Ke Alaula, Volume VI, Number 9, 1 December 1871 — Page 33

KE ALAULA.
BUKE VI. HONOLULU, DEKEMABA, 1871. HELU 9.

HOOKO ANA O EDA I KANA OLELO HOOHIKI.
HELU 3.

                Haalele kakou ia Eda e hoomakaukau ana e moe. Ua hooluoluia oia e kona kupunawahine, a ane pau ke kanalua ana no ka po no o ka hoihoi aku i ke pine.
                (Mere, he pine, aha keia?) Aka aole pau ke kaumaha no na huaolelo a kona mama. (Lioi, heaha ia mau hua olelo?) Aohe hiamoe koke, e noonoo ana no ma keia mau huaolelo. Aka, aole liuliu loa apauhia oia i ka hiamoe, a moeuhane iho la no ke pine, a no na huaolelo a kona mama, a kona kupunawahine, a no Rebeka no hoi nona mai ke pine, a ao ae. Ala oia ma ke kakahiaka nui, a i ka puka ana iwaho o kona keenamoe, halawai pu kona mama me ia, a ninau koke; "E Eda, ua manao hou anei oe no ka hoihoi aku i ke pine, a ua paa no kou manao e hoihoi aku no?"
                "Ae, ua paa loa ko'u manao e hoihoi aku i ke pine me ka manao ole i ko Rebeka oluolu a me ka akaaka henehene mai."
                "Pono ia," wahi a kona mama. "Ua pono loa oe, a pololei; ua hewa au, ka makua, mai lilo au i makua hoolalau i ka'u keiki ma ke kapa ana i ke pine he mea liilii loa ia, he mea ole ke hoihoi, a hoihoi ole, ke noi aku a loaa, a ae e hoihoi aku. Pono no ke hooko i na hoohiki liilii; e hana no e like me ka ae ana e hana. E ku oe, a hele a hoihoi aku i ke pine liilii kekee ia Rebeka, a noho ilaila, ke oluolu oia, a paani pu me kana mau keiki, a awakea e hoi pono mai."
                Loli ka manao, ka olelo a ka makua. Ua noonoo oia a ike ua hewa, e alakai hewa ana i kana keiki, nolaila mihi koke oia; hoahewa oia iaia iho, a hoapono i ke keiki. Ka pono no ia o na makua, e mihi ke ike e hoolalau ana i na keiki, a e ao pono aku.
                A pau ka aina kakahiaka, kau o Eda i kona papale ma ke poo, a ku a holo mama me ua pine liilii nei e pili ana i kona lole, a hiki i ka hale o Rebeka; kikeke oia ma ka puka, a weheia, e ku ana o Rebeka, a olelo, "O oe no ka e Eda liilii; heaha kau ma ke kakahiaka nui?" Pane aku o Eda, "Owau no, a eia ka pine a'u i noi aku ia oe, me ka ae e hoihoi mai ia i keia kakahiaka. Ua hana au e like me ko'u hoohiki."
                A pehea, ua akaaka henehene mai anei o Rebeka iaia? Aole, aole; mahalo loa oia iaia, a honi maikai iaia, a olelo mai, "Maikai oe, e kuu keiki, pololei kau hoohiki a oiaio; ua hooko pono mai; e noho oe, a paani pu me na keiki a'u, a awakea, alaila e hoi aku oe i kou mama." A pela no oia i hana'i a hoi me ka naau mama, a olioli, a noho pu me ka makua, a hoomau no mahope iho i ka hooko ana i kana mau olelo hoohiki a pau.
                E a'u mau pokii, na keiki, na moopuna, e hoohalike oukou me Eda, e hooko no i na olelo a oukou e hoohiki ai.
                E hoihoi, e LUkia i kela pine, kela kuikele, au i lawe wale ai.
                E Ioane, he pahi-olo, he wili-puaa, aia me oe, ua ae oe e hoihoi. E wikiwiki e hoihoi aku.

SUKI HAO.

                E hoolohe oukou a na'u e hai aku i kekahi kaao maikai no kekahi kaikamahine aloha. O Suki kona inoa, a o Hao ka inoa o kona makuakane, nolaila o Suki Hao kona inoa a pau.
                E ku ana ma kahi kokoke he wahi hale liilii pepepe me he lanai la, no kekahi elemakule i kapaia o Paulo Olonana (Old Paul). Ua ku kaawale aku ka hale mai ke alanui aku ma kahi kula i waiho wale ia a nahelehele. Ua puni ia i ka pa pohaku kalakala. He mau puka aniani liilii eha ma ia halc, ekolu nae i hoopaaia e ka papa. Hookahi no puka komo. Ma ka nana aku he neoneo a mehameha wale ia wahi. Ane kupono ole i ke kanaka ke noho malaila.
                Malaila nae i noho ai o Paulo a nui na makahiki. He kanaka kahiko ia, a ilihune loa. Ma ke olo a kaka wahie ana, a ma na hana mama e ae i loaa'i kekahi hapa o kona ola. Mahea la i loaa'i ke koena o kona ola? Loaa ole paha, he ola hapa, he pololi, he pilikia kona.
                Noho mehameha oia, aole make e launa me kanaka, aole make e kamailio. Me he la, he helehelena oolea, nunuha, mumule kona. Iaia i hele ai ma ke alanui, nuku na keiki kolohe iaia, a hailuku aku me na pohaku. Huhu loa oia, a ala mai a lele maluna o lakou, me ka hoopuka aku i na huaolelo ino a hooweliweli wale.
                Ike pinepine o Suki i ua Paulo Olomana nei. Makau oia iaia, a makemake ole e halawai pu; aka, eha loa kona naau ma ka nana aku i na keiki e hana ino ana iaia. Ma kekahi ahiahi maalo ae oia ma kona puka aniani, a olelo ae ia "E mama, aia, ke hele la o Paulo aku! Poino wale! heaha la ka pomaikai o kona ola ana? Nele i ka makamaka ole! Aohe mea nana e aloha a malama iaia."

                "He mea aloha no iaia mamua," wahi a kona mama, "a akaka lea hoi ia'u, he mea aloha iaia ano; ua make Iesu no Paulo Olomana, me ia i make ai no kaua."

                Noho malie o Suki, aole i pane aku. Ua komo ka noonoo iloko ona, a ua ano e o Paulo Olomana ma kona manao. Nalu iho la oia, ua ike anei o Paulo i keia mea, i ko Iesu make ana nona? a he manao anei kona ma ia mea?

                A i ke kau ana mai o ka molehulehu alualu oia ma kona manao ia Paulo a hiki i kona hale mehameha, a oli ole. A ninau oia iaia iho, pela anei kona noho mehameha ana a loihi loa, me ke aloha ole ia, me ka nele i na mea a pau e olioli ai? Hu ke aloha iloko o kona naau, a makemake nui oia e hoike aku iaia i ke aloha o Iesu. Ina loaa ia aloha iaia he lama ia ma kona hale mehameha, a he mea e makaukau ai oia no ka home ma ka lani.

                Lilo oia ma ka noonoo nui i keia mea, a, ala mai ka pule nona penei: "E ka Haku, e ao oe i keia elemakule ilihune e ike a e aloha aku ia oe no ka pono o Iesu. Amene."

                Ua akaka no ia'u aole o ka pule wale no ka mea e pomaikai ai ka poe pilikia e like me keia elemakule; aka, o ka hana kekahi mea e pono ai. Aka,—alia, ua lawa no keia wa.

KA BELE KULA SABATI.

                Hookahi kani ana o ko makou bele kula Sabati; he umi paha minute ke kani ana, a i ka pau ana, ua hoomaka koke ia na hana o ke kula.

                Ma ko'u nana ana, he mau kamalii maa i ke komo hope ana. Ina ma na la noa, ua komo no lakou i ka wa kupono; aka, i ka la Sabati, he lolohi lakou. No ke aha keia? Owai ka mea e hai mai i ke kumu? He kuhihewa paha ia poe kamalii i ke kumu maoli o ke kani ana o ka hele kula Sabati?

                E nana i na ohana elua; e komo ae i keia hale e kokoke ana i ka hale kula. Ka la Sabati keia, a ke kani nei ka bele no ke kula Sabati. E nana i na keiki o keia ohana! Ekolu o lakou. Awakea loa o Elene i ke ala ana, a aia ke noho nei i ka aina kakahiaka. Ala koke ae ia me ka i ana, "aia ka bele! e hoomakaukau au no ke kula Sabati;" aole holoi ka kona maka, aole kahi ia kona lauoho, aole i makaukau kona kamaa, a o na lipine hoi o kona papale i hemo i nehinei,