Ke Alaula, Volume V, Number 6, 1 September 1870 — Page 21

KE ALAULA.

BUKE V. HONOLULU, SEPATEMABA, 1870. HELU 6.

 

KA MOKUAHI.

            Nani hoi keia Moku nui, ikaika, holo mau. He mea ole iaia ka pohu, a me ka makani mamua mai. No ka mea, aole ia i paulele aku i na makani lauwili i mea e holo ai. O ka mahu ke kumu o kona holo. He mau ipuhao nui iloko o kona opu. A ua hoopihaia keia mau ipuhao i ka wai, a ho a ia ke, ahi malalo iho. A baila ka wai, pii ae la ka moku iloko o kekaia iloko o laila a ikaika loa. Alaila, alakaiia kona ikaika iloko o na ohe hao, a kui aku i na hao nana e hookaa i na huila. O ka pai aku no ia o na hoe huila i ka ili o ke kai, holo ka moku. Ina e kuuia ka ikaika a pau o ka mahu, holo mama loa ka moku. Aohe lio mama e launa iki aku i kona holo ana. No ka mea, o ka Mokuahi mama i ka holo, ua holo oia he 12 a 15 paha mile i ka hora hookahi. Oia hai he 3OO a oi na mile i kela la keia la. He nui no hoi na ano o na mokuahi. Uuku kekahi, nunui kekahi, he pea ko kekahi, a he pea ole kekahi, he moku laau kekahi, a he moku hao kekahi, hookahi huila mahope ko kekahi, elua huila mahope ko kekahi, elua huila aoao ko kekahi. Ke ike pinepine nei ko Honolulu poe i na mokuahi e ku mai nei, a e nui aku ana ma keia hope aku. O ka waea Telegarapa koe. Ua manaoia he mau makahiki wale no koe, a e hoomoe ia ana ka waea Telegarapa malalo o ka moana, mai Kapalakiko mai a hiki i Hawaii nei, a mai a nei aku a hiki i hea la. I Kina paha, a i Iapana paha, a i na aina e ae paha. Alaila, e noho no ke kanaka ma Honolulu, a e kamakamailio pa me kona hoa ma Kapalakiko, a ma Nu Ioka paha, a ma Ladana paha, me he ike maka la. Ko io no ka wanana, "He nui ka poe e holo ana i o a ianei, a e mahuahua ana no ka ike."—Dan. 12:4.

 

KE KUPINAI.

            O Keoki Liiiii, he wahi keiki uuku ia, aohe nae ia i ike i ke ano o ka leo kupinai. Hele aku la ua wahi keiki nei ma ka ululaau, a hooho aku la penei, "Ho-o—ho ! " Lohe aka la ia i ka leo e pane ana mai, "Oho." Kahaha iho la ko Keoki manao. Kahea aku la ia, "Owai oe? " Pane hou mai la ka leo, " Owai oe ? " I aku la kahi Keoki, "Naaupo oe." Pane mai la no hoi kela," Naaupo oe."

            Huhu loa iho la ua wahi Keoki nei, a kuamuamu aku la ma na inoa ino he nui wale. O na olelo ino nae a pau ana i nuku aku ai, ua pau i ka hoihoiia mai iaia. Alaila imi ua wahi Keoki nei i ka mea nana ia leo, e ake e peahi iaia, aole nae i loaa. Alaila, hoi ua wahi keiki nei, a hai aku la i ka makuahine. "He keiki ino, pakike, aia iloko o ka ululaau, ua piha kona waha i na olelo ino a pau."

            I aku la ka makua, "O oe no ua keiki la, a na keia ua hoahewa oe ia oe iho. E noonoo iho oe. O na olelo au i haawi aku ai, oia ka i hoihoiia mai ia oe. E like me kou ike ana i ke aka o kou maka iloko o ka pa wai, pela oe i lohe ai i kou leo ponoi iloko o ka ululaau, he kupinai ia. Ina i hea aku oe ma na olelo maikai, ina no ua hoihoiia mai na olelo maikai."

            Pela i ko kakou noho ana ma ke ao nei. Ina e hana pono aku kakou i kanaka, e hana pono mai ka nui o lakou ia kakou. Aka, ina e hana ino aku kakou, e hoihoiia mai auanei ke ino maluna o kakou. " E waiho i ka hana ino. E ao i ka hana pono."

 

KE ALELO.

            No ka nui o kona ikaika, nolaila ua haawi ke Akua i ke kino liilii iaia. Aole no hoi i hoonoho palua ia ke alelo, e like me na lima a me na wawae, o nui aku auanei kona paakiki. Ua lawa no ka ino o ke alelo hookahi. A ina he oiaio ka olelo a ka Baibala, he mea laka ole ke alelo hookahi, oi loa aku paha ke paluaia. Me he mea la hoi, no kona ano ahiu nolaila, ua hookomo ke Akua iaia iloko o kahi e paa pono ai, me he lio ahiu la. A i mea hoi e hemo ole aku ai iwaho, ua paluaia ke kukuluia ana o ka pa a puni. He pa niho maloko, a he pa lehelehe e papani hou ana mawaho.

 

NA ANUU ELIMA.

            Ua hookolokoloia kekahi kanaka no ka pepehi-kanaka. A i ka hookolokolo ana, ua ku ka hewa iaia, a ua kau ka hoopai o ke kanawai maluna ona, e liia a make.

            Iaia e noho ana iloko o kona keena paa, ma ka halepaahao, e kali ana i kona la e make ai, kahakaha iho la oia ma ka paia o kona lumi, he kii e hoikeike ana i ke kanaka e lewa ana malalo iho o ka amana, a ma kekahi aoao o ka amana, he mau anuu elima e pii aku ai a iluna o ka amana. A ua kakau inoa ia ua mau anuu nei. Ma ke anuu mua e pii aku ai, kakau iho la oia i ka inoa, o "Hookuli i na luakini." Wahi a Solomona, "O ka maka i hoowahawaha i kona makuakane, a hookuli hoi i ka olelo a kona makuahine,i na na koraka o ke awawa e kiko ae iaia, a na na aeto opiopio e ai iho.'—Sol. 30:17.

            Ma ke anuu elua ua kakauia, "HEHI SABATI." Ua kauoha mai o Iehova, " E hoomanao oe i ka la Sabati, e hoano ia la." O ka poe i ike a malama ole i keia kanawai, ua hoomaka lakou e holo aku ma ke alanui laula o ka make. Ma ke anuu ekolu ua kakauia ka inoa, "Piliwaiwai a me Inu ona."

            Oiaio no, o ka mea malama ole i ka la Sabati, e komo aku auanei oia iloko o na hana o ia ano.

            Ma ke anuu eha, kakau iho la ia i ka inoa, "Pepehi-kanaka."

            A o ka lima, oia hoi ke anuu hope loi o lakou a pau, e ku ana maluna pono o kahi e liia'i, ua kakauia ka inoa, "Make."

            Me he mea la, i kona kahakaha ana i keia mau anuu me ko lakou mau inoa, e hoakaka ana oia i ka moolelo o kana mau hana, mai ka hoomaka ana a hiki i kona make mainoino.

            E noonoo oukou, e ka poo opio, i keia mau anuu, i ole oukou e pii aku a i kahi e haule ai iloko o ka make mau loa.

 

KA ELEMAKULE OPIOPIO.

            Ninau aku la kekahi Moi o Peresia i kekahi elemakule poohina e ku ana imua o kona nohoalii, "Ehia kou mau makahiki?"

            " Eha wale no o'u mau makahiki," wahi a ka elemakule.

            Pane aku la ke Alii, "Aole ka ou makau i ka wahahee mai ia'u? "

            "Aole au i wahahee," wahi a ka elemakule. "Kanawalu na makahiki loihi a'u i hoomaunauna wale ai ma ka lealea lapuwale, a ma ka hoahu ana i ka waiwai, aole hoi e hiki ia'u ke lawe pu aku i kekahi o keia mau mea a pau i kuu wa e haalele ai i keia ao. Eha wale no makahiki a'u i hoolilo ai ma na hana pono. Makehewa kuu helu ana i na makahiki i lilo i ka ole. O na makahiki hana io wale no ka'u e helu ai."