ke aloha,
                                Me ka Hape Nu-ia no,
                                Hape Nu-ia hoohauoli,
                                Hape Nu-ia ia makou.
                                Komo mai me na makana,
                                Na makana maikai ou,
                                Aole make i na mea ino,
                                I ke anu, i ka hau,
                                I ka ua, ka makani,
                                Ka malie, ka maikai;
                                Pela makou e olioli
                                Ma ka Hape Nu-ia nei.

E LOAA AUANEI KO OUKOU HEWA.

                E na pokii, na keiki Hawaii. E makau oukou i ka hana hewa ma kahi akea, a ma kahi malu.
                Ma keia mau la ua kukuluia ka aha hookolokolo kiure ma Waimea nei. He lunakanawai kiekie kai noho ma ka noho lunakanawai, a he lunakanawai kaapuni kai noho pu me ia. He mau kiure he 12 i hoonohoia ma ka noho kiure e hoolohe i na hoike a me na loio ma na aoao elua, ka aoao hoopii a me ka aoao i hoopiia.