Ke Alaula, Volume VI, Number 6, 1 Kepakemapa 1871 — Page 21

KE ALAULA.
BUKE VI. HONOLULU, SEPATEMABA, 1871. HELU 6.

                E NA hoa heluhelu Alaula mai Hawaii a Niihau aloha oukou.
                Ma keia mau la ua hooiliia mai maluna o'u, e ka Papa Hawaii, kekahi oihana nui, oia hoi ka oihana Lunahooponopono i ke Alaula. No ka hele ana o Rev. A. O. Polepe, ka Lunahooponopono mamua aku nei i Lahainaluna, a waiho wale i keia oihana. Nawai la hoi e lawe a aahu i kona koloka? Mahea e loaa ai kekahi Elisai e komo a pani i kona hakahaka? Ua imiia iwaena o ka poe opiopio, aole nae i loaa. Ua ike no lakou i ka pii ana'e o Elia, oia hoi o Polepe, ame ka haule ana o kona koloka. Ua pili nae a waiho wale ia ke koloka ma ka lepo, e kali ana i ka mea i aa e lawe, a hele, a ku ma kapa o Ioredane a hahau a maheleia ka wai a ae ae ma kahi maloo a hele aku i ka hana.
                No ka loaa ole o ka mea opiopio i aa e lawe i keia oihana, ua noiia au ka elemakule e lawe. A uu aloha i keia lahui kamalii, ua ae au e lawe. Aole nae au i ike maka i ka pii ana'e o Polepe a me ka haule ana o kona koloka, aka ua kii ka Papa Hawaii a lawe i ke koloka a hooili mai ia'u nei a ua aahu au, a ke hele aku nei i ka hana.
                He oiaio no ia, he elemakule au, aka, ma kuu ike ana he mea mau ma keia lahui ka oi o ke aloha o na kupuna i na moopuna mamua o ke aloha o na makua i ka lakou mau keiki ponoi. Ina kokua mai ke Akua i keia elemakule alaila e hiki iaia ke hapai i keia oihana nui a halihali pono aku a mau no ka loaa ana o na pono, na pomaikai ia oukou na keiki, na moopuna, e like me ka loaa ana mamua aku. He mau manao paipai ko'u ia oukou, na
                1. Kamalii. He hana nui a maikai keia i hanaia no oukou. He luhi ka mea nana i imi a haku, a unuhi, a kakau, a hooponopono i na manao, na moolelo, na mele, na ninau a me na haina, e hoopiha'i i na aoao eha o ke Alaula o kela a o keia malama. Ina haule kekahi malama, a panee aku paha ka manawa a loaa ole ke Alaula, hoohalahala paha oukou, a kuhi paha ua hiamoe ka Lunahooponopono. Pela io no, ina hiamoe ka luna, a hoololohi paha, nele no oukou i ke Alaula, a puka hope loa aku paha.
                Aole ma ka Lunahooponopono wale no e nana mai ai oukou, e nana hoi i na mea e ae e pono a e holo ai ke Alaula. O na kukaa pepa, na huapai, na omole inika, na peni kakau, na kii, na wahi a pooleta, ka poe pai a hoopuka, ka Papa Hawaii nana i kokua i ola. No ka mea aole ola ke Alaula i na pa-hapaha o oukou, aia i ka Papa Hawaii kekahi hapalua paha o ke ola o ke Alaula, a na ke Kakauolelo oia Papa e hooponopono i na hua kepau o ke pai mua ana i pololei, a nana a me maua pu e lawe a malama i ke dala a haawi malama aku i ka mea nana i pai.
                A no ke aha oukou e nana a hoomanao ai i keia mau mea?
                Eia, i akaka, he waiwai nui, he momi maikai loa, he daimana nani, ke Alaula ko oukou nupepa, e lawe nui, e malama pono, e heluhelu a huli, e imi i na haina no na ninau, e hoopa i