Ke Alaula, Volume V, Number 11, 1 February 1871 — Page 41

KE ALAULA.

BUKE V. HONOLULU, FEBERUARI, 1871. HELU 11.

                Ua ike mua paha oukou i keia kii, a ke pai hou ia nei i keia manawa, no ka mea aole i hiki mai nei na kii hou i kauohaia no ke ALAULA.
                He mau keiki kolohe keia. Ua loaa ia lakou he punana aeto maluna o kekahi pali kiekie. A ike paha lakou ua hele ka aeto e imi i ka ai, loaa ia lakou ka manao e hao i ka punana. Nolaila, kii aku la lakou i kaula paa, pii aku la a iluna o ka pali, i kahi kupono maluna o ka punana, hoopaaia ke kaula i kekahi kumu laau e ulu ana malaila, alaila hookuuia kekahi o lakou ilalo a loaa aku i ka punana. Naaupo loa lakou. No ka mea, he manu hae, a he ikaika loa hoi, ka aeto. Ina e hoi mai ka aeto makua, a loaa ia lakou malaila, pomaikai wale lakou ke pakele iaia.
                Aia la! Ua kuuia kahi keiki a hiki i ka punana, hopuia, kahi manu keiki me ka olioli, a me ka huro nui o lakou a pau. E huki hou ana lakou iluna, a o ka hoi mai no ia o ka aeto makua. Weliweli ka aa o kona mau maka a me ka huhu o kona lele ana mai. Uwe kahi keiki, a haalele aku i kahi manu opiopio, a piha loa lakou a pau i ka makau.
                Eia ka ua lilo koke ko lakou olioli i mea e poino ai. Pela ka poe a pau e lawe wale ana i ka hai. Aole e waiwai ana ka aihue.

                E mohai i ka hoomaikai ana i ke Akua; a e haawi i ka mea kiekie loa i kuu mea i hoohiki ai nona; a e kahea mai ia'u i ka la popilikia; a e hoopakele au ia oe, a e hoonani mai no hoi oe ia'u."

                E kala mai oukou, e na mea heluhelu ALAULA, i na hemahema o keia helu. Ua pilikia loa ka Luna Hooponopono iloko o ka malama i kaahope ae nei, i ka mai o kona ohana, a nolaila, ua hala loa ka wa kupono o ka puka ana o keia helu.
                Eia kekahi. O na kii hoikeike. Mai hoohalahala mai oukou i ko makou pai hou ana i kekahi mau kii i pai mua ia maloko o ke ALAULA. No ka mea, ua pau loa na kii maikai e waiho nei, i ka paiia, aole hoi i hiki mai na kii hou. Ke lohe mai nei makou ua hoomakaukauia na kii hou ma Nu Ioka, iloko o Iulai o ka makahiki i kaahope ae nei, a ua hahaoia iloko o ka pahu, a ua waihoia ke kauoha ma ka hale-pai e hoouna koke mai. Ina no ua loaa kahiko ia kakou. Eia ka ua nalowale. Aia la ihea. Nolaila ua kauoha hou ia. E hoomanawanui hou kakou a hiki mai.
                Ke hoopuka nei makou i keia malama, i kekahi ninau a kekahi kula Sabati. Owai ka mea e haawi mai ana i ka haina? He mea maikai keia, ke pohihihi kekahi mau ninau kupono e hoopuka ai ma ko kakou nupepa. Eia nae, o na ninau lapuwale, waiwai ole, aole e komo ana. Ua makemake makou e hookaawale i kekahi kolamu o ke ALAULA no na ninau a me na haina, a me na nu hou e pili ana i na kula Sabati.
                E olioli oukou i na palapala a ko kakou hoa'loha, ka Luna Hooponopono mua o ke ALAULA, oia o Rev. O. H. Kulika. Ua hala aku laua me kana wahine i Iapana e hooikaika iwaena o ia lahui, a e loaa ana ia kakou kana mau palapala nolaila mai.

KAWELA, MOLOKAI, Ianuari 17, 1871.

                E KE ALAULA E—Aloha oe:—No ke kupu ana mai o ko'u manao e waiho aku maluna iho ou ka'u wahi ukana, i ike mai i i ka poe naauao o na kula Sabati a pau, mai ka Hikina a ka la i Haehae, a ka welo'na a ka la i Lehua, o lalo aku, a anoai paha o hiki ia lakou ke wehewehe mai i ke ano o keia ninau malalo iho, i pau ae keia pohihihi a me ke kanalua o na haumana o ke kula Sabati o Kawela, i Molokai nei.
                Aia ma ka aoao 42, ninau 32, o ka Ui Kamalii, helu 31, haawina 16. Penei: "A pehea la kekahi manaopaa e pono ai kakou? Eia iho: "E kinai i na makamua o ka hewa."
                Eia ka ninau: Heaha la na makamua o ka hewa? No ka holo pono ole o ka manao o na hoa o keia kula ma ka lakou mau wehewehe no keia ninau i nanauia; nolaila, pono no ia oe, e ke ALAULA, ke awili pu ia me ka lokomaikai o kou kapena Luna Hooponopono, e hookomo iho i keia wahi mamala manao ma kahi kaawale o kou kino, i weheia mai ai ke pani o keia ninau.
Me ka mahalo. Na'u, na KEONI I.