Ke Alaula, Volume VI, Number 3, 1 Iune 1871 — Page 9

KE ALAULA.
BUKE VI. HONOLULU, IUNE, 1871. HELU 3.

DANIELA ILOKO O KA LUA LIONA.

                I ka wa i noho alii ai o Dariu maluna o ke aupuni o Babulona, ua hoomaopopo ua alii nei ia Daniela, he kanaka haipule, noiau, a hana pololei. Nolaila, makemake loa oia ia Daniela, a ua hooliloia i Kuhina Nui maluna o ke aupuni a pau. Elua mau Kuhina e ae, a me na Kiaaina hookahi haneri me iwakalua. O Daniela nae ke poo o lakou a pau. Nolaila, ohumu lakou nei ia Daniela, a imihala lakou i mea e make ai. Aole nae loaa kekahi hala iki e ko ai ko lakou manao ino.
                Nolaila, kuka iho la lakou e hoohihia aku ia Daniela ma ke ano hoomana. Hoomalimali aku la lakou ia Dariu, ke alii, e hana i kanawai paa loa e kauoha ana i na kanaka a pau e hoomana aku ia Dariu ke alii no na la he kanaha; a e papa ana no hoi i na kanaka, o ka mea pule aku i kekahi mea e ae iloko o ia mau la, e kiolaia'ku ua kanaka nei iloko o ka lua liona. Ae aku la no hoi ke alii, a ua hooholoia ua kanawai la, a hoolahaia ma na wahi a pau o ke aupuni. Aole nae ike ke alii i ko lakou manao ino ma keia mea. Ae naaupo aku no me ka hoomaopopo ole i ka hope o keia hana.

                He mea mau hoi ia Daniela e pule aku ia Iehova i kela la keia la.
                Kiai koke aku keia mau enemi iaia, a ike lakou iaia e pule ana ia Iehova, e like me kana hana mau; aole ia Dariu ke alii, e like me ke kanawai. Alaila, hoopii koke aku la lakou imua o ke alii, e kiolaia o Daniela iloko o ka lua liona, e like me ka olelo o ua kanawai ino nei.
                Akahi no a ike ke alii i ka manao ino a me ka maalea o keia poe. Minamina loa no hoi oia ia Daniela, aka, e like me ke kanawai o kela aina, aole hiki iaia ke hoopau i kela kanawai.
                Nolaila me ka naau kaumaha loa, ae aku la a i ko lakou manao, a ua kiolaia o Daniela iloko o ka lua kahi i malamaia'i na liona. Ilaila kahi i noho ai o Daniela ia po a ao. A i ke ao ana'e, awiwi aku la o Dariu ke Alii ilaila, e hoomaopopo ai no kona Kuhina aloha, eia ka! aole no i make, aole i eha iki i na liona. No ka mea, ua malama o Iehova iaia, a na kona lima mana i hoopaa i na liona i ole lakou e hoopilikia aku ia Daniela.

MALAMA I NA MEA LIILII.

                Ma Kalifornia, i kekahi la, e holo ana kekahi kaikamahine ilihune maluna o ka lio. Ike aku la oia i kekahi lala waina e waiho ana ma ke alanui. Lalau iho ia i ua lala nei i laau hili no kona lio. A hiki aku i ka hale, loaa iaia ka mahao e kanu i ua lala waina nei. Ua mae, a weluwelu ua laau nei, aole nae i maloo loa. Nolaila, i iho la ke kaikamahine, "E malama no wau i keia wahi laau, malia paha e ulu ana." Kanu iho la oia, a kiai a hookahe i ka wai, a kipulu, a ulu io no. A hiki i ka wa e hua, ai aohe o kana mai ka hua ana. Elima tausani huihuiwaina i ohiia noluna o ua kumu nei i ka makahiki hookahi, aole hoi i emi ke kaumaha o ka huihui hookahi malalo o ka paona hookahi. A i ke kuai ana aku, ua loaa mai eha tausani dala. Makepono loa konam alama ana i keia wahi lala.
                E hoomanao oukou, e na pokii, o ka malama pono ana i na mea liilii, oia ka mea e waiwai ai mahope.

UA HALA KA MANAWA.

                E kokoke ana kekahi kanaka kaulana i ka make, kamailio mai kekahi hoahanau me ia no Iesu, pane mai ua kanaka mai la: "Aole au i ike maopopo i ka olelo a ke Akua, he oiaio paha, aole paha." Ninau hou mai kona hoalauna, "Pehea oe ke make?" I hou mai ka mea mai, pouli, pouli loa. Ninau hou mai kona hoalauna, "Aole anei oe malamalama mai ia Iesu mai, pehea kou manao i ka Baibala?" Pane hou mai kela, oia paha, aole paha, aka, ua hala ka manawa! Ua hala ka manawa! Pehea oe, e ka mea heluhelu, e kali ana anei oe a hala ka manawa?