Ke Alaula, Volume V, Number 6, 1 Kepakemapa 1870 — Page 24

24 KE ALAULA.

 

KOA LIILII O IESU.

Leo: " LITTLE SOLDIER OF THE CROSS."- Songs of Gladness.

Eu na koa, ko-a o le - au, Ko-a lii-lii o Ie - su, Eu a ko-a no Ie - su. Nu - i

no na e-ne-mi, Pai-o e, a hoo-au-hee; Ie-su no ka Lun-na ma-na ke ko-ku-a

HUI

Ku, ku, ku a mau-we mau I ka na-na. I ka na-ni Nu-i no-na e-ne-

mi, Pai-o e, a hoo- au- - - hee; Ie-su no ka Lu-na ma-na ke ko- - ku - - a.

2. E na koa, koa o Iesu,.

Kona liilii o Iesu.

Eu a koa no Iesu;

Paa ka hae, a paio pu,

Me ka wiwo ole no;

Iesu no ka Luna hele e maua ia.

HUI.- Ku, ku, ku, & c.

 

3. Eu na koa, koa no Iesu,

Koa liilii o Iesu.

Paio no ka naauao,

Pale i ka naaupo,

Pale, kiai, a kaoo;

Iesu no ka Luna mana ke kokua.

HUI.- Ku, ku, ku, & c.

 

4. Eu na koa, koa no Iesu,

Koa liilii o Iesu.

Nauwe me ka makaukau

Mai pauaho, mai makau.

Kikoo i ka home mau.

Ma na papu lani pua mau a nani.

HUI.- Ku, ku, ku, & c.

 

MAKE NAAUPO.

            Ua hele kekahi wahine e ike i kona mau makamaka. Aia ko lakou hale ma kahi kokoke i ka muliwai nui. A kokoke i ka hale, he pali kiekie, e haule pololei anu ilalo i ka muliwai. Iaia hoi e noho ana ma ka hale, nanea iho la oia a aumoe: He po poeleele loa no hoi. Paa no nae kona manao e hoi aku i kona wahi iho ia po no. Aua no hoi na makamaka iaia e noho a ao; hoole no oia. Alaila koi aku lakou iaia e lawe pu i ke kukui hele po, i ike pono ia ke alanui. Hoole hou no ua wahine la. Wahi ana, ua kamaaina oia i ke alanui, aole no hoi i makau i ka pouli, aole make kukui. O kona hele no ia me ke kukui ole. A kakahiaka ae, i nana ka hana, aole no i hiki aku i kona hale. Huliia a loaa kona kino make e lana ana iloko o ka muliwai ma ke kumu pali. Eia ka, ua huhewa kona hele ana iloko o ka pouli, haule i ka pali, a make mamuli o kona paakiki iho. Ina paha ua lawe oia i ke kukui, ina no ua palekana ka hele ana.

            Ua nui paha ka poe i like me keia wahine naaupo. Ua hoole lokou i ka malamalama oiaio o ke Akua, nana e alakai poho ia lakou iwaena o ka pouli o keia ao, a ua haule lakou iloko o ka make mau loa.

 

            I ka manawa i noho ai o Harisona i Peresidena no Amerika Huipuia, ma Wasinetona, hoopii mai la ka luna , o na mea kanu iaia e imi oia i ilio e kiai i na laau hua, i malu i na keiki kolohe. Pane aku la ka Peresidena, "E aho e hoonoho i kumu kula Sabati e kiai i na keiki."

 

            O ke kanaka naauao, he akahai, no ka mea, ua ike oia i kona naaupo iho. O ke kanaka naaupo, he hookiekie; no ka mea, aole ia i ike i kona naaupo iho.

 

KE ALII I HOOPUIWA IA.

            Ua hele o Mr. Mopika, ka misionari, e launa aloha me kekahi alii o Aperila, he mau haneri mile iuka o Sataku, ma Aperika Hema. O ka inoa o keia alii o Makaba. He kanaka kaulana ma na kaua, a he makau loa kona enemi iaia.

            Hoao na kanaka e hoololi oe i ka manao o keia misionari i hele ole, me ka i ana he make no ka hope ina e hele. Aka, paulele oia i ke Akua, ka mea oi imua o ke alii, a ua hele. Hookipa no o Makaba i keia kanaka pono, me ka mahalo, a ua hana aloha iaia. Nui ka niele ana o ke alii no ka Euanelio o Karisto.

            I kekahi kuka ana me keia kanaka e na kaua a me ka hookahe koko; (a ua puni oia me na luna ona he kanalima a kanaono paha, a me ke poe hana ua kekahi,) ua hai mai o Mr. Mopika no ke ala hou ana. "Heaha," wahi a ke alii me ke kahaha, "heaha ia mau olelo no ka poe i make? O ka poe make, E ala ka ka poe i make!"

            "Ae" wahi a ka misionari. "E ala anei ka poe a pau i haule ma ke kaua ana ?" "Ae" mai no ka misionari, "E ala ana anei ka poe i pepehi ia, a ia ia e na liona, na tiga a me na korokodila?"

            "Ae, a e hele no i ka hookolokolo." Kahea nui ae ke alii, "E hoolohe, e ka poe akamai, a naauao, ua lohe anei ko oukou, mau pepeiao i ka nu hou kupanaha, i lohe ole ia mamua?" Huli ae ia i kekahi elemakule, ke kanaka akamai o kona lahui, me ka i ana, "Ua lohe anei oe i ka nu hou e like me keia mamua?"

            " Aole loa," wahi a ka elemakule "Ua manao au ua pau ia'u ka naauao a pau o ka poe o na kau i hala, a ua pio kuu manao ma ka lohe ana i keia mau olelo. Ua ola paha ka mea nona ia mau olelo mamua loa o ka hanau ana o kakou."

            Huli hou ke alii i ka misionari me ke kau ana o konu lima ma kona puuwai, i aku ia, " E kuu makua, nui ko'u aloha ia oe. Ua maemae loa kuu naau me he waiu la, ma keia launa ana me oe. O na olelo o kou waha, he meli no lakou ; aka, o na olelo no ke ala hou ano, he hohonu loa, aole loaa ia'u. Aole au i makemake e lohe i ke ala hou ana o ka poe i make. Aole hiki i ka poe make e ala hou. Aole no au e ae e ala hou mai lakou."

"E hai mai, e kuu makamaka, no keaha la i papa ia mai ia'u, mai kamailio no ke ala hou ana?"

            O ae la ke alii i kona lima i ikaika ma na kaua, a hooluli ae me he la he ihe e paa ana ma kona lima, a pane ae la ia, "Ua pepehi au i na tausani, a e ala hou anei lakou?"

            I kona hoomaopopo lea ana i keia olelo a ka Baibaila, e hui hou ana me ka poe ana i pepehi ai, kaumaha iho la ia, maka'u loa ia. He mea weliweli io no ka manao e hui hou ana me ko poe a kakou i hoino a i pepehi ai paha.

            Ke hoomanao nei anei ka mea kuai rama, o na kanaka a pau ana i pepehi ai, a o na ohana a pau i nele paha ma o na la, e hui hou ana ma ke ala hou ana? Pehea ia halawai ana ?

            Hoomanao anei ka palaualelo, e hui hou ana oia me ka poe a pau ana i alakai hewa ai; ina ua hehi oia, i ka la Sabati; ina ma ka pili waiwai; ina ua hele i na wahi, lealea ino? E ike ana i ka hope o kana alakai ana, ma o ae o ka lua kapapau.

            Malaila e hui ai he maka he maka me ka poe a pau i nana ia kakou e kokua, aole nae i kokua ia. Auwe ia halawai ana ma ke ala hou ana!

 

NA WAI ONA.

            Ua oleloia ua ohiia na oka i kiolaia iwaho o na hale ma na alanui o Kikago, a baila pu ia iloko o na ipuhao nui, alaila kukuluia iloko o na pahu a hu, a noloko o ka barela hookahi, ua loaa ekolu pauna kele sopa, a eha galani wai ikaika. A o ua wai ikaika nei, ua kawiliia a lilo i barani, a i bia, a i wai ona o kela ano keia ano. Hoopailua ole hoi ko poe inu ia mau mea.

 

            O ka makamaka hoopilimeai, ua like no a me ke aka o ke kanaka, ka pipili ioa i ka wa

e mehana pono ai ka la, a nalowale koke ke uhi mai ka pouli o na ao.

 

            O ka naauao kanaka, he kukui ia i kau ia ma ka hope o ka moku e hoomaopopo ana i na mea i hala aku. O ka naauao mai ka lani mai, he kukui i kau ia ma ke poo o ka moku, e hoomalamalama ana i ke ala e hele aku ai.

 

            E lulu aku i na manao maikai, aole nae e emi ka waihona oloko.