Ke Alaula, Volume V, Number 8, 1 Nowemapa 1870 — Page 31

31 KE ALAULA.

KA PELIKANA.

                E nana oukou i keia wahi manu ano e. O keia no kekahi o na manu i oleloia iloko o ka Baibala. E nana oukou ma Kanawailua 14:17; Oihanakahuna 11:8; Isaia 34:11; Zepania 2:4. O kekahi no keia o na manu haumia i na Iudaio. Ua ikeia keia manu ma na aina o ka Hikina, a ma Amerika Hema. Aia kona wahi noho ai ma ka waonahele, ma kahi kanaka ole. He manu lawaia keia. Kohu nene ke kino a me ka a-i. Ano e nae kona nuku. O kona nui i ka wa opiopio, ua like me ka nene makua. A i kona wa oo, ua pakolu aku kona nui i ko ka manu nene. Elua kapuai ka loa b ka nuku, a elua iniha ka palahalaha. Ma ka welau o ke a luna, he lou ikaika me he makau lawai la. A ma ke a lalo, he eke ili e lewalewa ana ilalo. He nui ae ka eke o kekahi, a emi iho ko kekahi. Mai ka hookahi galani a i ka ekolu galani ke ana e piha ai ua eke nei. Aia maloko loa o ka aina kona wahi e noho ai a e hana ai i kana pananai a i kona manawa e kii aku ai i ka ia, e lawaia ana no ia a piha ua eke nei, alaila hoi aku me ka lako pono no kona ohana. Akamai no hoi kana hana i ka lawaia ana. Aole no he hele hookahi i ka lawaia, e like me na manu e ae. Hele puulu no, he umi a umikumamalua paha o lakou e lawaia pu ai. A hiki i kahi o ka ia, hoopuni iho lakou i na ia, me he poe lawaia upena la, a hoolahalahai aku i na eheu maluna o ka wai e ho-a ana i na ia a hiki i kahi papau, alaila o ka hopu koke aku no ia i ka ia me kahi lou o ke a luna a hookomo iho iloko o kahi eke. Pela no e hana ai a piha kona eke alaila hoi aku.
                Ua oleloia na hooalaklakaia keia manu e na Ilikini ma Amerika Hema, a ua hoounaunaia e lawaia. O kona hele no ka ia, a piha kona eke, hoi pololei mai no a haawi na kona haku. Alaila mahele mai la ua haku nei i kona hapa.
                Kohu kanaka no ka hana a ua manu nei.

"KE KAUA HEMOLELE."
He Kaao nanenane, a na ka mea heluhelu e imi i kona pili ana.

                Ia'u e hele makaikai ana i na aina a me na wahi he nui wale, loaa aku la au i kekahi aina i kapaia o Honua. He aina nui a akea hoi. Aia kona wahi mawaena o Welau Akau a me Welau Hema, a ua puni kona mau aoao i na Kihi Eha o ke Aouli. Ua nui na muliwai o keia aina, a ua paapu i na kualono a me na kahawai nani; a ma kahi a'u i ike aku ai, ua nui na hua momona a ua maikai loa ka ea, e ani peahi mau ana na ala nohenohea. Ua nui no hoi na lahui o ia aina.
                Aole no i like loa ka ili a me ka helehelena o na lahui o ia wahi, a pela no hoi aole i like na olelo, a me na ano o ka noho ana, a me na oihana hoomana. Ua oleloia e kekahi poe, e like me ka like ole o na hoku o ka lani, kekahi me kekahi. pela hoi ka like ole o na lahui o ua aina nei o Honua.
                Aia hoi ma ia aina kekahi kulanakauhale hiwahiwa, i kapaia ke kulanakauhale o Kanaka. He kulanakauhale ano e loa keia o kona kukuluia'na. Nani maoli no hoi kona kulana, a ua lako pono oia i na mea a pau e pomaikai ai na kamaaina o loko, i hiki pono ke oleloia aole kona lua malalo o ka lani a pau loa.
                O kahi i kukuluia'i keia kulanakauhale, aia mawaena o Waokino a me Waouhane, a i kuu hakilo ana i na moolelo kahiko loa, o ka mea nana i hookahua a i kukulu i ua kulanakauhale nei o Kanaka, oia no o Saka'i, oia hoi o Manaloa ma ka kakou olelo. I kukulu no oia i ua kulanakauhale nei nona iho no. Ua nui na mea e ae ana i hana ai ma ia aina, aka o keia kulanakauhale o Kanaka, ke pookela o kana mau hana a pau malaila. Ua hoonaniia n nani loa i ka nana'ku, oiai ua oleloia e kekahi poe ua lilo kona nani a me kona maikai i mea e mele hauoli ai na anela i ko lakou makaikai ana iaia.
                E like hoi me ka nani pookela o ua kulanakauhale nei, pela no hoi ua haawiia iaia ka mana alii maluna o ua aina nei o Honua, malalo nae o ke Alii nui, o Saka'i. A ua kauohaia na mea a pau o ia aina e mahalo aku, a e noho hoolohe malalo o ka malu alii o ua kulanakauhale nei.
                Iwaenakonu o ke kulanakauhale ua kukuluia he Hale Alii nani a ikaika hoi. O kona ikaika, ua like me ka pa-kaua; o kona maikai, ua like me ka mala nani i piha i na pua aala a me na hua momona; o kona nui, ua hiki ke hookomoia na mea a pau iloko ona.
                I kukulu ke Alii Saka'i i keia Hale Alii nona wale iho no; ua hookapuia na mea e ae aole e noho malaila. Ua hoolilo ia no hoi ua Hale Alii nei i pakaua e malu ai ke kulanakauhale i ka enemi, a ua kauohaia na kamaaina o ke kulanakauhale e kiai a e malama pono i ua pakaua nei.
                Ua hoopuniia ke kulanakauhale mawaho e ka pa kiekie a ikaika, a pela no hoi na pa maloko, e mahelehele ana i na alanui a me na alaiki. A no ke akamai loa o ka hanaia'na, aole no he enemi ikaika e hiki ai ke wawahi ina e lokahi ana na kamaaina o loko i ke kiai a me ka pale aku. Aia wale no a ae ia e na kamaaina, alaila komo mai na enemi o waho.
                Elima mau puka nui ma ka pa o ua kulanakauhale nei, kahi e puka aku ai a e komo mai ai. A e like me ka ikaika o ka pa, pela no hoi ka ikaika o keia mau puka; aole no e hiki ke weheia aia wale no a ae ia e na kamaaina. Eia na inoa o ua mau puka nei: o ka Puka Pepeiao, ka Puka Maka, ka Puka Waha, ka Puka Ihu, a me ka Puka Haha.
                Ua lako hoi ke kulanakauhale i na mea a pau e ola maikai ai na kamaaina. A o na kanawai hoomalu o ua kulanakauhale nei, he mau kanawai pololei a hemolele loa. I kinohi no hoi, aohe mea apiki, a kolohe, a kipi hoi iloko ona. Ua lokahi pu na kamaaina a pau e malama pono i na kanawai a ke Alii, a Saka'i. A i ko lakou wa i noho ai pela, ua uhi mau mai ka malu aloha a me ka mana hoopomaikai o ke Alii i ke kulanakauhale.
                I kekahi manawa nae ua ala kue mai kekahi enemi nunui, ikaika, o Diabolo kona inoa, a ua kapa mai oia i ua kulanakauhale nei o Kanaka, me ka manao e lawe pio iaia, a e lilo ia i wahi e noho ai nona.
                Maanei e oki ai kakou no keia manawa, a ma keia malama ae e ike hou aku kakou no ua Alii nunui, eleele nei, a me kona kaua ana i ua kulanakauhale nei.
                Ma ka hoopili ana o keia kaao, e maopopo no paha i ka poe heluhelu ka imi ana ma na inoa i haawiia. Oia hoi, o ke kulanakauhale o ke kino kanaka no ia; a o ka Hale Alii, o ka puuwai no ia; a pela aku.
                Ua unuhiia keia nanenane no loko o ka olelo Beritania, a ua haku mua ia ma ia olelo e Ioane Buniana, ka mea nana i haku ka "Hele Malihini ana."

MAI HOOPA I KA MEA E ONA AI.

                Iloko o kekahi makahiki i hala mua aku nei, ua liia kekahi keiki no ka pepehi ana i kona wahi kaikaina uuku. A i kona wa i ku ai malalo o ka amana, i aku la ka luna makai iaia, "Ina he olelo kau, eia ka manawa; no ka mea, elima wale no minute koe o kou ola ana."
                Kahe ae la na waimaka o ke keiki, a i aku la oia: "E make ana wau. Hookahi wale no o'u wahi kaikaina uuku. Nani kona mau maka a me kona lauoho. Aloha nui no hoi au iaia. Aka, i kekahi la ua ona wau. O kuu ona mua ana no ia. Hoi mai au i ke ahiahi me ka ona, a loaa ia'u kuu wahi pokii ma ka mala, e ohi ana i na ohelopapa. Ala kumu ole mai ka huhu iloko o'u, lalau aku la au i kekahi kope opala, hahau aku la ma kona poo, a make koke iho la ia. Aole nae au i ike i ka'u mea i hana ai, no ka mea, ua pupule loa wau i ka ona. A ia kakahiaka ae, ala ae au mai kuu hiamoe ana, eia ka, ua hopuia wau a hoopaaia no ka pepehi ana iaia. Hai mai la lakou ia'u, i ko lakou loaa ana i kuu wahi kaikaina, ua make loa, ua nahaha kona poo, ua hu kona lolo, a ua paapu kona oho melemele a me kona maka i ke koko. Na ka wai ona keia hana. Oia ke kumu o kuu poino. Hookahi wale no a'u ona ana. Eia kuu olelo hope loa a hele aku au e halawai me ka Lunakanawai o ko ke ao nei a pau. E ka poe opiopio a pau, ole, ole, ole loa e hoopa iki aku i kekahi mea e ona ai!"
                E na pokii, e noonoo nui oukou i keia mau olelo a ua keiki nei. E wela ole anei ke kanaka ke lalau aku i ke ahi?