Ke Alaula, Volume VI, Number 3, 1 June 1871 — Page 11

KE ALAULA. 11

HE  MAKUAHINE PULE MALU.

                Olelo kekahi kaikamahine, o Mere kona inoa, i kona makuahine penei:
                "E kuu makuahine, no ke aha kou hele loihi ana i kahi malu i kakahiaka a me ke ahiahi?"
                Olelo ka makuahine, "i ke aha la?"
                KAIKAMAHINE.--Ua hele paha oe e launa me kekahi makamaka aloha loa.
                MAKUAHINE.—No ke aha kou manao ana pela?
                KAIKAMAHINE.—No ka mea, a hele oe i kahi mehameha a hoi mai oluolu loa kou maka.
                MAKUAHINE.--Heaha kolaila? ina hele au e ike i ko'u hoaaloha a kamailio pu maua me ia, heaha ia ia oe?
                KAIKAMAHINE.—No ka mea, makemake au e hele pu kaua, i oluolu pu kaua.
                MAKUAHINE.--E, auhea oe e kuu kaikamahine, a hele au i kahi malu i kakahiaka a me ke ahiahi, i kuu Haku no wau i hele ai. Hele au a pule ia ia; e noi aku ia ia e haawi mai i naau oluolu, a e kokua mai i ka'u mau hana i pono, e pale ae i ka hewa mai o'u aku. Eia kekahi, noi aku au ia ia nou, i lilo oe i kaikamahine pono.
                KAIKAMAHINE.--Oia iho la, akahi no a maopopo.

                E KE ALAULA:—Aloha oe:
                Ua nui kuu makemake e kamailio me na pokii o nei one hanau a kaua; aka, ua ano lohi ka maka o kuu wahi peni, a ua mamau ka inika, oiai na pahee pono ka pepa. A heaha la ka mea kupono ke hai aku? Eia, i kuu holo ana ma ke kaa lio me kuu kupunakane, ua hai mai ia i kekahi makemake ona. Ina i hiki iaia ke hooko i ua makemake la, alaila he mea olioli nui ia, oiai aole no i hiki ia ia.
                A heaha la kana makemake nui? E koho mai e na pokii.
                "I nui na dala, i tausani a tausani na dala," wahi a Toma. Aole ia.
                "I nui na lako, i mau hale, i nui na aina, na pipi, na lio, na puaa, kela mea keia mea e waiwai ai, aole anei ia ka mea e olioli ai ka naau o ke kanaka?" wahi a Geoki.
                "I nui paha ka mahalo a me ka nani iwaena o kanaka," wahi a Heneri.
                E na pokii aloha, aole no ia i koho i kekahi o keia mau mea; aka, oia kona makemake, ina i hiki i ke Akua e ae mai ia ia. Ua iini nui oia e hai aku i ka ke Akua olelo, a e hoolaha aku, a hoike aku, i lohe na kanaka a pau o ke ao nei i ke aloha launa ole o Iehova. A ina i hiki ia ia ke ku maluna o kekahi mauna nui, e like me Mauna Kea, a me ka leo nui e pae ana a hiki aku i na welelau o ka honua nei, a komo ua leo kahea la iloko o na pepeiao o kela kanaka keia kanaka, kela wahine keia wahine, kela keiki keia keiki, e hai aku ana i ke aloha lua ole o ke Akua iloko o Karisto Iesu, i huli mai lakou io Iesu la, oia kana mea e piha pono ai i ka olioli.
                Pehea, e na pokii, aole anei he makemake nui keia? Hiki ole paha ke hooko ia, ea?
                Ua olelo mai nae o Iesu e hiki mai ana ka hora e lohe na mea a pau ma na ilina i kona leo, a e ala mai; o na mea i hana pono i ke ala hou ana no ke ola; a o na mea i hana hewa, i ke ala hou ana no ka hoahewa ia.
                Ae, e na pokii, a me na hoa heluhelu ALAULA, e hoomanao kakou i keia mea, e lohe ana kakou a pau i ka leo o ko kakou Haku.
                He pono ia kakou e koho e ia ia, i keia manawa i lilo Ia i kahu maikai no kakou, e kahea oluolu ana i na hipa ma kona lima akau, "E hele mai e na mea i hoopomaikai ia e kuu Makua, e kauio iloko o na hooilina i hoomakaukau e ia mai ka hookumu ia ana o ka honua." E.

O ABERAHAMA, E MOHAI ANA IA ISAAKA.

                He kanaka haipule o Aberahama, a ua kapaia oia ka makua o ka poe manaoio.
                Hookahi no ana keiki, o Isaaka ka inoa.    He keiki punahele keia, he milimili no kona wa elemakule. A ua nui ae ua wahi keiki nei, kokoke e puka aku i ke kulana o ke kanaka ui. A maona la i hoao aku ai o Iehova i ka manaoio o Aberahama. A penei ka hana ana. Kauoha aku la o Iehova ia Aberahama, "E lawe oe i kau keiki, ia Isaaka, kau keiki hanaukahi, au i aloha nui ai, a e hele oe i ka aina o Moria, a malaila oe e kaumaha aku iaia i mohaikuni maluna o kekahi puu a'u e kuhikuhi ai ia oe."
                A kakahiaka ae hoomakaukau iho la o Aberahama i kona hoki, a kau aku la  i ka wahie, a hoomaka ka hele ana; oia a me Isaaka, kana keiki, a me na kauwa elua, a i ke kolu o na laike aku la o Aberahama i ka puu a ke Akua i kuhikuhi ai ma kahi mamao aku. Alaila, hoonoho ihope, a hele aku la oia me Isaaka, o laua wale no. Na Isaaka i haawe i ka wahie, a paa aku la o Aberahama i ke ahi a me ka pahi ma kona lima. Haohao iho la o Isaaka,  a ninau aku la ia Aberahama, "E kuu makua, eia hoi ke ahi a me ka wahie, aka, auhea la ke keikihipa no ka mohai?" Aole no i ike, o kona kino iho no ka mohai. Aole no hoi i hai aku o Aberahama iaia. Eia wale no ka hua ana i pane ai. "Na ke Akua e hoolako i ke keikihipa no ka mohai."
                A hiki aku la laua i kahi e mohai aku ai, kukuluia ke kuahu, kauia ka wahie maluna iho, a makaukau na mea a pau, alaila lalau aku la o Aberahama ia Isaaka, e nakii iaia. Auwe! akahi no paha a ike o Isaaka i keia mea weliweli! Eia ka e make ana oia, a e kaumahaia ana kona kino i mohaikuni. A o ka mea oi aku o ke kaumaha, na ka lima no o kona makuakane aloha e pepehi mai iaia a make! Aole nae i kanalua laua, a hoole i ka mea i kauohaia mai e ke Akua. Nakiiia na lima a me na wawae o Isaaka a paa, hapai aku la kona makua iaia a kau aku maluna o ke kuahu. Alaila lalau aku la o Aberahama i ka pahi, e pepehi i kana keiki. Mai make io no iaia, e ole ka leo kahea o ka anela o Iehova, "Aberahama, Aberahama!" Pane aku la o Aberahama, "Eia no wau." Alaila, papa aku la ka leo iaia, "Mai kau i kou lima maluna o ke keiki, a hoeha iaia; no ka mea ke ike nei au ua makau oe i ke Akua, oiai aole oe i aua i kau keiki hanaukahi."
                Alawa ae la hoi na maka o Aberahama, a ike aku la oia i ka hipakane, ua hihia iloko o ka uluwehiwehi. Eia ka, ua makaukau ka mohai e kala aku ai i ke ola o kana keiki. Hookuuia o Isaaka, a kaumahaia ka hipa ma kona  wahi. Hauoli pu ka makua me ke keiki.    Pela no hoi i lilo ai o Kristo, ke keikihipa a ke Akua i mohai ma ko kakou wahi, i mea e ola ai kakou.

E KUU HOA  MAKAMAE:
                Ke wiki nei au e pane aku i kau ninau ana no makou nei. Akahi, "Pehea o Waialua, ke ana o ia wahi?" Eia, he oluolu io no. Kau mai ka la olinolino maluna o ka lai o ke awawa, kahi ua kukulu i ka Haleiwa o ka Ehukai. Peahi mai na makani o uka i na laau uliuli o nei wahi. I ke ahiahi, moe no ka la imua o Haleiwa me ke kau liilii ana o kona malamalama maluna o ke kahawai, na pua, me na kula, a me ka moana, e hoopiha ana i ka naau o na mea a pau me ka hauoli.
                "Pehea kanaka o ia wahi?" Eia ka'u ia oe, mai ka la o kuu hiki malihini ana mai maanei a hiki i keia la, ua hookipa maikai lakou ia'u, me ka lulu aloha o ka lima, a me ka hali ana mai i na mea e hooluolu ai i ka naau o ke kumu.
                "Ua ike anei oe i na ohana ma ko lakou mau home?" Ae; ua launa no makou me ka oluolu. Nui na manawa a'u e hele ai ma kauhale, a ua hala ka mea nona ka hale i ka hana; no ka mea ea, he poe hooikaika no o Waialua nei ma ka mahiai, lawaia a me ka hana e ae.
                O na makua mea kaikamahine o keia kula, a me na kamaaina o nei wahi, ua hele mai e makaikai, i lohe i ka piano, i ike i ka wai hou, a e aloha pu. Eia nae aole lakou e kali loihi; me ke ano maaka no, o ka mama o kanaka molowa ole, noho iki no a hoi no, me ka i mai nae, "aole au i manao e hoopilikia ia oe ma kau hana, aloha oe." A o ka hoi no ia me ka oluolu.
                Ua hoomaka pono na makua mea keiki a pau i ka hookaa ana i ka uku o ka hapaha mua o ke kula ana o ka lakou mau keiki, a ua hookomo makaukau pono ia lakou ma na mea kupono no ko lakou noho ana ma keia kula.
                Ua loaa i keia kula kahi makua kupono oia no o Rev. J. N. Paikuli; oluolu ka maka ke ike iaia maanei. Ke hooikaika nei ia ma kana mau hana maikai a pau. O Mr. S. N. Emekona kekahi mea nana e kokua nei ia'u ma kela mea keia mea.
                Mahope paha e hai aku au ia oe i kekahi mau mea hou e pili ana i keia kula.
                Owau no o kou hoa ma na hana a ka Haku.
MELE E. GELINA.