Ke Alaula, Volume V, Number 9, 1 Kekemapa 1870 — Page 33

KE ALAULA.
BUKE V. HONOLULU, DEKEMABA, 1870. HELU 9.

NA KIU E AMO ANA I NA HUA O ESEKOLA.

                Ke ike nei oukou i keia mau kanaka elua e amo ana i ka huhuiwaina, a e paa ana kekahi i na hua e ae ma kona lima. Nui launa ole hoi ua huhuiwaina nei i kaumaha ai na kanaka elua i ka huhui hookahi. Momona maoli paha ka aina kahi i ulu ai ua waina nei. Ina e nana oukou ma Nahelu, Mokuna 13 a me 14 e ike oukou i ka moolelo o na kiu he umikumamalua a Mose i hoouna ai e makaikai aku i ka aina o Kanaana.
                I ka lua o na makahiki o ka hele ana o na mamo a Iseraela, mahope mai o ko lakou haalele ana i ka aina o Aigupita, hiki aku la lakou i ka waonahele o Par na, i kahi i kapaia o Kadesa-panea (Nahelu 32:8) e pili kokoke ana i ka aina o Kanaana. O ke komo aku wale no koe i ka aina o Kanaana. Kuhikuhi aku la o Mose i ua aina nei e waiho ana imua o lakou, a hoolale iho la ia lakou e komo koke aku. Hopohopo nae na mamo a Iseraela, a noi aku la lakou ia Mose e hoouna mua ia kekahi mau kanaka e makaikai aku i ke ano o ka aina, a me na kanaka o ka aina, i lohe e lakou nei. Ae aku la no hoi o Mose i ko lakou manao. (Kanawailua, Mok. 1.) A me he mea la, ua waiho aku o Mose i keia noi a lakou imua o Iehova, no ka mea, ua kauoha no o Iehova ia Mose, e wae i umikumamalua mau lunakahiko noloko o na ohana he umikumamalua o ko Iseraela, i hookahi luna no kela me keia ohana, a e hoouna aku ia lakou e makaikai i ka aina. (Nahelu, Mok. 13:1,2.) Hana iho la o Mose pela. Hele aku la na kiu he umikumamalua, a makaikai aku i ka aina mai ka hema a i ka akau, a hoi hou mai. Kanaha la ko lakou makaikai ana. A i ko lakou hoi ana mai, a hiki lakou i ke kahawai o Esekola, oia hoi, o Huhuiwaina, lawe iho la lakou kekahi mau hua o ka aina i mea hoikeike na lakou e ike ai na mamo a Iseraela i ka momona o ka aina. Lawe lakou i na hua pomeraite, a me na hua fiku, a me kekahi huhuiwaina. A no ka nunui loa o ua huhuiwaina nei, ua auamoia e na kanaka elua. Hoi aku la lakou, a hai aku la i ka maikai a me ka momona o ka aina, me ka hoike pu aku i keia mau hua momona Aka hoi, ua makau lakou i ka nui a me ka ikaikai o na kanaka o ka aina. Elua wale no o na kiu i makau ,ole a paipai aku i na mamo a Iseraela e komo koke aku e like me ke kauoha a Iehova. O Kaleba a me Iosua ko laua mau inoa. Aka, ua makau loa na mamo a Iseraela i na olelo a na kiu he umi. Nolaila, ohumuhumu ia Mose i kona hooikaika ana mamuli o ka manao o Kaleba ma laua o Iosua. A ua kokoke lakou e hoopau ia Mose a e koho i alakai e ae, a e pepehi aku ia Kaleba me Iosua. Nolaila, inaina loa o Iehova ia lakou. Pepehi iho la oia i ua mau kiu nei he umi, a hoohuli hou ae la oia i na mamo a Iseraela e hoi hou aku i ka waonahele, ilaila e auwana ai a puni na makahiki he kanaha, e like me ka nui o na la a na kiu i makaikai ai i ka aina. (Nah. 14:26-34.) A hoohiki aku la no hoi o Iehova ia lakou, aole kekahi kanaka o lakou e komo aku i ka aina o Kanaana, koe wale no na kiu elua, o Kaleba a me Iosua. Aka e pau lakou i ka make ma ka waonahele, a o ka lakou mau mamo wale no ke komo aku i ka aina mahope o ka pau ana o na makahiki he kahaha.

                Mai ai oe i ka ai a ka mea maka ino.

NO KE KULA SABATI.

                E KE ALAULA—Aloha oe:— Ua ike au ma kou mau aoao he mau olelo pili i na kula Sabati. Ua ulu mai kekahi mau noonoo iloko o'u i keia mau malama i hala iho nei; a eia no ke ano.
                I keia mau makahiki i hala iho nei, ua mahuahua na kula Sabati, a i ka nana aku, ua "holo ka hana." no ka mea ua mahuahua mai na haumana. Ma kekahi mau apana ua pau ka hapa nui o ke anaina pule i ka noho i ke kula Sabati. He maikai no keia. Aka i ka nana ana ilalo loa o ka hana, me he la aole i puka pono mai ka hua o ka hana e like me ka nui o ka hana.
                Ala mai keia ninau: Ua komo anei ke kumu kula Sabati iloko o keia hana me ka manao pono? Nolaila ala hou mai keia ninau: Heaha ke kumu pono e hooikaika ai ke kumu iloko o ke kula Sabati?
                I ka nana ana i ke kumu o ke kukulu ana i na kula Sabati, eia no, i mea e aoia ai na kamalii, a me na keiki nui ae, ma ka olelo a ke Akua, i mea hoi e alakai ia lakou io Iesu la, i loaa ia lakou ke ola mau loa iloko ona.
                Nolaila aole pono i ke kumu e imi wale no i na mea e akamai ai na haumana ma ke ano o ka Baibala, aka e imi pu i ka pomaikai o kona mau haumana ma o Iesu la, i loaa ia lakou ke ola mau loa iloko ona.
                Ina pela, aia iluna, mai ka lani mai, e imi ai kakou i ke akamai i ke ao ana.
                O ke akamai o ke kanaka ma ke ano o ka ke Akua olelo, he maikai no ia; aka o ka hoopili maoli ana i ua olelo la i ka naau, o ka lilo ana o ke kanaka i haumana na Iesu, i keiki na ke Akua, oia ka mea oi loa aku o ka waiwai.
                Nolaila, e na hoa kumu iloko o na kula Sabati o Hawaii nei, e imi kakou i ka naauao mai a ke Akua mai; e imi i ke akamai mai ka Uhane Hemolele mai. He pono ia kakou e imi i ke ano o kana olelo me ka noi ikaika i ke Akua e ao mai ia kakou.   Aole oia wale no, aka e noi aku i ke Akua e hoomahuahua mai i ko kakou manaoio a me ke aloha.  Ina ua piha ko kakou mau naau i ke aloha ia Karisto a i kana mau keikihipa— ina me ka manaoio kakou e hooikaika ai, aole no kakou e nele i ko kakou uku nani mai ka Haku mai.
                Oiai nae e hilinai ana kakou i ka mana o ka Uhane Hemolele e hoopomaikai i ko kakou hana mai waiho aku kakou i na mea e hoohauoli ai na naau o na haumana. E hooikaika kakou i maikai ka himeni ana, i hooponopono maikai ia na hana a pau; i hoaponoia kakou e ka Haku he mau koa maikai.  KAHU KULA SABATI.

                O ke kanaka hoopaapaa, hoeueu oia i ka hakaka, a o ka mea holoholo olelo, hookaawale i na makamaka.