Ke Alaula, Volume V, Number 10, 1 January 1871 — Page 37

KE ALAULA.
BUKE V. HONOLULU, IANUARI 1871. HELU 10.

NA PAPA POHAKU O KE KANAWAI.

                Kanahakumamahiku la i hala o ka hele ana o na mamo a Iseraela mahope iho o ko lakou haalele ana ia Aigupita, hiki aku la lakou i ka Mauna o Sinai. Hoomoana iho la lakou ma ka papu ma ke alo o ka mauna, a kauoha aku la o Iehova ia lakou e hoomaemae ia lakou iho a e hoolaa i ka manawa, no ka mea, malaila e halawai mai ai o Iehova me lakou. Hookapuia hoi ka mauna i ole e hookokoke mai kekahi kanaka, a me kekahi holoholona, e pili i ka mauna. A i ke kolu o na la, oia ka la nui, weliweli, i iho mai ai o Iehova e halawai pu me lakou. Ma ia la kau mai la ke ao nui panopano, a uhi mai la kona eleele maluna o ka mauna. Alaila, kui mai la na hekili, anapa mai la na uila, a kani nui mai la ka pu e kahea ana i na kanaka. Iho mai la o Iehova maluna o ka mauna, a paapu koke iho la ka mauna i na lapalapa ahi mai o a o. Pii ae la ka punohu ana o na uahi i ka lani, nakulu ka honua, kani hou mai la ka leo o ka pu kahea, a loihi ke kani ana me ka leo nui weliweli. Haalulu na kanaka a pau i ka makau. Kahea mai la ka leo o Iehova ia Mose e pii aku. Pii aku la o Mose a olelo aku la o Iehova iaia, "E hoi hou aku oe a papa ikaika loa aku i na kanaka o aa auanei kekahi e hookokoke mai i kona make. E wiki oe, a e pii hou mai olua me Aarona." Hana iho la o Mose pela, a pii hou aku iluna o ka mauna me Aarona kona kaikuaana. O ke kanalima keia o na la mai ko lakou haalele ana ia Aigupita mai. A nalo aku la o Mose laua o Aarona maluna o ka mauna, ke welo mau nei na lapalapa ahi iloko o ka poeleele manoanoa a me na ao panopano e uhi paapu ana i ka mauna. Alaila, lohea ka leo weliweli nui e hoopuka ana i keia mau huaolelo:
                "Owau no o Iehova o kou Akua, ka mea nana oe i lawe mai nei, mai ka aina o Aigupita mai, mailoko mai hoi o ka hale hooluhi.
                "Aole ou Akua e ae imua o ko'u alo. Mai hana oe i ke kii i kalaiia nou, aole ma ke ano o kekahi mea ma ka lani maluna, a ma ka honua malalo, a maloko hoi o ka wai malalo o ka honua. Mai kulou oe ilalo ia lakou, aole hoi e hoomana ia lakou: no ka mea, owau no o Iehova kou Akua, he Akua lili, e hoopai ana i na hala o na makua maluna o na keiki a hiki aku i ke kuakahi a me ke kualua o ka poe e inaina mai ia'u, a e aloha ana hoi i na tausani o ka poe aloha mai ia'u a malama hoi i ko'u mau kanawai.
                "Mai hoohiki wahahee oe i ka inoa o Iehova kou Akua; no ka mea, aole loa e hoapono o Iehova i ka mea hoohiki wahahee i kona inoa.
                "E hoomanao i ka la Sabati, a e hoano ia la. I na la eono e hana ai oe i kau mau hana a pau, aka, o ka hiku o ka la, he Sabati ia no Iehova kou Akua. Aole loa oe e hana ia la, aole oe, aole hoi kau keikikane, aole hoi kau kaikamahine, aole hoi kau kauwakane, aole hoi kau kauwawahine, aole hoi kou holoholona, aole hoi ka malihini maloko o kou mau ipuka. No ka mea, i na la eono i hana ai o Iehova i na lani, a me ka honua, a me ke kai, a me na mea a pau oloko olaila, a i ka hiku o na la i hoomaha ai; nolaila i hoomaikai ai o Iehova i ka la Sabati, a hoano hoi ia la.
                "E hoomaikai oe i kou makuakane a me kou makuwahine, i loihi ai kou mau la maluna o ka aina a Iehova kou Akua i haawi mai ai ia oe.
                "Mai pepehi kanaka oe.
                "Mai moekolohe oe.
                "Mai aihue oe.
                "Mai hoike wahahee oe e hewa ai kou hoalauna.
                "Mai kuko oe i ka hale o kou hoalauna, aole hoi i kana kauwakane, aole hoi i kana kauwawahine, aole hoi i kona bipi, aole hoi i kona hoki, aole hoi i kekahi mea a kou hoalauna."
                A pau keia mau olelo, kahea mai la o Iehova ia Mose e pii hou aku i ka mauna, a e awe pu aku ia Aarona, a ia Nadaba a me Abihu, na keiki elua a Aarona, a me kekahi poe lunakahiko he kanahiku o ka Iseraela. A pii aku la lakou nei a pau. O ke kolu keia o ko Mose pii ana. A hiki aku lakou mawaena o ka piina o ka mauna, waihoia na lunakahiko me Aarona ma malaila, a kahea hou mai la o Iehova ia Mose e pii aku oia a hiki i ka piko o ka mauna, e loaa ai i na kanawai i kakauia maluna o na papa pohaku. Lawe ae la o Mose ia Iosua, a pii pu aku la laua. Mamua nae o ko laua pii ana, hooili aku la o Mose ia Aarona laua o Hura ka mana hoomalu maluna o ka Iseraela no ka manawa ana e kaawale aku ai. Alaila, pii aku la o Mose laua o Iosua a kokoke loa iluna, hiki i kahi e komo aku ai iloko o ke ao panopano weliweli e kau ana maluna o ka piko mauna, noho iho la laua malaila eono la. A i ka hiku o ka la, kahea hou mai la o Iehova ia Mose e pii loa aku iluna. Noho mai la o Iosua ilaila; a koma hookahi aku la o Mose iloko o ke ao a pii loa aku iluna o ka mauna. Ilaila i noho ai o Mose he kanaha la me kanaha po me ka ai ole i ka ai a me ka inu ole i ka wai. A kauoha mai la o Ie-