Ke Alaula, Volume VI, Number 6, 1 September 1871 — Page 23

KE ALAULA. 23

O LILIA OHUMU E MIHI ANA.
HELU 2.

                A hele pu aku lakou, Lilia ohumu, Naki aloha, a o Rahela liilii e paa ana i ka lima o Naki. Ua komo iki ka manao a me ke aloha iloko o Lilia. Aole nae i pau ka manao he mea luhi a luuluu na keiki liilii, e nalu ana no i ka pomaikai o ka poe kaawale, aole pilikia i ka malama, i ke kiai ana i na keiki liilii, a hiki no ke hele io ia nei me ka mama, me ka manao ole ia hai.
                A komo lakou iloko o ka hale hoike, he luakini nui ka, ua hoomakaukau ia he auwai loihi a laula, kahi e pii ai na haumana e hoike, himeni, a haiolelo.
                Nana mai la o Lilia ia Naki laua me Rahela liilii e pili ana iaia, oluolu a olioli ka maka, lealea o Rahela i ka nana ana i na lole maikai, na ribine o na papale, na lei nani e kau ana ma na ai. Olioli i ka lohe i na himeni maikai, a i ka ike ana i na hana hoohauoli. Noho malie hoi aole walaau, aole holoholo io ia nei, a hana kolohe; hookahi no uwe ana no ka loaa ole o kahi mea oho, a loaa ia ka pau no ia o ka uwe. Mahuahua ka mihi a me ke aloha o Lilia. "Ua hewa io wau i ka ohumu a olelo ukiuki no Rahela, kuu kaikaina uuku hina wale ke alaka ole ia."
                Ike aku o Naki e noonoo mihi ana o Lilia; a i ko laua hoi ana a ane kaawale aku, olelo o Naki ia Lilia, penei: "E Lilia, e manao nui oe i kou kaikaina, me ka malama pono iaia. He wahi luhi a luuluu iki paha kou no ka malama ana, aka he mea ole ia i ka hoonele loa ia a hooneoneoia ka naau e like me ko'u. Nui kuu aloha i kuu kaikaina. Nui kuu iini e hoi hou mai oia. Ina e hoi hou mai nani kuu olioli me ka malama pona loa iaia."
                Ea ia po moe iho la o Rahela a pauhia i ka hiamoe no ka luhi loa i ka hele i ka hoike. Kolo malie o Lilia i kona wahi moe, a kukuli iho ma ka aoao o Rahela a nana i kona maka oluolu, a honi pinepine, a hoohelelei i na waimaka he nui wale maluna iho ona, a mihi nui me ka olelo iloko iho ona, aole au e ohumu hou a manao he mea luhi, he mea luuluu oe e kuu kaikaina liilii. E kuu makua ma ka lani, e kala mai oe i kuu hewa nui, i ko'u aloha ole i kuu kaikaina nei, kuu kaikaina i alohaia.
                A no ka nui o ka uwe a me ka honi ana, ala mai o Rahela a nana a apo i kona kaikuaana ma ka ai, a hawanawana aku, ke aloha mai nei no oe ia'u e Lilia, olioli au.
                A lilo hou i ka hiamoe. A hiamoe pu hoi o Lilia me ka naau mama no ka mihi ana.
                Ea, e na kaikuana, na keiki nui, e aloha aku i na kaikaina, i na keiki liilii. Mai hana ino aku, mai holo a haalele wale, mai hoonaukiuki, e malama pono.

                I KA LUNAHOOPONOPONO O KE ALAULA; Aloha oe: Ke hooili hou aku nei ke kula Sabati o Kawela i ka ninau imua o na kula Sabati a pau mai Hawaii o Keawe a Kauai o Manokalanipo, a na lakou no e hoike mai i ka haina o ka ninau i pau ka nune ana o na haumana o keia kula Sabati. Penei ke alakai i puka ai ka ninau, ua hoikeia ma Luka 10:42, "Aka, hookahi no mea e pono ai, a ua koho mai nei o Maria ia mea maikai, aole loa ia e laweia aku mai ona aku." Ninau, "He oiaio anei aole i laweia aku ka hoomaikaiia mai o Maria aku?" Ma keia ninau ua ulu mai na manao he nui wale iwaena o na haumana, nolaila makou e waiho aku nei i ka ninau imua o oukou, a na oukou ponoi no e hoike mai i ka haina o ka ninau, i pau ka nune o ko oukou mau pokii. Me ka mahalo,

NA DUTE O NA KAMALII.

                Aloha oe e ke kumu. Ae, aloha kaua.
                Heaha kau? Ka lohe hou paha no na dute. Aia mahea i paiia'i na dute o na kamalii? Aia ma ka baibala, ma ke Kauoha Kahiko kekahi, ma ke Kauoha Hou kekahi. He baibala anei kau e Mahoe? Aole; he Kauoha Hou anei? ae, he wahi buke Kauoha Hou no. Ua pono iki ia, aka, eia kekahi dute au e hoolakoia i ka baibala holookoa, i akaka na dute a pau, ina ma ke Kauoha Hou wale no kou imi ana, haule kekahi mau dute, loaa ole. Hemahema oe, a hewa hoi no ka hana ole i kekahi mau dute, a hana ole, no ka ike ole, no ka baibala ole.
                He kaikamahine ilihune au, pehea loaa'i, ka baibala ia'u? Ae, ua pilikia io no oe, aka o kou dute ia e imi i ka mea e pau ai ka pilikia. Ina pololi oe maa oe i ke noi i ka makua i ai, a noi pinepine, a noi me ka uwe, a na ole ke loaa ole. Ua maa hoi oe i ke noi i ka makua e kuai i lole maikai nou, i kahi lauoho, i lipine ulaula, i lei haole, i ukeke, i papale, i kihei silika, i kamaa, a mau ke noi a ko ka makemake. Pela hoi oe e noi a oki ole, a loaa ka baibala maikai, ka baibala kuhikuhi i na pauku. Ua ike au he nui wale na keiki i nele i ka baibala ole. Kakaikahi loa ka poe i hoolakoia. Ka makou mau keiki, na keiki haole, ua pau i ka hoolakoia i ka baibala me na makua pu. Aka o na keiki Hawaii, auwe! auhea ko oukou mau baibala?
                E, Mahoe, nowai ka hewa? no na keiki anei? no na makua paha? na laua elua paha. Aole ikaika ke noi, ka imi, ka makemake o na keiki. A loaa, aole ikaika i ka heluhelu, aole mikioi i ka malama. Aia ka manao o na keiki ma ka lole, ma na apo, a kula pepeiao, a lei nani, a papale ano hou. A ae no na makua, a hooko i ka makemake o na keiki ma ka hoonani wale ana i ke kino a hoonele i ka uhane. Pahia na lole, na papale, na kihei i ke kaikamahine hookahi? Palua, pakolu, palima, paumi. A, pahia na baibala, aole paha he baibala hookahi. Nui ke dala, ka waiwai, ka hana hoolimalima i lilo i ka lole o na keiki, ka mea mae wale, a he hapa, he ole loa, ka i lilo i ka baibala ka mea mau loa.
                Ka dute nui ia e pili ana i na keiki, i na makua e hoolakoia i ka baibala.
                Ae, nui ko makou hemahema no ka baibala ole, hele makou i ke kula Sabati, a noho wale no ka baibala ole; hele i ka halawai, a lohe i ke pooolelo, aole hiki ke imi, no ka baibala ole, heluhelu i ke Alaula, a kuhikuhiia i na pauku baibala he nui wale, aole nae e hiki ke huli no ka baibala ole.
                Noho wale no ma ka pule ohana, aole heluhelu palapala no ka baibala ole.
                U'oki, ua pau keia kamailio ana. Mahope paha e noonoo hou no na dute i koe aku.
ALOHA.

KA LAAU PUA ROSE A MERE.
LESENA 2.

                Moe o Mere me kona manao a kakahiaka nui wikiwiki oia i ke ala, a hele iwaho i ka mala e nana hou i kana mau laau pua rose. Nana oia a loihi iloko o na lala i ike i na muo, na opuu, na pua hou; a lalau kona lima i kekahi lala e ohi i ka pua, a komo ka mea oi iloko o kekahi manamana a eha, a uwe a holo uwe ana iloko o ka hale e hea ana i ka makua e unuhi.
                "Kolohe oe e Mere, aole keia ka wa e nana aku ai i na rose a ohi aku. Pehea kou bela, kapa moe, ua hooponoponoia anei? Ua holoiia kou maka? Kou lauoho ua kahiia anei? E wikiwiki e hele mai e kokua ia mama i ka hoomakaukau ana i ka ai, a ai iho, a pau, e hui pu ma ka pule ohana, a pau e wikiwiki i ke kula o komo hope oe a kikoia, a"--
                A--aha? wahi a Mere, aole hemo keia mea oi, eha loa wau, heaha hoi ka'u maloko nei? auhea ka papakaukau, ka uhi, na pa, na pahi, na bola, ka io bipi palai, na noho? Auhea ka burumi e burumi ai i ka hale? he umeke poi wale no me kahi io bipi maloo, a—Hamau oe, noho malie kuu kaikamahine hookano. Ua poina paha ia oe ka huli a nana aku ia Iesu e like me keia mau pua, mau lau, i nana aku ai i ka la.
                Ae ua hewa au. Aole au i pule ia Iesu, ua ala au a wikiwiki e holo iloko o ka mala e nana i na rose, a e oki a e hana i lei no'u.
                Mahope iho pule o Mere a holoi i ka maka, a kahi i ka lauoho, a komo pono i ka lole, a kokua ia mama i ka hoomakaukau ana i ka ai. A pau ka aina, kii o Mere i na Kauoha Hou, a heluhelu pu me na makua ma Ioane, mokuna 15; ia Mere ka pauku akahi. "Owau no ke kumu waina oiaio, a o ko'u Makua ka mahiwaina." Ia Lioi ka pauku elua, ia Keawe ka pauku ekolu; ua heluheluia no a pau na pauku eiwa. Pau ka pule holo o Mere i ke kula me ka manao no nae i na pauku i heluheluia, i loaa iaia ka lesena elua e hai aku ai i kona mama.
                E mama, wahi a Mere, i kona hoi ana mai ke kula mai, ua loaa ia'u ka lesena elua. O ke kumu waina, o Iesu ia, o na keiki na lala. A pili na lala i ke kumu alaila ulu, a lau, a pua, a hua mai i ka hua maikai.
                Heaha ka lesena mua?
                O ka huli a nana aku ia Iesu ko kakou La nui, e like me ka huli a nana ana o na lau, na pua i ka la maoli i loaa ka mehana a me ka malamalama e olu a uliuli ai.
                A pili oe e Mere ia Iesu ke kumu waina, heaha na hua au e hoohua mai ai?
                Ka hoolohe, ka malama, na huaolelo maikai a oluolu, a akahai a hoomaikai, a noho malie, a noho aloha a kuikahi me na hoa, a oluolu Iesu ia'u, a—
                Ua lawa. A pehea ke pili ole oe ia Iesu?
                E hoopaanaau oe i ka pauku 6, mokuna 15 o Ioane.
                Weliweli ka hope o ka lala pili ole i ke kumu.