Ke Alaula, Volume IV, Number 7, 1 October 1869 — Page 25

KE ALAULA.
BUKE IV. HONOLULU, OKATOBA, 1869. HELU 7.

E HOOKIPA I KA MALIHINI.

                I kekahi la holo mai o Toma iloko o ka hale me ka pihoihoi nui e kahea ana, "E mama e mama aia he elemakule ma ke alanui e noho ana maluna o kekahi pauku laau; e hookiki aku paha au i ka ilio maluna ona?" "E hookiki ka iaia i ka ilio! No keaha la e hana ino aku ai pela iaia?" wahi a kona kaikuahine. Hilahila iki o Toma a olelo ae "O hele mai anei ia a ai mai ia kakou." Pane ae ka makuahine, "He manao lapuwale no ia a kahi keiki lapuwale." "E hele oe e Esetera a ninau oluolu aku iaia i kana mea e makemake ai. Malie paha ua luhi oia i ka hele wawae mai maluna mai o na mauna." Olelo mai o Esetera ia Toma "malie paha he kupunakane kela no kekahi keiki; a pehea kou manao ina e hookiki mai kekahi i kou kupunakane me ka ilio."
                Holo aku o Esetera i ka ipuka pa a kiei aku mawaena o na laau o ka ipuka a ike aku i ka malihini e noho ana malalo o ka malumalu o kekahi ohia nui. Kahea aku ia, "E komo mai paha oe i ka hale e hoomaha ai." Pane mai kela, "e hoomaha paha wau maanei, aka ina e hali mai oe i wahi wai, ua makewai au, e kuu wahi kamaiki." Holo aku o Esetera i ka hale e akaaka nui ana. "Kapa mai ka hoi kela ia'u he kamaiki nona. Ae, e ukuhi koke au i wahi wai e inu nona." Haawi mai kona makuahine he pika a holo kela i ka punawai a hoopiha iho i ka wai huihui a halihali kela i ka elemakule e noho ana i ke alanui. Hele imua o Nero e hanuhanu ana, a o Toma kolo hele aku mahope me ka hilahila. Hilahila io no paha i kona mau manao lapuwale mamua e hookiki aku i ka ilio maluna ona.
                Olioli ka elemakule malihini i ka ike ana ia lakou. He loihi kahi ana i hele mai ai, a ua luhi oia. Inu oia i ka wai a olelo mai, "thank you,"—"aloha oe, he ono ka wai. Ua ike anei oukou i ka Iesu i olelo ai no ko kiaha wai huihui?" Luliluli o Esetera i kona poo. Penei ka Iesu olelo, "O ka mea e haawi i ke kiaha wai huihui i kekahi mea uuku o kana poe kanaka, no ka mea, he haumana ia, aole ia e nele i kona uku. Na ka Haku e hoomaikai mai ia oe e kahi kaikamahine uuku" Oluolu iho la ka manao o kahi kaikamahine no ka mea ua ili maluna ona ke aloha ana mai o ka malihini a me ka ilihune.

KE KAIKAMAHINE MAKILO MA KE ALANUI.

                Hopuia kekahi kaikamahine nona na makahiki he umikumamakolu, a laweia imua o ka Ahahoomalu o Nu Yoka, no ka makilo wale i ke alanui. A penei kana i hoike ai nona iho. "Aole au i ike i ka heluhelu; aole ae ko'u makuahine ia'u e hele i ke kula. He kanaka makaukau ko'u makuakane ma ka hana lima, aka, ona rama pinepine loa oia, a kipaku mai ia'u e hele i ke alanui e makilo ai, a e pulumi piha i ke alanui, a i ole ia e aihue paha, i mea e loaa ai i ke dala kuai rama no laua me kuu makuahine. O ka'u loaa, mai ka hapalua a i ke ekoluhapaha i ka la hookahi. Aole ae mai ko'u makuahine ia'u e komo i ko'u mau kamaa o ike mai auanei ka poe waiwai i kuu lako a hapa mai ko lakou kokua ana mai ia'u. Ina e hele wale au me ka nele alaila e aloha ia mai a loaa mai i na hapawalu. Ina he nui kuu loaa i ka makilo ana, a hoihoi pau loa aku i ko'u makuahine, alaila haawi mai oia he hapaumi a he hapawalu paha na'u. Aka ina aole e loaa ia'u ka hapalua o ka la a hoihoi aku no laua, alaila hahau mai laua ia'u, a hoonele mai i ka ai, a hoomoe ia'u maluna o kekahi puu welu. Aia a ona ko'u mau makua hikiwawe ka huhu a hahau kumu ole mai ia'u. I kekahi mau la he hapa iho ko'u loaa, a hoonele au ia'u iho i ka ai a po ka la, a hoihoi aku i na loaa a pau i ko'u makuahine, alaila aole ona hahau mai ia'u."
                He tausani na keiki ma na kulanakauhale nui o na aina e i hana ino mau ia no e like me keia wahi kaikamahine.
                O kekahi mau keiki e noho nei me na makua aloha ma na home maikai, kaniuhu lakou, no ka hoounaunaia mai i na wahi hana kupono no lakou. E anunu ana i na mea maikai ae mamua o na mea a na makua aloha i haawi mai ai. He pono ia mau keiki hoohalahala kumu ole e nana i ka noho poino ana o keia kaikamahine. E nana oukou i ka noho ana o na keiki a ka poe inu rama a uhauha wale. E noonoo i kela pauku o ka Baibala, "Owai ka mea i hoopakele ia oe? Heaha hoi kau mea i haawi ole ia mai nau? A ina i haawi wale ia mai ia, no keaha la oe e kaena ai ia, me he mea la i haawi ole ia mai?"

                No ke aha la keia? he kumukuai me ka lima o ka mea lapuwale, e kuai aku ai i ke akamai, aole ona manao malaila. Solomona.