Ke Alaula, Volume IV, Number 8, 1 November 1869 — Page 31

KE ALAULA. 31

NA HANA MISIONARI I HIKI I NA KEIKI.

                He kaikamahine maikai o Mele liilii, nona na makahiki ekolu; he oluolu a maikai kona mau ano kamalii a pau.
                Hele aku kekahi wahine e ike i kona makuahine, e koi aku iaia e kokua i dala e hoolaha aku ai i ka olelo a ke Akua ma na aina pegana. Ike o Mele liilii i ke kamailio nui ana iwaena o laua, a holo aku kela me ka olelo aku, "E lilo ana au i misionari; Makemake au e lilo i misionari!" Hiipoi ua wahine la ia Mele, a kamailio aku iaia no na keiki ma na aina pegana, a makemake loa oia i ka lohe ana.
                "Pane aku ka wahine iaia, e lilo io no oe i misionari ina e koi aku oe ia papa i iwakaluakumamalima dala, e hoolilo ia oe i lala paa o ko makou ahahui o na wahine e hoolaha misionari." Oluolu ka manao o kahi keiki, a hoi aku ua wahine la.
                Hala ae kekahi mau la, hiki hou ua wahine Puuku la o ka ahahui misionari a na wahine, ma ua hale la, a i ka hea ia ana o ua kaikamahine la, holo mama loa mai oia me ka olelo mai, ua lilo ae la au he wahi misionari, a waiho aku oia i na dala he iwakaluakumamalima ma ka lima o ka wahine.
                Penei i loaa ai iaia keia mau dala. I ka hoi ana mai o kona makuakane i ke ahiahi, pii koke aku oia ma kona uha, koi ikaika aku iaia e haawi mai he iwakaluakumamalima dala. A ua hiki ole i ua makuakane la e hoole i ke koi ikaika ana o kana kaikamahine aloha.
                E ninau mai paha auanei oukou, pehea la i lilo ai o Mele liilii i misionari ma ka haawi ana ia mau dala he iwakaluakumamalima. Penei paha. Ina e manao ana oe e haawi i hainaka maikai i kou makuakane, he makana makahiki hou paha nona; Pehea la e loaa ai ia oe ke keiki ia mea. Hana aku oe i na hana imi loaa a na keiki; ohi ohelo a kuai aku, imi hua moa, a loaa kuai aku, a loaa mai ka hapawalu, ohi pepeiao laau paha, a loaa he hapawalu malaila; Pela e hookuikui ai i na hapawalu a lawa ke dala e loaa ai ka hainaka au i makemake ai, a haawi aku i kou makuakane aloha.
                Aole nau ia hainaka i hana, na hai no, aka ma kou hooikaika imi loaa, ua lilo loa mai ia hainaka nou, a o kou makana no ia i kou makuakane.
                Pela hoi keia lilo ana o Mele liilii, nona na makahiki ekolu i misionari. Aole i hiki iaia e hele kino aku i na aina e, e ao i ka poe naaupo, aka o kana mau dala, ana i haawi ai, oia no ka mea e hiki ai i kekahi misionari e hele a hai i ka olelo a ke Akua i na mea ike ole mamua.
                Ma ia hana, ua lilo io no o Mele i misionari; a nui ae oia, e mahuahua ana kona aloha i ka poe pegana, a e ao pono paha kona makuahine iaia, lilo io paha oia i misionari hele maoli i na aina e, mahope aku.
                E pane mai paha auanei kekahi keiki, "Aole e loaa ana ia'u na dala he iwakalua kumamalima." Mai kanalua iki oe malaila. Aole e nana ke Akua ma ka nui a me ka uuku o ke dala, aka ma ka naau kona nana ana. Ina no ke aloha i kona aupuni, ua iini oe he hapawalu, a he hapaha, a hoolilo aku ia i ka mahina hou, no ko na aina e, alaila ua lilo no oe i misionari ma ia hana ana.
                He nui no na misionari opio ma Hawaii nei i keia wa e haawi nei i ka lakou mau hapawalu, i loaa ma ka malama ana i na hunahuna liilii, no ka Haku. A mahope, e hele kino aku kekahi o lakou i na aina naaupo e ao aku i ka poe ike ole i ke Akua, a ia Iesu ka Hoola.

KE KEIKI KOA LOA I KA WA I HOOPILIKIA IA MAI AI.

                I ka malama paha o Iulai i hala ae nei, haalele mai kekahi mokuahi ia Beretania, i piha i na ohua, e holo mai ana i Amerika. Eha paha la o ka haalele ana ia Beretania a iwaena ka moku o ka moana lewa, loaa iwaena o ka lehulehu ohua he wahi keiki kapa weluwelu nona na makahiki eiwa. Aole wahi dala a keia keiki e hookaa aku ai no kona uku moku; he keiki kau wale mai no keia maluna o ka moku. Hali ia oia imua o ka malamamoku iaia ka hooponopono i na hihia o ia ano. He helehelena maikai loa ko ua wahi keiki ilihune nei.
                I ninaninau ia oia i ke kumu o kona pee ana mai maluna o ka moku. Pane mai kela, ua make kona makuakane ponoi, a ua mare hou kona makuahine i ke kane hou. No ka ilihune o kona mau makua, aole e hiki ia lakou e hanai iaia; aole hoi he dala e uku ai i kona holo ana maluna o ka moku, e hiki aku ai oia i Kanada i kekahi makuahine kuonoono ona, a e holo aku ana oia ilaila.
                Aole i manaoio ka malamamoku i keia mau olelo a ke keiki, he wahahee wale ia mau olelo a pau i kona manao. Ua ike pinepine oia i ka mahuka ana mai o na keiki maluna o na moku mai na makua ilihune o Beretania. Manao paa oia na na kahu moku o mua ka i lawe mai i ua keiki nei, a me ka hanai iaia maluna o ka moku. Nolaila, pai ino oia i ke keiki me ke kamailio okalakala mai iaia.
                Hookolokolo pinepine mai ka malamamoku iaia i kela la i keia la, aka aole he olelo pane e ae a ke keiki, oia like wale no me ka mea i hai ia ae la maluna. Hoole kela, aole oia i ike i kekahi o na kahumoku; na kona makuahine kolea i halihali mai a huna iaia maluna o ka moku, me ka haawi pu mai no i ka ai ana e ai nei.
                Uluhua ka malamamoku i keia wahi keiki no kona hoopaakiki ma ia olelo hookahi, a i kekahi la, hopu ae oia i ke keiki ma ka a-i a kauo aku iaia mamua o ka moku, me ka olelo aku iaia ina aole oia e hai mai i ka oiaio iloko o na minuke he umi, e li aku oia iluna ma ka a-i, a make maluna o ka i-a o ka moku. Hoonoho aku oia i ke keiki ma ka oneki malalo o ka laau kahi ana i olelo e liia aku ai oia. Puulu mai na ohua a me na kahumoku, a hoopuni mai iaia e ike i ka hopena o kela. E noho ana ke keiki ma ka oneke, a o ka malama moku oolea e ku mai ana imua ona, e nana ana i kona wati, e helu ana i na minute i koe o na minute he umi ana i olelo ai, e make ke keiki ke ole oia e hai mai i ka oiaio o keia mea, o kona hiki ana mai maluna o ka moku.
                He nani ka nana ana i keia wahi keiki e noho ana ma ka oneki; ua ea kona poo iluna, a ua alohilohi kona mau maka maikai, ua pulu nae kona mau papalina i na kulu waimaka e haule ana ilalo. I ka pau ana o na minute ewalu, pane mai ka malama moku iaia me ka olelo iho, elua wale no ou mau minute i koe a make oe. E aho
e hai koke mai oe i ka oiaio, a e hoopakele ia kou ola mai ka make mai. Eia wale no ka pane ana a kahi keiki i pane mai me ka oiaio; noi aku oia e ae ia oia e pule. Kunou mai ke poo o ka malama moku; a kukuli koke iho kahi keiki makua ole ma ka oneki, nana aku iluna i ka lani, a pule ae i ka pule a ka Haku ; penei:
                "E ko makou Makua iloko o ka lani, e hoanoia kou inoa. E hiki mai kou aupuni; e malamaia kou makemake ma ka honua nei, e like me ia i malamaia ma ka lani la; E haawi mai ia makou i keia la i ai na makou no neia la; E kala mai hoi i ka makou lawehala ana, me makou e kala nei i ka poe i lawehala i ka makou. Mai hookuu oe ia makou, i ka hoowalewaleia mai; e hoopakele no nae ia makou i ka ino; no ka mea, nou ke aupuni, a me ka mana, a me ka hoonaniia, a mau loa aku. Amene." A noi hou aku hoi oia i ka Haku, ia Iesu, e lawe aku iaia e noho pu me ia ma ka lani.
                I ka pau ana o kana pule, uwe waimaka nui mai na kanaka, na ohua a me na kahu moku me ke aloha i ua keiki nei. Lele mai ka malama moku a apo mai a puliki paa iaia me ke aloha, a honi iaia me ka hai aku i ka pau o kona kuhihewa no ka oiaio o kana olelo, ua ae loa oia i ka oiaio o kana mau olelo a pau, a ua nui kona mahalo no kona naau koa, me ka luli ole, a me ka hoopunipuni ole i mea e hoopakele ai i kona ola.
                E na hoa heluhelu, aole anei i hu ko oukou aloha i keia wahi keiki makua ole, nona na makahiki eiwa wale no, i hoomaau ia e kela kanaka ino no kona kupaa ana mamuli o na olelo oiaio? He mea pono e hahaoia ua malama moku la iloo ka hale paahao no ka hana ino hooweliweli i ke keiki makua ole. Na ke Akua me kona uhane i kokua i ua keiki hala ole la e hoopaa mamuli o na olelo oiaio.

                E hoolei i kau berena maluna iho o ka wai, no ka mea, a hala na la he nui loa, e loaa hou mai no ia ia oe.—Kekahuna.

                Oi aku ka maikai o ke keiki ilihune me ka naauao, mamua o ke alii elimakule me ka naaupo, ka mea hiki ole ke aoia mai.—Kekahuna.

                O ka mea makemake i ke kala, aole pau kona ono i ke kala; a o ka mea makemake i na mea nui, aole ia e ana i ka nui o ka waiwai.—Kek.

                Ua oi aku ka inoa maikai mamua o ka mea poni maikai.--Kekahuna.