Ke Alaula, Volume IV, Number 10, 1 January 1870 — Page 37

KE ALAULA.
BUKE IV. HONOLULU, IANUARI, 1870. HELU 10.

KE KUPUNAKANE A ME NA MOOPUNA.

                E aha ana keia mau keiki liilii? E paani nui ana me he mau lio kauo la. Olelo o Keoki i kona mau kaikuahine, "E hooholo kakou ia kupunakane ma ke kaa lio. E hoolilo kakou i kona noho i kaa, a o olua, o Mele a me Hope, i mau lio—a owau ke Kahu, a o Kini, oia ke kanaka kau mai mahope o ke kaa."
                Olelo mai o Mele, e hooholo ino paha auanei oe ia maua. Olelo mai o Hope, e hahau ino mai paha auanei oe i kou mau lio, a hoounauna ino mai paha ia maua me ka ukana kaumaha loa.
                Hoole aku o Keoki, aole no wau e hooholo ino, aole e hahau ino, aole hoi e hoounauna i ka ukana kaumaha.
                Akahi no paha a hanaia ke kuikahi iwaena o ke kahu lio a me na lio. Ae hoi laua e lilo i mau lio, a hoopaaia laua me ke kaula kauo i ka noho o ke kupunakane. Pii aku kahi pokii o Kini mahope o ka noho, a hooho mai me ka hauoli nui; hoopoha mai o Keoki i kona huipa, a lelele na wahi kaikamahine iluna a ilalo, me he mau lio la e uhu nui ana e holo. Aka iki mai ke kupunakane i keia paani nui ana o kona mau moopuna.
                A liuliu iki ka holo ana a me ka lelele ana o na wahi lio liilii, a maluhiluhi lakou. Hoomaha iho lakou, a ninau mai o Keoki, "E kupuna, ua lealea anei oe i kou holo kaa ana?" Pane mai kela, "Ua oluolu no wau i ka oukou paani aloha pu ana, a me ko oukou hauoli nui ana. Ua hala kuu wa e lealea nui loa ai. O ka wa opio, oia no ka wa e lealea ai. Aole he nui ka lealea o ka poe elemakule e like me ko na opio; aka ua oluolu wau no ka nui o ka lokomaikai o ke Akua i ka haawi ana mai i na opio e paani pu me a'u, a no kona haawi ana mai i ka la laelae, i na manu liilii o ka ululaau, a me na moopuna aloha e hoopuni mai ana ia'u."
                Pela i panee aku ka la me ka pomaikai, i ka noho aloha pu ana o na moopuna me ko lakou kupunakane, e hoohauoli ana i kona naau, a e hoolealea ana iaia me he opio la i ko lakou paani pu ana me ia.

NA WAHI KAIKAMAHINE INU BIA.

                Loaa ia'u na kaikamahine uuku elua ma na alanui o ko kakou kulanakauhale alii o Honolulu e kamailio ana kekahi me kekahi. Noi mai kekahi o laua i ka'u wahi keiki liilii a'u e hiipoi ana i keiki hanai nona. Ninau aku au iaia ina ua lohe oia i ka moolelo o Mose i ka waihoia ana maluna o ka muliwai maloko o ka waa liilii, i ka loaa ana aku i ke kaikamahine alii o Aigupita, a me kona hoolimalima ana i ka makuahine ponoi o ua Mose nei e hanai iaia a nui ae. Hoole mai laua, aole no i lohe ia moolelo; akahi no a lohe. Ninau aku au, aole anei olua i hele i ke kula Sabati? Ae mai laua, ua hele no. A owai ka inoa o ko olua kumu kula Sabati? Pane mai kekahi o laua, aole i loaa ia'u kona inoa; oia nae ka wahine a mea. Alaila ike no wau ua hele io no laua i ke kula Sabati. Aole nae i loaa ia laua ka moolelo no Mose. A pau kuu kamailio ana, lilo laua i ke kamailio kekahi me kekahi. Olelo ae kekahi, "Ua ona loa kahi kaikamahine uuku, elua ana mau kiaha ua hele a piha." A pane ae kekahi, "He mea uuku loa malalo o ke kiaha ka'u i inu ai." A pane hou ae ka mua, "Pela hoi ka'u, he wahi mea uuku loa malalo o ke kiaha."
                Ninau aku wau, heaha keia a olua i inu ai? Olelo mai laua, "He bia; ua inu kekahi kaikamahine uuku elua kiaha a ona loa." Pane aku wau; inu bia no ka olua! "He mau wahi kulu uuku loa ka maua i inu ai."
                Ma ia wahi mana ae la ko makou alanui a