Ke Alaula, Volume IV, Number 10, 1 January 1870 — Page 38

38 KE ALAULA.

hele aku laua la ma kekahi alanui, a hele au me ka'u wahi bebe ma kekahi alanui.
                Noonoo iho la au penei: Aloha ino na wahi keiki kula Sabati o ko'u lahui aloha e hoohainuia nei e na makua i ka wa liilii i ka wai ona. Ke hookomoia nei keia nahesa wela iloko o na poli o na keiki i ka wa uuku; a heaha la ka hope. Hookahi wale no hope--o ka lawehala, ka poino a me ka make. O ke aloha keiki anei keia?

KUU HOME MAIKAI.

                I ka puka ana mai o keia makahiki hou, heaha la ka mea i oi ka maikai o na mea a pau a ke Akua i haawi mai ai ia kakou? O na home maikai. Heaha la ia mea, o ka home maikai? O kahi noho anei o ka poe inu rama, a inu awa? Aole. O ka hale noho anei o ke kanaka waiwai? Aole. O kahi noho anei o ke kanaka ilihune? Aole. O kahi hale noho ma ke kuaaina anei? Aole. O kahi noho anei ma ke kulanakauhale alii? Aole no. Eia ka home maikai--o kahi no i noho ai na makua haipule aloha me ka lakou mau keiki. Aia no ka hoopomaikai ma kahi i noho mai ai ke aloha i ke Akua ka Makua Nui iloko o na naau o na mea a pau e hoopiha ana ia home. Ma ia wahi ua noho ke aloha e hoopumehana ana e like me na kukuna o ka la laelae; a ua hoopiha ke aloha, ka hoohaahaa a me ke kuikahi ia wahi e like me ke ala o na pua aala a me ka wai ala paha e hoopiha ana i ka hale.
                Haalele kekahi kanaka ui i kona home a hele aku mamuli o ka noho uhauha ana. Mahope hai mai oia, aole i loaa iki iaia ka hauoli ma kona noho uhauha ana; no ka mea, ua halawai mau kekahi anela me ia e kue ana i kana hana, e keakea ana i kona ala e hele hewa ai. O ua anela maikai la i hoopaa mai iaia, oia no ka hoomanao ana i kona home o kona wa opiopio na olelo-ao o kona makuakane, ke aloha o kona kaikuahine, a me na leo pule o kona makuahine. Aole i hiki iaia ke hoopoina, a e kapae loa aku i ka hoomanao ana i keia mau mea. A mahope ua hoi mai keia keiki uhauha mai kona auwana ana ma ka hewa.
                                A auwana au ma na aina, na kai,
                                A ike i ko laila mau mea maikai,
                                A noho haanou ma na hale alii,
                                Aole he lua o kuu home nei,
                                Home, home maikai.

KA LUPE NAHAE.

                "E mama, heaha ka'u pauku no keia hebedoma?" wahi a Uilama Alena.
                "Pomaikai ka poe uwao," wahi a kona makuahine.
                Kahaha iho la o Uilama, a ninau, "No ke aha kou koho ana ia pauku, e mama e?"
                "No kuu ike ana ua hooikaika oe ma ka hoao ana e uumi i kou huhu; a ke manao nei au, mamuli e lanakila oe, no ka mea, aole oe e hilinai nei ia oe iho, aka ke pule nei oe e kokua mai ke Akua ia oe."
                "Ae, e kuu makuahine," wahi a Uilama, "ua hana no wau pela mai ka manawa i kamailio mai ai oe ia'u no ka pule ana ke puka mai ke ano huhu, a ua kinai no ke Akua. I kekahi manawa ikaika ka manao huhu, a nolaila haalele au i na keiki, a hele ma kahi e, me he la e hooponopono ana i kuu lupe, a i kekahi mea e ae paha, a ma ia manawa e imi ana ia'u iho i wahi pauku Baibala, a i wahi himeni paha, a holo aku ka manao huhu."
                "E Wili, o ka pule kekahi mea e kokua ia oe e lilo i mea uwao. Ina ike oe elua hoa-paani e kamailio huhu ana kekahi i kekahi, a e makaukau ana e hakaka, e pule oe maloko o kou naau i ka Haku no laua, e like me ka pule ana nou iho, alaila e olelo ia laua, a e hoao e pale aku i ko laua hakaka. I kekahi manawa ma ka haawi ana i kekahi mea au, i kahi mabala paha, a i kou lupe paha, i ka mea lupe ole, pela e hiki ia oe ke hoihoi mai i ka oluolu; a ina ma keia hana ua hoole oe ia oe iho, e Wili, e manao oe, e lohe ana oe i ka leo o Iesu e olelo ana, 'Pomaikai ka poe uwao.'"
                Honi o Wili i kona mama, a lawe i kona lupe hou, a hele i kahi paani. He la kula ole, a ua iwakalua na lupe e lele ana. Waiho o Wili i kona lupe ma ka lepo, a wehewehe i ka hihia ma ke kakaiapola, a noonoo iho la ma kona naau, e loaa ana paha ka wa kupono ma ia la e lilo ai i mea uwao. Aole liuliu a lohe oia i na leo huhu, a huli ae a ike oia elua keikikane e ku ana ma ka aoao o kekahi lupe i nahaehae, me na maka huhu, a me na leo huhu, me he la e wela ana ka huhu maloko o ko laua mau naau.
                "Mamuli eha oe ia'u, ea !"
                "Aole na'u ka hewa; aole au i ike aia ilaila kou lupe."
                "Ua ike no; ua noonoo e no oe e hana pela."
                "Ina olelo hou oe pela, ike oe, e hili ana au ia oe a nui."
                "Hili ia'u! E hoao!" Wehe oia i kona lakeke a hoolei ma ka lepo, alaila hoopuupuu i na lima a aa aku e hakaka. "E hele mai, hele mai, ua makaukau wau no ka hili; hele mai a hoao."
                E hoomakaukau ana ka hoa kue e hoao, a puka aku o Wili me kona lupe ma kona lima, a me ka pule maloko o ka naau, a ku mawaena o laua. "E na keiki, e kali iki; he mea hiki paha ke hoopau i keia me ka hakaka ole."
                "E Bila Alena, hele pela oe, o kulaiia oe," wahi a ke keiki i wehe i kona lakeke.
                "E Dana, makemake au e olelo e mamua o kou hakaka ana."
                "Heaha kou makemake?" wahi a Dana.
                "E hai mai oe, o ka lupe anei ke kumu o kou huhu ana?"
                Ae mai o Dana, alaila huli oia a nana i na apana. "O keia lupe ka mea maikai loa, a ua pau kona nani ia Keaka Bele." A hoopuupuu hou i ka lima me ka manao e kui ia Keaka, aka haule ka lima ma ka lima akau o Uilama. Eha no oia, aka olelo o Uilama, "E Dana, mai kui oe i kou hoa. Nana mai oe, ina hoopau oe i keia hakaka, alaila e haawi au i ka'u lupe ia oe, he lupe lele kiekie, a ua oi loa no kona maikai mamua o kau."
                "Manao no oe e haawi mai me ka uku ole?"
                "Aole, e haawi ana i mea e hoopau ai i ka hakaka."
                "No ke aha kou makemake ole e hakaka wau?" wahi a Dana; "aole oe e eha ana." "Aole paha o'u eha, e Dana, aka he hewa ka hakaka."
                "Aka, heaha ia ia oe ke hakaka maua?"
                Ulaula iki ka maka o Uilama i kona pane ana, "O keia kuu pauku no keia pule, 'Pomaikai ka poe uwao.'"
                Kulou o Dana maluna iho o kona lupe i nahahae, me he la e hoao ana e kui hou i na apana, aka, i ko'u manao, e noonoo ana i ka Uilama huaolelo. Alaila, nana oia iluna, a ninau aku, "E Keaka, aole anei oe i manao e e hana i keia mea?"
                "He oiaio no, aole au i ike aia kou lupe ilaila; ua minamina au no ka nahaehae ana, a manao au e olelo pela mamua, aka huhu koke mai oe. A ina ae mai oe, e hana au i lupe hou e like me keia; he pepa nani loa ka'u ma ka hale."
                "Aka, no Dana keia lupe," wahi a Uilama, e paa ana i kona lupe ma kona lima.
                "Aole," wahi a Dana, "hilahila au ke hana pela. Malama oe i kou lupe, a nau e ao mai ia'u e malama i ko'u huhu. E lulu lima kaua, e Dana; oi keia mamua o ka maka eleele, a me ka ihu i paumaele i ke koko."
                I ko lakou hele pu ana, lohe o Uilama i ka leo o ka Haku iloko o kona naau, "Pomaikai ka poe uwao."
                E na keiki heluhelu ALAULA, mai hoohalike oukou me Dana ma ke ano huhu, aka e hana oukou e like me Uilama Alena ma ka lilo ana i mea uwao. F. M.

KE ANO O KO KE AKUA KOKUA ANA.

                Aole i kii mai ke Akua a lawe ae ia Saderaka, Mesaka, a me Abedenego, mai loko ae o ka imu ahi, aka, iho mai no ia a hele pu me lakou iloko o ke ahi. Aole i hapai oia ia Daniela mai loko o ka lua liona, aka, hoouna mai oia i kona anela a hoopaa i ka waha o na liona. Aole oia i lawe aku i ka mea oioi ma ka io o Paulo e hoeha ana iaia, aka, olelo mai ia, "Ua lawa kuu lokomaikai nou." E ke keiki a ke Akua e noho u ana, e hoomanao oe i keia mau mea.