Ke Alaula, Volume V, Number 8, 1 November 1870 — KA PELIKANA. [ARTICLE+ILLUSTRATION]

KA PELIKANA.

E nana oukou i keia wahi manu ano e. O keia no kekahi o na manu i oleloia iloko o ka Baibala. E nana oukou ma Kanawailua 14:17; Oihanakahuna 11:8 Isaia 34:11; Zepania 2:4. O kekahi no keia o na manu haumia i na Iudaio. Ua ikeia keia manu ma na aina o ka Hikina, a ma Amerika Hema. Aia kona wahi noho ai ma ka waonahele, ma kahi kanaka ole. He manu lawaia keia. Kohu nene ke kino a me ka a-i. Ano e nae kona nuku. O kona nui i ka wa opiopio, ua like me ka nene makua. A i kona wa oo, ua pakolu aku kona nui i ko ka manu nene. Elua kapuai ka loa o ka nuku, a elua iniha ka palahalaha. Ma ka welau o ke a luna, he lou ikaika me he makau lawaia la. A ma ke a lalo, he eke ili e lewa-

lewa ana ilalo. He nui ae ka eke o kekahi, a emi iho ko kekahi. Mai ka hookahi galani a i ka ekolu galani ke ana e piha ai ua eke nei. Aia maloko loa o ka aina kona wahi e noho ai a e hana ai i kana panana, a i kona manawa e kii aku ai i ka ia, e lawaia ana no ia a piha ua eke nei, alaila hoi aku me ka lako pono no kona ohana. Akamai no hoi kana hana i ka lawaia ana. Aole no he hele hookahi i ka lawaia, e like me na manu e ae. Hele puulu no, he umi a umikumamamalua paha o lakou e lawaia pu ai. A hiki i kahi o ka ia, hoopuni iho lakou i na ia, me he poe lawaia upena la, a hoolahalahai aku i na eheu maluna o ka wai e ho-a ana i na ia a hiki i kahi papau, alaila o ka hopu koke aku no ia i ka ia me kahi lou o ke a luna, a hookomo iho iloko o kahi eke. Pela no e hana ai a piha kona eke alaila hoi aku. Ua oleloia ua hoolakalakaia keia manu e na Ilikini ma Amerika Hema, a ua hoounaunaia e lawaia. O kona hele no ka ia, a piha kona eke, hoi pololei mai no a haawi na kona kahu. Alaila mahele mai la ua haku nei i kona hapa. Kohu kanaka no ka hana a ua manu nei.