Ke Alaula, Volume VI, Number 1, 1 April 1871 — Page 3

KE ALAULA. 3

 

KE KOA EHA.

                Ke ike nei oukou i keia wahi koa i hoi mai mai ke kahua kaua. Ua eha kona lima. I ku paha i ka poka, a i ole ia, ua loaa i kekahi eha e ae o na eha weliweli he nui wale o ke kaua. Ke hele nei oia ma ke alanui, a no ka luhi a me ka makewai ua ku e hoomaha ma kapa alanui. Ke hilinai nei oia ma ka pa, a ua haawiia mai ka wai e inu iloko o ke kiaha, e ka poe aloha o ia wahi. Ke hahai aku nei paha oia i na nu hou o ke kaua i kela wahine lokomaikai me kana wahi keiki.

                Nui wale na koa i eha iloko o ke kaua ma Farani i na malama i hala ae nei. Nui wale hoi ka poe i make.

                Koa no na kanaka ma na mea o keia ao. Makau ole no hoi lakou i ka make a me ka eha o ke kino.

                Aka, pehea ma na mea o ka uhane? Nui wale paha ka poe hohe wale imua o na hoowalewale. Kakaikahi ka poe koa ma ka pono me ka wiwo ole.

                Mai makau kakou ke hooheneheneia mai, a hoowahawah aia no ka pono. E koa no Iesu, koa no ka pono, koa a kupaa, koa a lanakila maluna o na enemi a pau o ka uhane.

 

HE KAPA-MOE HULUHULU.

                E helehele ana o Hana, ka makuahine o Luke, i kapa-moe huluhulu nona, a e kiai mai ana o Luke i kana hana. "E mama, e oluolu paha oe e helehele i kapa-moe huluhulu no kekahi keiki ilihune, a na'u e hana?" "Ae," wahi a ka makuahine, a ke kali nei no paha ke keiki no keia kapa." "Owai ia?" wahi a Luke. "Aole maopopo ia kaua ka inoa o ke keiki, aka ua maopopo no i ke Akua." "E hai mai anei ke Akua ia kaua?" wahi a Luke. Ae mai no kona makuahine, "aia a paa, alaila e ike ana kaua."

                Ua heleheleia ke kapa huluhulu, a lawe o Luke i kona hinai mea humuhumu, a noho pu me kona makuahine e hana.

                He mau hora oluolu a laua i noho pu, a kamakamailio, a humuhumu ia lole. Nui ka noonoo ana o Luke no ke keiki ilihune nona ia kapa i hoomakaia e ia. He anuanu loa paha ia i na po anu a pouli loa? Mahea kona wahi i noho ai? He makuahine anei kona? Ua imi aku anei ke Akua iaia no keia kapa moe? Nui na manao i hoalaia iloko o Luke.

                Mahope ua paa ia lole, a opeope maikai ia, a hooia ma ka pahu o Luke. Aole liuliu a hele mai kekahi hoalauna a hai mai i ka moolelo o kekahi ohana ilihune e noho ana ma kapa o ka muliwai. Ua nele ke poo o ka hale i ka hana, ua loohia ka wahine a me kekahi o na keiki i ka mai. "Pilikia loa ka poe ilihune i keia hooilo," wahi a ka hoahanau; "e hele paha oe e ike i keia ohana." Ae no o Hana e hele, a i ke ahiahi komo i kona kaloka me ka manao e huli ia lakou. Hele pu o Luke me ia.

                He hale kahiko loa ma kapa muliwai, a elua a ekolu paha ohana e noho like ana malaila. Ma kekahi aoao o ka hale he keena i lilo i hale kamana mamua, a e noho ana ka ohana a laua i imi ai malaila. Me e ke kaumaha i ka ike ana i ko lakou pilikia. Ma kekahi kihi he moe, aole i uhi pono ia me na kapa. Elua noho inoino, he pakaukau, aka he hapa wale no na pa me na bola ti. He anu loa, a ua ane pau ka wahie ma kapuahi. Elua keiki ma ka papahele, he iwi ka kekahi e nali ana, a he uala ka kekahi.

                O ka makuahine i loohia i ka mai e moe ana ma kahi moe, me kana keiki aneane make me ia. Hookokoke o Hana i kahi moe e aloha aku i ka wahine ilihune. Me he wai huihui la i ka mea makewai, kana mau olelo aloha i keia wahine ilihune.

                "Eia kuu keiki o Ahi," wahi a ka wahine mai, me ke kau ana i kona lima wiwi ma ke poo o ke keiki e moe pu ana me ia; "e hele mai paha kau kaikamahine e aloha iaia."

                Hele no o Luke, a haawi i mea ono ma kona lima,—na kona Aunt Marie i haawi iaia, a ua waiho wale ia ma kona eke me ka hoao ole ia. Olioli o Luke. Lalau o Ahi i ka mea ono, a kunou i kona poo, me he mea la e hoike ana i kona manao hoomaikai.

                Ninau o Hana i ka lakou hemahema, a me ka mea i makemake nui ia.

                "Ina he mea huluhulu e uhi i keia keiki aloha o'u," wahi a ka wahine ilihune, e piha ana kona maka i na waimaka.

                "E Luke, he kapa-moe huluhulu paha kau na Abi?" wahi a kona makuahine.

                "Ae, he oiaio no, a kii paha au i ka hale," wahi a Luke me ka lealea.

                Ae no kona makuahine, a holo kiki aku ia i ka hale. He wa pokole a hoi mai o Luke e paa ana i ke kapa ma kona lima. Hauoli ka makuahine aneane make, hauoli pu ke keiki mai.

                "Na ke Akua i hoouna mai ia olua maanei, no ka mea ua hai aku au i ka makou pilikia a pau iaia," wahi a ka wahine.

                I ka hoi ana o laua i ka hale, i aku o Luke i kona makuahine, "Hana au ia lole no Abi, aole anei pela? Maopopo no i ke Akua."

                "Ae, ua ike lea ke Akua i na pilikia a me na hemahema a pau o ka poe ilihune, a ua hiki iaia ke hookomo i ka manao iloko o ko kakou naau e hana i ka mea kupono no lakou. E noi mau kakou i ke Akua e ao mai ia kakou, i akaka na pilikia o ka poe ilihune, a hiki ke hooko i ka lakou makemake; a ina he manao oiaio e kokua ia lakou, e haawi no ke Akua ia kakou i mea e hoolako i na hemahema o lakou."

                "Aka, e mama, pehea la e maopopo ai ia'u ka mea a ke Akua i makemake ai ia'u e hana; e hai mai anei oia i na wa a pau?"

                "Aole anei maopopo ia oe na mea a'u i makemake ai me kuu hai ole aku ia oe?" wahi a Hana.

                "Ae, e mama, no ka mea, e noho pu ana no kaua, a he mea hiki wale no ia."

                "Aole no pela, aole ike wale ia; nui paha ka poe e noho me a'u, aole no i hoomaopopo i na mea a'u i makemake nui ai e hanaia, ke ole e i aku ia lakou e hana. Aole anei he kumu e ae?"

                "E kuu mama, pinepine kuu hoomaopopo ana i na makemake ou, no kuu aloha nui ia oe."

                "Ae, oia ke kumu. Aloha oe ia'u, a nolaila ua hooko oe i na makemake o'u ma na mea hiki ia oe. Ina e aloha ana i ke Akua, e hoomaopopo ana i kona makemake hemolele; a ina e aloha ana i ka poe ilihune, aole loa e nele i ka hoomaopopo ana i na hemahema a lakou, a kokua ia lakou. O ka mea nui ke komo pu ana o ka naau ma ka hana."

                Noonoo nui o Luke ma na mea i hala, a piha kona naau i ke kahaha no ka wae ana o ke Akua iaia e hana a e haawi aku me kona lima i kapa no kekahi o kona poe ilihune.

 

                He hewa na mea hana o ka mea wahahee.