Ke Alaula, Volume V, Number 10, 1 January 1871 — Page 38

38 KE ALAULA.

hova iaia no na mea a pau e pili ana i ke kukulu ana i ka Luakini halelewa nona, a no ka hana ana i ka Pahu Berita me na Kerubima, a no ka hoolaa ana ia Aarona a me kona ohana i mau kahuna mohai, a no ke kuahu a me na mohai o kela ano keia ano. A pau ia mau mea, haawi mai la o Iehova ma ka lima o Mose, i na papa pohaku elua i kakauia'i na kanawai he umi, a kahakahaia iloko o ka pohaku e ka lima o Iehova. A hoi aku la o Mose me na papa pohaku a ia Iosua, e kali ana iaia ma kahi a laua i pii pu ai. A iho pu aku la laua me na papa pohaku a hiki ilalo.

KA MAKUA ME NA KEIKI.

                Ke ike nei kakou i keia makua e hoouna ana i kana mau keiki i ke kula. E hele ana laua i ke kula Sabati paha, a i ke kula maoli paha. Ke makaukau nei laua me na papale e paa ana ma na lima, a ke haawi nei ka makua i kana mau olelo kauoha ia laua. Me he mea la, ua hoomakaukau mua ia ko laua mau haawina ao me ke kokua mai o ka makua, a ke ao aku nei paha oia ia laua no ka hele ana ma ke alanui a no ka noho pono ana ma ke kula.
                Ina pela e hana ai na makua a pau, e ike auanei kakou i ka holo pono o na kula, a me ka maluhia o na keiki. O ka pono no ia. E kiai pono na makua i ka hele ana o na keiki i ke kula a me ko lakou hoi ana mai. Mai hookuu wale ia lakou e hele mamuli o ko lakou manao iho.

KE KAUA HEMOLELE.—Mokuna 3.
HE OLELONANE.

                Ua ike kakou i kela malama i na manao kuka eha i kukuluia imua o ka aha kaua o Diabolo ma me kona mau luna; oia hoi,
                1. O ka pono e hoike lakou ia lakou iho a pau ma keia kaua ana i ke Kulanakauhale o Kanaka.
                2. O ka pono e hoomoana kue lakou i ke Kulanakauhale o Kanaka me ia aahu weluwelu inoino a lakou e aahu ana.
                3. O ka pono e hele kue aku lakou i ke Kulanakauhale o Kanaka ma ke ano enemi maoli paha, a ma ke ano hoopunipuni paha.
                4. O ka pono e kena mua ia kekahi mau mea o lakou e hoohalua i kekahi mea, a mau mea paha, o na kanaka koikoi o ua kulanakauhale nei, a e pepehi aku ina ua manaoia he mea ia e kokua ana i ka holo o ka lakou hana.
                I ke kuka ana no ka manao akahi, ua hooleia, aole pono e hoike ia lakou iho a pau imua o ke kulanakauhale, o hoopuiwaia auanei na kamaaina. A ina e puiwa e lakou, wahi a Diabolo, a makaala ia kakou, aole loa e lilo mai ke kulanakauhale ia kakou. No ka mea, aole e hiki ke komo aku kekahi mea ke ae ole ia e na kamaaina. Nolaila, i hookahi wale no o kakou ke ikeia ma keia hoouka ana, a i kuu manao, owau no ia. A ua hooholoia keia manao.
                Hapai lakou i ka noonoo ana no ka manao elua.
                Hooleia, aole pono e hele aku lakou imua o ke kulanakauhale me ia aahu inoino a lakou e aahu ana ia manawa. "No ka mea," wahi a Aleketo punikoko, "aole i ike ko Kanaka poe i na mea inoino e like me kakou, a e makaala koke mai auanei lakou i ko kakou ano e loa." Ku mai hoi o Apoluona, i mai la, "Kupono no keia manao i haiia mai la. No ka mea ina e ike mai lakou i kekahi mea hookahi o kakou ma ko kakou ano e ku nei, e kahaha loa auanei ko lakou manao, a e makaala koke mai lakou. Alaila, e like me ka Diabolo i olelo iho nei, makehewa ko kakou manao ana e hoopio i ke kulanakauhale."
                Ku ae la hoi kela nunui ikaika, o Beelekebuba, a penei kana: "Ua maikai no na manao a kakou i lohe ai. No ka mea, he oiaio no, ina o ko kakou ano i kinohi, ua kamaaina ko Kanaka poe i keia ano maikai; aka o ko kakou ano i keia wa, he mea malihini loa ia ia lakou. Nolaila, i kuu noonoo ana, ua oi ka pono ke hele aku kakou imua o lakou ma ke ano i kamaaina ia lakou."
                A ua holo like keia manao. Eia nae, aole i hoakakaia ke kino a me ke ano kupono loa i ka hookomoia e Diabolo no keia hana. A i ka hoopuka ana o na manao no ia mea, ua nui na manao okoa, a like ole kekahi me kekahi.
                Alaila, pane aku la o Lukipera, i kona manao ua pono ia Diabolo e lawe i ke kino o kekahi holoholona i noho mau malalo o ka hoomalu ana o ko Kanaka poe, "No ka mea," wahi ana, "ua kamaaina loa ia mau ano ia lakou; a no ko lakou maa i ka noho haku ana maluna o na holoholona, aole lakou e manao ana he mea hiki i kekahi o ua mau holoholona la ke lawe pio i ke kulanakauhale. A i mea e puni ai lakou, pono e lawe oia i ke kino o kekahi ano holoholona i manaoia e na kamaaina o ke kulanakauhale ua oi aku kona akamai mamua o ko na mea e ae." (Kin. 3:1; Hoik. 20:1, 2.)
                A ua mahaloia keia manao e lakou a pau. Nolaila, ua hooholoia e lawe o Diabolo i ke kino o ka nahesa.
                Hapai hou lakou i ka noonoo ana no ka manao ekolu; oia hoi no ka pono ke kaua aku lakou ma ke ano enemi maoli paha, a i ole, ma ke ano hoopunipuni paha.
                Hooleia no hoi, no na kumu i hoopukaia mamua; oia hoi, no ka mea he poe ikaika ko Kanaka poe, a he kulanakauhale ikaika hoi ko lakou, i hoopuniia e ka pa ikaika me na pani puka ikaika, i hiki ole ai ke komoia me ko lakou ae ole mai. "Eia hoi," wahi a Lekiona, "ina e ike e lakou i ko kakou ano enemi, e hoopii koke aku auanei lakou i ko lakou Alii e kokua mai, alaila, ua maopopo ia'u, o ko kakou manawa no ia. Nolaila, e hele aku kakou e kaua ia lakou ma ke ano makamaka aloha, e huna ana i ko kakou manao maoli malalo o na olelo hoopunipuni a hoomalimali, a alakai hewa. Pela e loaa ai ia kakou o Kanaka mamuli o ko lakou makemake iho, a na lakou iho no e wehe mai i na puka ia kakou. Ke manaolana nei au i keia hana, no ka mea, i keia wa, he poe ike ole lakou i ka hookamani a me ka hoopunipuni. He poe pololei a hemolele wale no lakou. Aole lakou i maa i ka hoowalewaleia a me ka wahahee. Nolaila, aole lakou e noonoo mai i ko kakou ano maoli, aka, e puni wale lakou ia kakou. E manao wale ana lakou i ko kakou mau olelo wahahee, he oiaio. E manaoio ana lakou i na mea a kakou e hai aku ai ina e hana aku kakou me he mea la e imi ana kakou i ko lakou pomaikai noloko aku o ke aloha nui ia lakou."
                Aole i kue kekahi o ua aha nei i keia mau olelo. Pahee wale aku no ka ae o ko lakou manao e like me ke kahe ana o ka wai ma kahi ihona.
                O ka manao kuka eha wale no koe, oia hoi, no ka hoonoho ana i kekahi mea o lakou e pepehi aku i kekahi mea, a mau mea koikoi paha o ke kulanakauhale, i mea e holo pono ai ka lakou hana. A ua hooholoia ka ae i keia manao, a o ka mea a lakou i manao ai e pepehi, oia no ka mea i kapaia o Kapena Kupaa. O keia Kupaa hoi, he luna nui no ia iloko o ua kulanakauhale nei o Kanaka, a ua kaulana kona inoa, a oia no hoi ka mea hookahi i makauia e Diabolo a me kona poe mamua o na mea e ae a pau loa o ke kulanakauhale o Kanaka. A ua kohoia kekahi o ko Diabolo poe uhane hae, o Kikipone kona inoa, e hooko i keia hana. (Aole i pau.)

IA WAI OE E NANA AKU AI?

                E hiki mai ana ka wa luuluu! Alaila pehea oe? Nawai oe e kokua mai? Na kou mau hoa lealea anei? E haalele auanei lakou ia oe. Na ka hoomanao ana anei i na pomaikai i hala aku? He ehaeha wale no ilaila. Na keia ao anei? Aole ona laau e lapaau aku ai i ka naau ehaeha. Na ke Akua anei, ka mea au i manao ole ai? Pehea la e nana aku ai oe iaia i kou wa luuluu, ina ua hoowahawaha a hoino aku oe iaia i na wa e ae?
                E hiki mai ana ka make! Alaila, pehea oe?
                E hiki mai ana ka la hookolokolo nui! Alaila, pehea oe?
                E hiki mai ana ke ao pau ole! Alaila, pehea oe? Mahea oe e noho ai? Iloko anei o ka wela o ke ahi mau loa? Weliweli!
                Ina pela, no ke aha la oe e koho nei ia Satana i haku nou; no ka mea ua akaka lea, o kou haku i malama ai ma keia ao, o kou haku no ia e noho pu ai ma kela ao.
                I home anei kou ma ka lani? I home anei ma ka po? Ano e koho ai.

                E huli i ke Akua hookahi la mamua iho o kou make ana," wahi a ka Rabi Eliekera i kona mau haumana. Pane mai la lakou, "Pehea la e maopopo ai i ke kanaka kona la e make ai, i huli ai oia i ke Akua i ka la mamua iho?" I aku la ka Rabi, "Ina pela, e aho no e huli i ke Akua i keia la. Malia paha o ka la apopo kou la e make ai. Pela e lilo ai kela la keia la i manawa e huli ai i ke Akua."