Ke Alaula, Volume V, Number 2, 1 May 1870 — Page 7
KE ALAULA. 7
KA NAHESA ME NA MANU.
O kekahi paha keia o na ano nahea i oleloia no ko lakou mana maluna o na manu liilii, ame na holoholona o ka nahelehele. Aole no he alualu maoli aku ko keia nahesa, aka o ka nee malie aku a kokoke i ka manu, a i ka iole paha, a nana mai lakou, ku malie loa ka nahesa pela, me ke anapu o ka uila o kona mau maka. A eia ka mea kupanaha. O ka nana mai o ka manu i na maka o ka nahesa, paa loa ua manu nei. Aole hiki ke hoauwi ae i kona mau maka i kahi e, aole hiki ke lele aku. Lelele no hoi kahi manu me ka hooikaika loa e pakele, aole nae hiki. O ka noho malie no ia o ka nahesa me ka baka pono mai o na maka, e ka neenee liilii aku no ia o kahi manu, me he la i kauo maoli ia, a kokoke loa i ka nahesa, lele mai ana ka nahesa, ale koke ia ua wahi manu la. Ikaika maoli ka hoowalewale ana a ka nahesa.
E na pokii e, o Satana ka nahesa nui e imi ana e hoowalewale i ko oukou mau uhane, a i make iaia. Ina oukou e ku nana wale aku i ka wa e hookokoke mai ai na hoowalewale nee malie mai o ka hewa, e paa auanei oukou iloko o kona hei, a e lilo aku oukou i ko oukou make e like me ua wahi manu liilii nei. Hookahi wale no mea e pakele ai, oia hoi ka makaala ana i na nahesa hoowalewale o ka hewa oi kaawale aku, mai ku a nana aku. Mai ae aku i ka hoowalewale e hookokoke mai, o loaa auanei oukou iaia.
NO KALEPONIA.
ALOHA OE, KE ALAULA :—E oluolu paha oe e hoolaha aku iwaena o kau lehulehu i kekahi o nakauhale nei o Kapalakiko. Eia kekahi o na mea a kuu naau i kahaha ai, oia
Ka Lehulehu loa o na Keiki.
Ma na alanui a pau, paapu na keiki. E hele pu ana kekahi o lakou me na makua ; o kekahi hoi e kinipopo ana, e pana hua ana, e lele kowali ana, a e hoolele lupe ana. Paapu na keiki o kela ano keia ano. Paa kekahi i na kapa maikai, kekahi hoi i na kapa inoino. Holoiia kekahi a maemae; hele kekahi me na kapa pelapela. Aka aole he keiki i paa ole i ke kapa, a o ka nui ua loaa i na kamaa, no ka mea, he anu a huihui na makani o keia aina. He aina hanau keiki keia. Himeni pu na Keiki 1,500. I na la mua o ko maua ku ana mai ma Kapalakiko nei, e malamaia ana he aha himeni nui i kukuluia e kekahi wahine kaulana i makaukau i ka pila kuolo (violin.) He $2 50 ka uku no ke komo ana aku e lohe i ka himeni ana, a me ka puhi ohe ana, o ka aha i alakaiia e keia wahine. O Kamila Uko kona inoa. He 15,000 paha ka nui o ke anaina kanaka i hele aku i ka la hookahi e hoolohe i na mea hoolealea pepeiao o keia aha. Na loaa hoi o keia aha, ua hooliloia e ka wahine alakai i mea e kokua ai i ka aha malama hale waihona buke heluhelu no ka lehulehu. I kekahi la mai, alakai keia wahine i na keiki o na kula aupuni ma ka himeni ana. Ua hoakoakoaia na keiki ho 1,500, a me na makua he 15,000 paha, e hoolohe i ka himeni aha o na keiki. Maikai maoli ka himeni ana o keia mau keiki. Kahi ko lakou leo. Iwaena o kekahi leo, hokiokio like mai na keiki kane he mau haneri, e hoohalike ana me ka leo kani o kekahi manu leo lea. Nani maoli a like hoi na leo o na keiki he 1,500 i ko lakou himeni pu ana. Ke ike la kakou ua aeia ka himeni ana ma na kula aupuni o keia aina. Aole i hoohalikeia aku me ka rula o ka Papa Hoonaauao a kakou o Hawaii la, i papa i ka himeni ana ma na kula aupuni.
No na Kula Sabati.
He nui na kula Sabati a'u i ike ai maanei. He 400 keiki ma kekahi, 300 ma kekahi, a 200 ma kekahi. He maikai ka malamaia o keia hana i waena o na ohana haipule, e like me ia iwaena o ko kakou ma Hawaii. Ua hookaawaleia na pokii ma ko lakou keena kaawale, a o na keiki nunui ae ma ko lakou keena, me ka maheleia i na papa. He maikai ka himeni ana o na keiki, e like me na kula Sabati i malama pono ia ma Hawaii; a o na leo ua like kekahi, a okoa aku kekahi. He mau leo hou a leo maikai kekahi a'u e lohe nei i loaa ole aku ia kakou ; mahope paha e loaa.
No na Keiki Kolohe.
Aole no i pau na keiki o keia aina i ke aoia, a i ka hele i ke kula Sabati. He nui na makua a me na keiki hoomaloka. Ua hopuia kekahi mau keiki mamua aku nei a hoopaiia e ka lunakanawai no ka pepehi ana i kekahi Pake. Nou aku lakou iaia i ka pohaku a eha. Loaa hoi ia'u kekahi keiki e paani ana ma na alanui o ke kulanakauhale i ka la Sabati. E heihei ana kekahi, a e hoolele lupe ana kekahi i ka la o ke Akua, me ka makau ole iaia. Aloha ino na keiki a na aia. He nui wale ia ano ma keia aina, kahi a ke Akua i hana ai i ke gula, a me ka lepo momona e hoohua mai ana i na mea maikai he nui wale no ke kanaka ana i hoonoho mai ai maluna iho o ka honua. Me ke aloha. Na'u na
O. H. KULIKA.
Kapalakiko, Aperila 11,1870.
NA ROSE ELUA.
Ma kapa o kekahi manowai, elua pua rose e ulu pu ana. O kekahi o laua, ua haahaa, a kulou kona maka ilalo me ke kunou aloha i na makani e ani hele ana ma ia wahi. A o ka lua o laua, he kino kiekie kona ; aia iluna ke poo, me kona maka haaheo e kaena ana i kona nani me ka hoowahawaha i kahi pua haahaa. Nani maoli no hoi laua elua i ka nana'ku. I kekahi la, i ua pua haaheo nei e hookiekie ana, me ka mahalo iaia iho i ka nani o kona helehelena i ku kona aka iloko o ka wai, me he aniani kilohi la, pane oluolu mai la kona hoa haahaa, "E akahele oe. Nani io no oe, aka ina e hiki mai ka ino, aohe ou ikaika e pale aku ai." Aole i liuliu iho, pa mai ana ka makani ikaika mai ka hikina mai, a o ka lele koke no ia o kona nani, a maloo kona kumu, a make aku la ia. A o kahi pua haahaa nae, kulou iho kona poo, a hala ka makani ikaika maluna'e, pakele no oia.
He mea lapuwale loa ka paulele ana i ka maikai o ke kino, a me ka nani o ka helehelena. Ua ike no ia me ka pua mae wale. Kau mai ka mai a o ka lele koke aku no ia o ka nani kino. Hiki mai ka make, a o ka nalo koke aku no ia. Aka, o ka maikai oiaio, a o ka nani pau ole, oia no ka uhane i ola iloko o Iesu, a i kahikoia i kona hemolele.
O ka mea hookiekie hoi, he hilahila kona hopena, a o ka mea akahai, he pomaikai kona haawina.
MALAMA AI PAA.
A nau no, e ka mea heluhelu, e kui a hoowali iho.
1. Mai puni oe i ka hale kuai i hoopihaia kona mau puka aniani i na mea nani, a waiho hakahaka oloko.
Pela hoi ke kanaka hookamani.
2. Mai koho i kou hoalauna no ka maikai o na maka; no ka mea e eha auanei ka wawae i ke kamaa nani, ke ku ole.
3. Mai paulele wale i ke kanaka olelo nui wale; no ka mea aohe iole a ka popoki owaowau
4. E akahele kou hoopili ana malalo o hai; no ka mea, ina e komo ka manamanalima mawaena o na nao o ka wili, e moku auanei.
5. Mai inu wale oe me ka hoomaopopo ole, o inu hewa auanei i ka wai kai.
Pela hoi, mai kau wale i ko inoa malalo o kekahi palapala, aia a heluhelu mua oe, a hoomaopopo i kona ano.
6. Mai awiwi oe i ka hoopii imua o na aha hookolokolo. O na poo o ka poe naaupo, oia na kahua hale o na loio.
7. Aohe kanaka e ae au e makaala nui ai e like me oe iho. Aia iloko ou na enemi oi loa o
ka ino.
8. Mai hopu koke oe i na mea a pau o hookokoke mai ana i kou waha, o nahu hewa auanei oe i ka pulelehua.
Pela hoi, mai paulele wale aku oe i na olelo a kanaka no ka oiaio, aia a wae pono ia, a akaka ka oiaio, a me ka ole.
9. Alia oe e kaena nou iho; no ka mea, mai hooho oe i ka nui o kou ia, aia a puni i ka upena.
10. Mai hakaka oe me ka bipi huhu, a me ke kanaka pupule.
Pela hoi, mai hoopaapaa oe me ke kanaka kohu holoholona o kona ano, o paumaele wale oe i ka hu'a o kona waha me ka lepo pu o kona kuehu ana.
O na hana aloha ole, a me na hana pono ole au e hana aku ai ia hai, aole no e liuliu a hoi hou mai ua mau hana la maluna iho ou. Nolaila e hana aku oe ia hai e like me kau e oluolu ai ke hanaia mai ia oe.