Ke Alaula, Volume V, Number 2, 1 May 1870 — Page 5

KE ALAULA

BUKE V. HONOLULU MEI,1870. HELU 2.

NA KEIKI PALAKI KAMAA.

                Ma na kulanakahale nui o Amerika, a me Enelani, ina oe e hele ma na alanui, e ike auanei oe i na keiki e noho ana ma na huina alanui, a ma na wahi kanaka e ae, a he oihana imi ola okoa no ko lakou la. Oia hoi ka hoohinuhinu ana i na kamaa o ka poe e makemake ana, no kahi uku haahaa. O ka noho no ia o kahi keiki me na lako o kana kana, he wahi pahu liilii, kahi e kau ai na wawae o, ka poe mea kamaa, a he tini inika kamaa, me ona mau hulu palaki no hoi. "Palaki iu buti, ea? palaki iu buti, ea ?"

Pela aku la oia i na kanaka e maalo ana ma kona alo. "Palaki maikai a alohilohi; hookahi dime wale no." A o ka mea e makemake ana, kau ana kona wawae maluna o kahi pahu, a pauku laau paha, a o ka hana wikiwiki aku la no ia o kahi keiki, e hamohamo ana i ka inika, a e anaanai ana a nani loa. Akamai maoli no hoi ua poe keiki nei i ka hana. Manawa ole hoi, a ua likw ka ili o na kamaa me ke aniani kilohi ka ike aku i ke aku o ke kanaka iloko o kona hulali ana.

                Ke ike nei oukou ma keia kii, i kekahi o keia mau keiki palaki kamaa, e hoohinuhinu ana i na kamaa buti a kahi keonimana. A o ka lua o na keiki, ke kahea aku nei oia i na kanaka, i loaa ona hana nona iho. O ka hapa nui o keia poe keiki, he poe ilihune, naaupo no. Aka ua aoia

kekahi poe o lakou iloko o na kula Sabati, a me na kula po i kukuluia no lakou e ka poe aloha uhane, a ua nui no na hua maikai i loaa mai waena ae o lakou.

KA MOUO BELE.

                Mawaho aku o ke awa ku moku o Bosetona, he puu pohaku malalo o ka ili o ke kai, a ina e holo naaupo ka moku ma ia wahi,o ka ili no ia, nahaha ana. Nolaila ua hanaia he mouo bele, a ua hoopaaia malaila i ike na moku, a hele ole lakou ma ia wahi. Ua ike paha kekahi poe o oukou i ka mouo bele mamua aku nei mawaho o ke awa o Honolulu nei. Aka, ua nui paha na pokii heluhelu ALAULA i ike ole aku i ua mea la he mouo bele. Nolaila, e hahai iki aku au i ke ano o ia mea. Ua kapiliia kekahi kino waapa aui a ikaika hoi, a ua pani paa loa ia o luna i ole e komo ke kai. Alaila ua kukuluia na kia hao maluna, ma na aoao o ka waa, a hoohuiia na welau luna o ua mau kia nei a paa. Malaila kahi i kauia'i ka bele nui. Laweia'ku ua wahi mouo nei a i kahi e ku ai, kukuluia malaila a paa i ka heleuma nui me ke kaulahao. A i kona luliluli ana maluna o na ale o ke kai, e pai mau ana ka haku i na aoao o ka bele, a kani hone mai kona leo pu—me, pu—me, ma—ke no, ma—ke no. E lohe mau ia'na kona leo i ke no a i ka po. O ka hoolohe ka pono ma ia wahi, a pakele ka moku.

                E na pokii uloha, ke hoomaka nei ko oukou mau uhane e holoholo iwaena o na hana o keia ao me he mau moku la e holo ana ma ka moana. He nui na ino a me na make e loaa ana ia oukou. Aka, ua kukuluia na mouo bele a ke Akua na keia mau wahi a pau. Ina oukou e hoolohe ana i ka leo, aole oukou e pilikia. Aka, o ka hookuli, oia ke kumu e make ai na moku he nui wale

                Eia kekahi puu pohaku e ili ai kou moku a nahaha; oia ka hehi ana i ke kapu o ka la Sabati. Hoolohe oe i ka leo o ka mouo, "E hoomanao oe i ka la Sabati, e hoano ia la." Eia hou kahi pukoa e make ai; o ka hoopunipuni a o ka wahahee. Hoolohe hou i ka leo kani a ka mouo, "O ka poe wahahee a pau, e loaa ana a lakou ko lakou puu ma ka loko e a mau ana i ke ohi a me ka luaipele, oia ka make alua." Eia hou ua kohola nei e ili ai kou moku ; o na olelo ino, pelapela. Ke kani hone mai nei ka leo, "Aohe mea haumia e komo ana iloko o ka lani

                Eia hou ka make ; o ka hoohiki ino, a o ka lawe wale i na inoa o ke Akua. Pela no hoi ka aihue, ka moekolohe, ka hoike wahahee, ka inu ona, a me na hewa e ae he nui wale. Ua mouo ia lakou a pau e ke Akua, i ole oukou e ili ma ia mau wahi, a loaa i ko oukou make. Ina oukou e malama pono, a hoolohe, palekana ko oukou holo ana malalo o ke alakai ana a Iesu Kristo. A i ole, ea, a haalele oukou iaia, a hookuli i na leo ao, e make e ana oukou iwaenakonu o ka moana o keia no, aole pae aku i kela aoao.

KA AOAO MAWAHO.

                E hai olelo ana kekahi imua o kekahi anaina nui o na keiki ma Enelani. Ninau aku oia i na keiki penei: "O ka aoao hea la o ka hale inu rama ka i kupono i wahi no oukou ?" Pane mai na keiki he nui loa me ka leo hookahi, "O ka aoao mawaho," E hoomanao oukou e na keiki, a mai koho oukou i ka aoao o loko o ka hale inu rama i 'wahi no oukou, aka, e hookaawale loa aku oukou mawaho, ma kahi kaawale loa aku.