Ke Alaula, Volume VI, Number 6, 1 September 1871 — Page 24
24 KE ALAULA.
E NEE I KE KULA SABATI.
Leo: "THE CHILDREN ARE COMING."--Songs of Gladness.
E nee i ke ku-la Sa-ba-ti nei, Me ka o-li e nau-we pu ai; He ha-na maikai ma ka la lae-lae. Me ko-o-nei mau ui mae-mae. nau-we pu ai; E nee i ke kula Sa-ba-ti nei.
2 Mai uka a kai la
A aloha a oli pu no,
E olu na maka a akahai,
A hui e pule, a hoomaikai,
A ku a memele lakou.
3 Pomaikai na keiki ke ao maikai
Ma na kula, na halawai pu
I na olelo e ola mau ai,
A malama pono, a huli mai,
A lilo lakou no Iesu.
4 E na pokii nei, noho maikai e
Ma na kula, na wahi a pau;
Hoonani ia Iesu a hahai ae,
A iaia oukou la e hele nae,
A kikoo imua a mau.
E MALAMA I NA MINUTE KAAWALE.
Ua hele kekahi keikikane kino wiwi, loloa i ka ipuka o ka hale o ke kahu o kekahi kula kaulana, me ka manao e ike iaia. I kona kikeke ana hoea mai ke kaikamahine kokua ma ka hana o ka hale; nana oi i ka lole inoino o ua keiki nei, me ka manao paha he keiki makilo ia, a ua i aku iaia e hele i ka hale kuke. "I ai paha nau, a ua hiki no ia'u ke haawi ia oe me ka hoopilikia ole i ke kahu," wahi a ke kaikamahine.
"Aole no au e hoole i ka ai, aka, ke makemake nei au e halawai me Mr. B---- ke hiki iaia ke hui me au."
"I wahi lole kahiko nau, oia paha kau e makemake nei?" wahi a ke kaikamahine, me ka nana ana i na lole o ke keiki i poho nui ia. "Aole paha ona lole i koe; nui na lole i haawi waleia aku mamua aku nei." A me ka hoolohe ole i ka ke keiki i mea mai ai, ua hoi aku kana hana.
A pau ka paloa i ka ai ia, ua i hou aku ua keiki nei i ke kaikamahine, "Hiki anei ia'u e ike ia Mr. B.?"
"Aia no ma kona keena kakau; a makemake no ia i ka mehameha kahi wa; eia nae ke ikaika loa nei kou manao, e hoopilikia paha au iaia," wahi ana me ke ukiuki. Ma kona manao ua makehewa paha e komo aku ke keiki kohuole e like me ia e ike i kona haku, aka ua kahea iaia e hele pu me ia.
Wehe ae la ia i ka puka o ke keena noho o ua kahu kula nei, me ka i ana iaia, "Eia kekahi mea i makemake ino e ike ia oe, a ua hookomo mai nei au iaia."
Aole maopopo na olelo mua o kahi keiki, a me ka mea ana i hahai aku iaia, eia nae, aole liuliu a waiho ke kahu i kona buke heluhelu, a ua lalau i mau palapala Helene e hoike i keia malihini. He loihi no ka hoike ana. He makaukau loa ke keiki ma na ninau a pau a ke kumu i ninau iaia.
"Kupanaha no kei !" wahi a ke kahu. "Makaukau io no ka! me ka nana ana i ke keiki mai luna a ilalo; "E ke keiki, mahea ka loaa ana o ka nui o kou ike, i keia naauao hohonu?"
"Ma na minute kaawale o'u," wahi ana.
Eia kekahi keiki ilihune, e hana oolea ana i kela la keia la, he uuku loa ka manawa kula, a eia ka, ua aneane makaukau e komo ma ke kula nui, a no kona malama pono ana i na minute kaawale.
He oiaio, aole anei o na minute kaawale na hunahuna gula o ka manawa? He makamae loa. Pehea ka hoike ana no na minute kaawale ou? E nana a hoomaopopo. Ua ikeia ma ka makaukau o keia keiki hookahi ma ka malama ana ia mau minute.
He nui wale na keiki ma na halepaahao, ma na moku, ma na hale inu bia, ke ninauia no ka hoomaka ana o ko lakou lalau hele ana, e i mai paha no ka malama ole i na minute kaawale.
I kuu wa kaawale ua pili au no na mabala. I kuu manawa kaawale ua hoomaka au e puhi baka, a inu i na wai ona. Ina minute kaawale ka hooakoakoa ana i na hoa kupono ole no'u.
E malama i na minute kaawale. Ia ka puni o ka hoowalewale ia oukou. I ka wa noho wale nanea e komo mai ana iloko o kou naau na manao ino. Oia na kowa kahi o Satana i komo nui ai. Ma ka naau kona pee ana, a hoomakaukau i na hana kolohe a pau! E makaala! e malama pono i na hunahuna makamae o ka manawa.
O ke Keiki lapuwale, ke kaumaha ia o kona makuakane, he mea awahia hoi i ka mea nana i hanau.
E hoolohe i kou makuakane ka mea nana mai oe.
Mai hoowahawaha i ka luwahine ana o kou makuwahine.
KAHI E LOAA AI NA HAINA O NA NINAU I PAIIA MA AUGATE.
1 Nana ma Pukaana 2:6-2; oIHANA 9:23-25, 3-8; 2 Lii 4:18-37, 9; Luka 18:9-14.
NA NINAU BAI BALA HOU.
1 —Owai ka puka no na hipa?
2—Owai ka poe aihue me ka powa?
3—E loaa ke aha i ka poe komo ma ka puka?
4--Owai kekahi alii nui he kahuhipa oia i kona wa kamalii?
5—Ua paanau anei kekahi mea a kekahi kahuhipa i hana ai me kona maa?
6—Mahea kela pauku no kekahi kahuhipa e hiipoi ana i na keikihipa ma kona poli?
7—Nawai keia hua "e hanai i na keikihipa?"
8--O wai ke kahuhipa maikai? a heaha kana olelo no kana mau hipa?
NA KII PILALI.
Aia ma Ladana kekahi hale nui i hoopihaia i na kii pilali o na kanaka i make, a o ka poe e ola ona hoi, a o na mea he nui wale. Ua like loa na kii ma ka nana aku me ka poe e ola ana. Eia keia kii o Kamehameha III. Ua hanaia no loko mai o ka pilali, pilali nalo meli paha. Ua like ke kino kii me ke kino maoli, ua pena ia ka helehelena a like me ka helehelena kanaka; he mau maka no, he lauoho, he papale, he lole, a pela aku, e like loa me ke kanaka Kamehameha III keia. A pela no ka nui o na kii, ua paiia ka inoa maluna iho.
Ua komo kekahi malihini iloko o ua hale kii nei i kekahi la e makaikai, Iaia e noho ana nee mai kekahi kaikamahine a haka pono ka maka maluna o ka malihini mai ke poo a i ka wawae me he mea e mahalo ana iaia. Nana pono ka maka o ka malihini i ua kaikamahine nei me ka akaaka, ka holo puiwa no ia o ke kaikamahine mai ka malihini aku.
Eia ka he kii pilali keia kaikamahine; ua hanaia kekahi mea e hooholo ai iaia io ia nei. He kaikamahine hookamani ka, aole manao maloko ona. Meia paha kekahi mau kaikamahine a keikikane hoi e holo nei i ke kula maoli, ke kula Sabati; he mau keiki kii pilali, aohe manao maloko. Ua hele wale mai no i ke kula, na ka bele, na ka makau, na ka lealea paha i kono a alakai mai, aole na ka makemake e loaa ka ike, ka pono, ke ola. Nana paha i ka palapala me ka maka pilali nae, aole me ka maka uhane a olioli. Hoopaa pauku a himeni hoi he leo kani wale iho no aole he manao iloko o ka naau. Pela hoi ke pule, he pule waha aole pule ka naau. Makemake anei oukou e o'u mau pokii e hoohalikeia me na kii pilali? A hoohalikeia ma ka noho wale a manao ole ana, oluolu anei ke Akua ia oukou, a hoopai ole? Na ke kanaka i hana na keiki kii pilali, a hewa ole, a hoopai ole ia lakou no ka manao ole, aole o lakou uhane. Aka na ke Akua oukou i hana he kino kanaka, he uhane, a hiki ia oukou ke manao a hana me ka noonoo i ke Akua, a ina aole oukou manao i ke Akua, a i ka pono, i ke ola, e hoopaiia ana mahope.
E ala, e noonoo, e manao i ke Akua, mai noho a hoohalike me na keiki pilali.