Ke Alaula, Volume V, Number 10, 1 January 1871 — Page 39

KE ALAULA. 39

KA HIOLO ANA O NA PA O IERIKO.

                I ka wa i komo aku ai na mamo a Iseraela i ka aina o Kanaana, o ke kulanakauhale o Ieriko ka lakou i kaua mua ai, mamuli o ke kauoha a Iehova. Hoomakaukau ia na koa a pau o ka Iseraela, he eono haneri tausani ko lakou nui, a hoonohonohoia lakou ma ka mua o ka huakai. Mahope mai o lakou, na kahuna mohai ehiku, me ko lakou mau pu kiwi hipa ehiku. Mahope iho o lakou ka pahu berita o Iehova, a mahope aku ka lehulehu. Kai aku la ka huakai, mawaho ae o ke kulanakauhale. A i ko lakou hele ana, ua papa loa ia lakou, aole e walaau, aole e hooho, a i hookahi wale no mea e loheia, oia ka puhi ana o na kahuna i ko lakou mau pu. Pela ko lakou hele ana a puni ke kulanakauhale, a hoi malie aku i ko lakou wahi. Hanaia no pela i kela a me keia la, a hala na la eono. A i ka la ehiku, ala ae la lakou i ka wanaao, a ia la, ehiku ko lakou poai ana i ke kulanakauhale. A pau ia hana, ku aku la o Iosua a olelo aku la i na kanaka, "E hooho oukou, no ka mea, ua haawi mai o Iehova i ke kulanakauhale no oukou. A e laa kela kulanakauhale ia Iehova; oia, a me na mea a pau oloko. O Rahaba, ka wahine hookipa, oia wale no ke ola; oia a me na mea a pau iloko o ka hale me ia. No ka mea, nana no i huna i na elele a kakou i hoouna aku ai.
                "E malama hoi oukou ia oukou iho i na mea laa, o laa oukou i ko oukou lawe ana i na mea laa, a hoolilo oukou i ka Iseraela i mea laa, a hoino hoi ia lakou. A o ke kala a pau a me ke gula, a me na ipu keleawe a pau, a me ka hao, e kapu no ia mau mea no Iehova. E komo no ia iloko o ka waihona kala a Iehova."
                A pau keia mau olelo a Iosua, hookani aku la na kahuna i na pu, a hooho nui aku la na koa a pau, a me ka lehulehu, a hiolo wale na pa o ke kulanakauhale. O ko lakou komo aku no ia ma na aoao a pau, a luku aku lakou i na kanaka a pau o ke kulanakauhale, koe wale no o Rahaba a me kona ohana, e like me ka olelo a Iosua. Pepehiia no hoi na bipi a me na hipa, a me na mea ola a pau. O ke kala nae, a me ke gula, a me ha ipu keleawe, a me na ipu hao, ua malamaia no ka hana a Iehova. A puhi aku la lakou i ke kulanakauhale a pau i ke ahi.

PALAPALA MAI AMERIKA MAI —Helu 3.
Ka Halawai Makahiki o ka Papa Misionari Amerika.

                E KE ALAULA--Aloha oe:--I ka la 4 o Okatoba, halawai ka ahahui hoolaha misionari i kapaia ka Papa Amerika, ma ke kulanakauhale o Brooklyn, Nu Ioka. O ka ahahui keia i hoolaha i ka pono ma Hawaii, a ke hoouna nei i kona mau misionari ma na aina he lehulehu o ka honua nei.

Na Makua o Hawaii.

                He nui na makamaka o Hawaii i akoakoa mai ma ia halawai. Eia kekahi o lakou: o Kauka Anesona, a me Kauka Kalaka, ke kakauolelo o ka Papa Amerika. He nui no hoi na keiki o na ohana o na misionari o Hawaii i hiki mai, a i hui kekahi me kekahi, e hoomanao i ko lakou one hanau me ke aloha. Eia na makua i hiki mai: o Rev. T. Koana a me kana wahine; o Rev. E. W. Kalaka a me kana wahine; Rev. Kureke a me Snow, a me ko laua mau wahine; o Mrs. Kuke a me kana mau keiki.

Na Keiki Hawaii.

                Eia na keiki Hawaii i hiki mai: o Konele, Bona, Ana Parisa, Hate Baluina, Samuela Wilikoke, Emma Kamika, o Koloa, Kauai; elua keiki a Koana, hookahi kaikamahine a Mr. Loke, o Waialua, Oahu; K. A. Demona, a o na keiki hoi a Kulika makua, a me na moopuna he umikumamakahi o lakou.

Na Halawai Haipule.

                Ua akoakoa nui mai na makamaka o keia hana, o ka hoolaha ana aku i ka olelo a ke Akua ma na wahi pouli, ma keia halawai. Ua manaoia he 5,000 ka nui o na mea i akoakoa mai na wahi e mai, e hui me keia aha. Ma na kakahiaka a pau ua hui na haipule ma na aha halawai haipule e hookokoke aku i ke Akua. I ka hora eiwa, akoakoa ka aha nui ma kekahi hale nui. He 4,000 paha ka nui i komo mau mai. Eha la ka halawai ana o keia aha.

Ka Himeni ana.

                Iwaena o na hana, na haiolelo, na hoike o na komi te, a me ka lohe ana i na olelo o na misionari mai na aina e mai, ua himeni pinepine lakou. Himeni pu ke anaina a pau. Eia kekahi o na himeni a lakou:
                                "Aloha ko na mauna
                                I paa mau i ka hau," &c.

Haiolelo na Misionari.

                Ma kekahi mau halawai, hai mai na misionari i na hana a ke Akua iwaena o na lahui, a me ke kupaianaha o ka ke Akua hoohuli ana i ka poe pegana mai ka pouli a i ka malamalama o kana olelo. Hai mai o Koana a me Kauka Kulika no Hawaii; hai mai o Kauka Kalaka no kana mau mea i ike ai ma Honolulu i ka makahiki Iubile; hai mai o Kureke no Maikonisia; hai mai kekahi misionari mai Aferika no kona aina, o kekahi no Tureke, o kekahi no Palesetina, o kekahi no Peresia, o kekahi no Inia.

Halawai Kaawale na Misionari.

                Elua halawai kaawale ana o na misionari a me ka lakou mau keiki, e launa pu kekahi me kekahi. Ma ia halawai, ikemaka makou a lulu lima me kekahi o na misionari kaulana o kela aina keia aina. Hui ko Hawaii me ko Aferika, ko Suria, ko Tureke, ko Peresia, ko Inia a me ko Kina. Ike na keiki i hanauia ma Hawaii i na keiki misionari i hanauia ma Aferika, ma Europa, a ma Asia. Hauoli nui makou ma keia mau halawai i ka launa pu ana me na misionari a me na keiki a lakou. Na ke aloha i na uhane o ka poe pouli i alakai i kekahi o na makua o makou e hele i ka hikina, a o kekahi hoi i ke komohana. Na ka lokomaikai hoi o ke Akua i ae ia makou e hui aloha, alaila kau liilii, a hoi kekahi i kona aina ma ka hikina, a hoi kekahi i kona aina ma ke komohana, e hapai hou i ka hana. O kekahi o na keiki e ao ana ma na kula ma keia aina, o kekahi ua loaa hana ma keia aina, aka o kekahi ua hapai i ka hana a na makua, a e hele ana i na aina pegana.

Halawai Kaawale na Wahine.

                He halawai kaawale kekahi a na wahine i kekahi la, ma kekahi luakini. He 1,500 paha wahine ma ia halawai, a o na wahine misionari ma na aina e mai, o lakou na haiolelo ma ia halawai wahine. He nui ka hauoli o na haipule io a pau i ka lanakila nui ana o ka ke Akua olelo ma na aina a pau i keia kau a kakou e noho nei.

Na Makahiki a keia Aha.

                He kanaono-kumamakahi makahiki mai ka hookumuia ana o keia aha, a he nui na aina kahi i hoounaia ka olelo a ke Akua e keia aha. He kanalima makahiki mai ka hoounaia ana o Binamu a me Tatina ma i Hawaii, a he kanaono a keu na kumu kane i hoounaia ilaila, a i keia wa ke olelo nei ka aha ua pau ka hana a lakou ma Hawaii. Ua kanaka makua ka pono ma Hawaii, ua pau ke ano pegana, ua lilo i lahui Keristiano, a ma keia hope aku na na Ekalesia Hawaii e malama i ka pono o ke Akua iwaena o lakou iho.
                Me ke aloha i o'u mau hoa hana iloko o na Ekalesia a iloko o na kula Sabati.
Na'u, na O. H. KULIKA.

HE OLELONANE ARABIA.

                Penei kekahi olelonane o ka lahui Arabia. E moe ana kekahi kanaka iloko o kona keena. Hele mai la he kamelo a hookomo ae la i kona ihu ma ka puka aniani e hamama ana. "Anuanu o waho nei," wahi a ke kamelo; "e oluolu oe o kuu ihu wale no ke komo iloko o kou keena." A liuliu iki, noi hou ke kamelo e komo pu aku kona a-i. Mahope iho, mamuli o kona noi hou ana, hookomoia na wawae mua. A pela i neenee aku ai a komo kona kino holookoa iloko o ke keena. Alaila ike iho la ka mea nona ke keena ua pilikia oia, oiai ua hooke loa ia kahi keena uuku i ke kino nui o ke kamelo. I olelo aku hoi oia i ua kamelo nei no ka lawa ole o ke keena no laua a elua, o ka pane mai no ia o ke kamelo, "Ina ua pilikia oe, hiki no ia oe ke hele i kahi e; aka e noho ana wau maanei."
                Pela hoi ka hewa. I kona hoomaka ana, he mea uuku wale no, aka, e nee malie mai ana a piha loa ka naau, a kipakuia ka lunaikehala, ka mea nana e malama i ka pono o ka hale.

                Ninau hoomaauea aku la kekahi kanaka aia i ke kanaka haipule, "Pehea ka nui a me ka uuku o kou Akua?" Pane aku la ka haipule, "O kona nui, aole hiki i ka lani o na lani ke apo aku; o kona uuku, ua hiki no iaia ke iho mai a noho iloko o kuu naau."