Ke Alaula, Volume V, Number 5, 1 ʻAukake 1870 — Page 18

18 KE ALAULA.

 

KE ALAULA.

He Nupepa Hoikeike Kii,

Hoopau mau ia ma Honolulu, i kela malama keia malama e ka PAPA HAWAII, no na Kamalii Hawaii.

25 keneta ka uku no ka makahiki no ka pepa hookahi; 20 keneta pakahi ka uku no na pepa ke iwakalua a oi aku paha ma ka ope hookahi, ME KA HOOKAA MUA IA MAI. A. O. POLEPE, Luna Hoopuka.

 

            I ka malama i kaahope ae nei, ua hoopuka makou i kekahi kumumanao e pili ana i ka oihana Kula Sabati, me ke noi pu aku i na makamaka e kakau mai i na manao ma ia mea, i loaa ko kakou kamailio pu ana ma keia wahi nupepa a kakou no ia mau mea. Eia nae, aole i loaa mai ua mau manao nei. Nolaila, e hoomaka ana makou i ke kamailio mua, a malia paha he malamalama okoa ae ko kekahi. Na ia la hoi e hoike mai mahope.

            Eia ke ano nui o ke kumumanao. Heaha la ka pili ana o ke Kula Sabati i ka Ekalesia ?

            1. Ma kekahi mau wahi, ua malamaia ke Kula Sabati ma ke ano ahahui okoa, me he mea la, aohe kuleana o ke Kahu a me ka Ekalesia iloko o ka hooponopono ana o ke kula. Na na haumana a me na kumu o ke Kula Sabati wale no e kohu i ko lakou kahu, a na kela papa keia papa e koho i ko lakou kumu iho, a na ke kula holookoa e hooholo i na hana. A o ka mea i holo ia lakou, ua holo iho la. Aole e nana mua i ka manao o ke Kaha Ekalesia.

            2. Ma kekahi mau wahi no hoi, ua kukuluia he Ahahui Kula Sabati a o ke Kahu Ekalesia a me na kumu o ke Kula Sabati a me ke Kahu o ke kula na lala o ua Ahahui nei. A na ua

pili ana i ko lakou kula.

            3. Ma kekahi mau wahi no hoi, ua kohoia ke Kahu o ke Kula Sabati e ke Kahu Ekalesia a me ka Ekalesia, a ua malamaia na hana a pau o ke Kula Sabati malalo o ka malu o ka Ekalesia.

            Me he mea la o ka hapanui paha o na Kula Sabati o Hawaii nei, ua komo malalo o ka papa noonoo kakou, mahea ka oi o ka maikai a me ka oiaio, i loaa ia kakou na ano a pau e holo ai na oihana Kula Sabati imua.

            Ua ike kakou mamua iho nei, i ke ano nui o ke Kula Sabati, he kula kahi e aoia'i ka ike ma na mea o ke aupuni o ka lani, a e alakaiia'i na uhane o na haumana io Iesu Kristo la e loaa'i i ke ola mau loa. Ina he oiaio keia, alaila, o ke kahua paha ia a kakou e hoonoho mua ai, loaa

            1. Aia iloko o ka Ekalesia ka waihona o na oihana o ka pono uhane a ka Haku i haawi mai ai, i mea e hoohulia'i na uhane o kanaka mai ka make ae a i ke ola. A o kekahi o keia mau oihana, oia no ka hai ana a me ke ao ana i ka Euanelio o Kristo.

            2. Aole na ka poe oo a me ka poe ui wale no na pomaikai o keia Euanelio, aka, na ka poe opiopio no kekahi. Ua haawiia na olelo ao, na olelo hoolana, na olelo hoopomaikai, na kauoha na kahawai, na moolelo, a me na wanana, i na makua a me na keiki pu. Nolaila, elua mahele nui a kakou i ike ai e noho ana malalo o ka malu o na oihana Ekalesia ; o na MAKUA a o na KEIKI.

            3. Aka, aole e hiki ke hoonaauao pono ia na keiki ma na mea o ka Baibala, ke ole e hookaawaleia kekahi manawa okoa no ia ano hana.

            4. Ina e hooko pono ana ka Ekalesia i na hana a pau' i waihoia mai iaia, e kukulu ana ua Ekalesia nei i kula kahi e aoia'i na keiki ma na mea o ka Baibala, a e alakaiia'i na hipa keiki imua o ke Kahuhipa nui, ka Haku Iesu Kristo. A o ke ano no ia a kakou i ike mua iho nei o ke Kula Sabati. A o ka Ekalesia i loaa ole i kona Kula Sabati, a mau Kula Sabati paha, ua hemahema ; aole no i hooko pono ia kona mau oihana a pau.

            Ina ua pololei keia mau manao eho, alaila, ua maopopo paha he pono ke manaoia, he lala ke Kula Sabati no ka Ekalesia, a o ka poe hooponopono i ka Ekalesia, o lakou no ka poe kupono e hoomalu, a e hooponopono i na ano a me na hana o ke Kula Sabati. O ke Kahu Ekalesia, oia no ka Makua o ke Kula Sabati, a he mea pono ke ike oia i na hana a pau o ua kula nei, a ke launa ia mai e ke kahu a me na Kumu a me na haumana a pau o kona Kula Sabati. Aole hoi he pono ia lakou ke hana i na mea kue i ka manao o ke Kahu Ekalesia a me na luna hooponopono o ka Ekalesia.

 

KA HELE ANA O KA WAHINE PILIKIA IO IESU LA.

            Me he mea la ke ike nei au i kekahi keiki uuku e holo ana ma ke alanui o kekahi kulanakauhale, a e kahea ana "Hosana i ke keiki a Davida !"

            E ku ana kekahi wahine ilihune, mai, ma ka puka o kona hale, a lohe aku la oia i ka leo o ke keiki.

            Ninau aku la ua wahine nei, "heaha kau e olelo nei?"

            Pane mai la ke keiki " Aole ka i lohe oe no Iesu o Nakareka ? Ua hoola oia ia Batimea ka makapo, ka mea e noho ana ma kapa alanui e makilo ai; ua hoola no oia i kekahi kanaka opiopio mai ka make mai, a hoihoi ola aku iaia i kona makuahine oiai e hele kanikau ana ka huakai hoolewa e manele ana i kona kino kupapau ma ke alanui; a ua hoola no hoi oia i na lepera he umi i ka wa hookahi; a ua lawe mai na kanaka i ko lakou poe mai, a waiho imua o kona mau wawae, a ua hoola oia ia lakou a pau ; a o ka poe mai a pau i hoopa wale aku no iaia, ua hoolaia." I iho la ka wahine, " Ina he oiaia keia, e hiki paha auanei iaia ke hoola i kuu heekoko, ka mea i hooeha mai ia'u i keia mau makahiki he umikumamalua. Ninau aku la hoi oia i ke keiki, "I ka wa hea la e hiki mai ai oia maanei, e kuu wahi kanaka uuku ?"

            Pane maila ke keiki, "Eia'e ma ke alanui. O ka hiki mai koe. Aia la ! aole ou lohe i ka walaau o kanaka? Eia, ke hele mai nei lakou!

Hosana ! Hosana i ko keiki a Davida!" a holo aku la ke keiki e hai koke aku i kona makuahine.

            I iho la ka wahine me ka hopohopo, "Pono paha e hahai aku wau mahope ona. E manao ole mai paha oia ia'u; aka, ua olelo mai kahi keiki, o ka poe a pau i hoopa aku iaia, ua hoolala lakou a pau. E hoao wale uku paha wau."

            Me he mea la ke ike nei au i ua wahine ilihune nawaliwali la, kahei ae la ia i kona aahu weluwelu, a hele hoolulelule aku la mawaena o ka puulu kanaka. Hookeia mai la oia ma kapa alanui, aole nae i pio kona manao. I iho la oia "E hono hou no wau." Huli hele aku la oia ma kela aoao keia aoao, a kokoke loa aku i ka mea ana i imi ai, hooke hou ia e na kanaka, a nalowale hou aku o Iesu imua. Aka, hoomanawanui hou no oia, no ka mea ua maopopo iaia

ina aole e ola kona heekoko, e lilo ana ia i make nona. A i kona hooikaika ana e hee aku imua me he la ua loheia ka leo huhu o kekahi o ninau ana iaia "Heaha hoi kau e hooke nei? he mai ino, haumia kou, aohe ou kuleana maanei." Pane aku la hoi oianei, " Ke ike nei au aia aku imua ke kanaka kaulana nana i hoola i na mai he nui loa. E ae mai ia'u e hoopa wale aku i kona aahu, malia paha e ola hoi au." Nee hou aku la ua wahine la, a lohe oia i ka leo nahenahe a Iesu e kamailio ana ia Iaero no kona hele ana i kona hale e hoola i kana kaikamahine uuku e waiho ana ma ka welelau o ka make. Kikoo aku la ka wahine i kona lima, aole nae i kokoke pono. Nee hou aku la ia imua, a pa aku la i ke kapa o Iesu. Aole no hoi i ke kapa ponoi; i ka lepa wale no o kona aahu. Ia manawa iho no, ua ola koke kona mai, a komo hou mai ka ikaika iloko o kona kino nawaliwali. Nani hoi ka hauoli o ua wahine la! I hoopa wale aku no ia Iesu, a o ke ola koke no ia.

            E na pokii aloha, a me na makamaka heluhelu Alaula ; ina he mana ma ke kapa aahu o Iesu e hoola i na mai o ke kino, aole anei he mana kona koko e hoola i na mai o ka uhane? E hele koke io Iesu la, a e loaa no ke ola mau loa.

 

PIPILI KA OLELO WAHAHEE.

            E kamailio ana kekahi, kumu kula Sabati me na haumana o kona papa. No ka wahahee ke kamailio ana. Ninau aku la ke kumu i kekahi o na haumana "E ae anei oe e wahahee i mea e loaa mai ai ka hapawalu." Hoole mai la ke keiki, "Aole." A pehea hoi ina he dala okoa ?" "Aole no," wahi a Diki. "A ina he tausani dala?" Noonoo iho la o Diki; he puu dala nui ia. Ina e loaa iaia na dala he tausani, hiki iaia

ai. Loaa na pahi pelu, na mabala, na moku hooholo, na lupe, na kamaa buti, a me na mea e ae he nui wale. Iaia e kanalua ana, pane koke ae la kekahi, " Aole e ae no na dala he tausani.'' Ninau hou ae la no ke kumu "No ke aha ?" "No ka mea" wahi a ka haumana, " Aia a pau ke tausani dala, a pau hoi na mea i kuaiia me ia mau dala, e koe ana nae ka wahahee; he mea pipili loa kela." Oiaio no, e na pokii, o na olelo hoopunipuni a me na olelo wahahee i puka aku, e lilo ana i mau haawina kaumaha maluna o ke kanaka ma ia hope aku.