Ke Alaula, Volume V, Number 3, 1 June 1870 — Page 9

KE ALAULA.

BUKE V. HONOLULU, IUNE 1870. HELU 3.

 

HALE PULE MA APAIANA.

                Ma ke Alaula no Aperila iho nei, Helu 1 o keia makahiki, ua ike oukou i ke kii o na hale o Binamu ma, i wawahiia e na pegana ma Apaiana, iloko o ka makahiki 1869 iho nei.

                I keia malama, ke hoopuka nei makou i kekahi kii e ae no ia wahi no. O kahi hale nui a oukou e ike nei ma keia kii, oia ka hale pule i kukuluiai ma Apaiana e Binamu laua o Kanoa. Aia ke Alii o Apaiana, e hele ana i ka halawai me kona mamalu. A maanei mai o Kanoa e puhi aha i ka pu. Mahope mai, ke hele nei o Binamu me kana wahine, a mahope iho o laua, ka wahine a Kanoa, o Kaholo, me ka laua keiki. Aia hoi kekahi wahine no Apaiana e hele ana i kahi e. Heaha la ia mea e paa nei ma kona lima? He niu paha? He pohaku paha? Aole. O ka iwi poo no ia o kana kane i make aku, a o ua iwi poo nei kona hoahele a hoanoho i na manawa a pau. No ka mea, pela ka hana a ua poe naaupo nei.

                Ke ike nei oukou i na puhala e ku ana, a me na niu, a me na kanaka e pii ana. Ma ka akau

o ke kii, ma ke kua aku o ka hale pule, e ike auanei oukou i kekahi mau lau nui o-oi. He

lau Api ia. Nunui loa ka Api o kela aina. Ma ka hema o ke kii e ike oukou i kekahi poe kanaka e kau ana maluna o kekahi pauku laau. E aha ana hoi lakou ? E kaomi ana lakou i ka aila niu. A ma o aku o lakou, aia na hale noho o na kanaka. Ano e no hoi. O luna o kaupaku wale no ka i akoia a paa; a waiho hakahaka wale na paia. Pela nae na hale o ia aina. Ua holo hou aku nei o Binamu ma e launa me ko laila poe. E pule nui oukou i ke Akua no laua, i oluolu mai kela poe ahiu, a i hoolohe lakou i ke ao ana a na kumu.

                Mai kinai i ka Uhane. Mai hoowahawaha i ka wanana ana.—1 Tesalonike 5: 19, 20.

 

NA ANUUNUU EKOLU.

                I keia malama iho nei ua hoakaka aku au no ke ano o ka mihi io; oia ka anuunuu mua e pii ai a komo aku iloko o ka luakini hemolele o ko ke Akua aloha. Ano e kamailio kakou no ka

MANAOIO.

                Oia ka lua o na anuu i oleloia. Nolaila eia ka ninau no keia malama, Heaha ka manaoio?

                E ninaninau au i kekahi mau pokii o kakou.

                Heneri, pehea kou manao, heaha ka manaoio i ke Akua?

                Ke pane mai nei ia, "Oia ka hilinai ana aku i ke Akua."

                A o Kale, e hai mai oe i kou manao.

                "Oia no ka lelepau ana i ke Akua."

                O Helene hoi, pehea kou manao?

                " Ina manao au he oiaio ka ke Akua olelo, oia no ka manaoio ana iaia."

                Ae, e na pokii, ua komo keia mau mea a pau iloko, o ka manaoio. O ka manaoio, oia no ko manao ana, o ka ke Akua olelo he oiaio, aole wahahee iki. A lilo keia manao i mea e hilinai ai i ka ke Akua olelo, i mea hoi e lelepau; ai ka naau iaia, alaila ua loaa ia kakou ka manaoio. Aka ina ua maopopo lea ia kakou ka oiaio o ka ke Akua olelo, aole nae lelepau iaia, ua pono ole ua manaoio la.

                O ka manaoio a ke Akua i makemake ai, oia no ka hoomaopopo lea ana, i ko kakou noonoo ana, ua oiaio maoli no kana olelo, me ka makemake maoli o ka naau e lelepau ma ua olelo la; oia ka nana ana iaia me ka makemake e hoolohe a hahai mamuli o kana olelo.

                "A heaha ka waiwai o ua manao la ?" wahi a ka mea hoomaloka.

                Eia no ka waiwai. He poe lawehala kakou a pau. Ua kau mai ke kanawai o ke Akua, "O ka uhane lawehala, e make no ia." Nolaila, ina aole loaa ia kakou kekahi mea e ola ai—ina aole

kalaia ko kakou mau hala a pau, aole no e pakele ana kekahi mea i ka make o kona uhane. E make ana na kanaka, na wahine, na keikikane a me na kaikamahine, aole hookahi mea e ola ana.

                Eia nae, ua loaa no ke Kalahala, o Iesu ko kakou Hoola mai ko kakou hewa mai.

                No ka ke Akua aloha i kanaka hewa, ua hoouna mai oia ia Iesu i lilo ia i kalahala no kakou, ke manaoio kakou iaia e like me ka Iesu olelo ma Ioane 3:16, penei: "No ka mea, ua aloha nui mai ke Akua i ko ke ao nei, nolaila, ua haawi mai oia i kana keiki hiwahiwa, i ole e make ka mea manaoio iaia, aka, e loaa iaia ke ola mau loa." Oia, e na makua a me na pokii, ua make Iesu no kakou, i loaa ia kakou ke ola mau loa, ke manaoio kakou inia.

                Nolaila, e ka mea e mihi io ana i kou hewa, e makemake maoli ana e haalele loa, e nana aku oe ia Iesu, ke Keikihipa a ke Akua, nana e lawe aku ka hala o ke ao nei.

                E nana aku iaia me ka lelepau o kou naau iaia, a nana no e lawe pau loa i kou mau hewa ; e hilinai aku iaia e like me ke keiki liilii e hilinai ana i kona makuahine, a nana no e hapai ae ia oe, a kokua ia oe me kona lima aloha a oluolu loa. Nana no e lawe aku i ka hewa o kou naau a hoomaemae loa iloko o kona koko makamae, ka mea i kahe mai no kakou ma Kalevari.

                Mai noho a kanalua. O keia no ka wa maikai, ka wa a ke Akua e kahea nei ia kakou. Ke ku nei Karisto ma ko kakou mau naau, e kikeke ana, me ka i ana oe, "E ke keiki, e haawi mai ia'u kou naau." E kahea ana hoi, " E hele mai oukou a pau loa io'u nei, e ka poe luhi a me ka poe kaumaha, na'u oukou e hoomaha aka."— Mat. 11:28. E ka mea e heluhelu nei, ia oe no keia leo kahea. Mai hoopaakiki i kou naau, aka e ae oluolu aku iaia, i lilo Iesu, ka mea akahai, ka mea mana hoi, ka mea aloha lua ole, i Alii nou, i Hoola mau loa.

                Mai manao oe he mea koho wale ia keia e ke kanaka, a hakuia iloko o kona naau iho, mamuli o kona noonoo a akamai; mai kuhihewa oe i ke kahea ana a ke Akua ia oe e mihi, a e manaoio ia Iesu Kristo, ka mea nana i haawi mai ia kakou, me ke kala ole, a me ke kumukuai ole, i ke ola mau loa iloko ona.

                Ke kikoo mai nei ko kakou Alii nani i kona lima e hoola mai ia kakou, oiai e lana ino ana kakou ma ke kai kupikipikio o na kuko hewa o ko kakou mau naau. He mana kana e hoola mai ia kakou; a e hoopae ola ia kakou ma kela aina pomaikai, ma Kanaana; hou, i komo aku kakou ma ke kulanakauhale laa, oia no hoi o Ierusalema hou.

                E na hoa, e ala ae kakou, a hopu aku i ka lima o keia makamaka aloha. (Aole i pau.)