Ke Alaula, Volume IV, Number 2, 1 May 1869 — Page 6

6 KE ALAULA.

KE KEIKI NALOWALE.
HE KAAO OIAIO.
Helu 5.

                I kekahi la, loaa mai ia Mr. Patona he palapala me ka wahi ekaeka, a i ka wehe ana ae, ua kakauia me ka peni kala penei;
                "Mr. Patona; E moe ana kekahi wahine ma ke kae o ka make, ke ake nei oia e ike ia oe. He wahi mea kana e hai aku ia oe. E holo koke mai oe."
                Ua hai ia mai oia kahi e loaa aku ai ua wahine mai nei ma kahi i pupupu na hale o ke kulanakauhale nui. Haohao nui o Mr. Patona i keia palapala, me ka manao iho, he mea pili paha keia i kana wahi keiki i nalowale.
                Hele aku oia i kahi kau lole, a lawe he mau kapa maemae o Beni, me kona mau kamaa, a kakini, a hahao ia ia mau mea iloko o kona eke ili. Kau oia ma kona kaa lio, a holo aku i ke kulanakauhale.
                Hiki aku oia i kahi e waiho ai o ke kaa, a me ka lio, a hele wawae aku oia a hiki i kahi i haiia mai iaia ma ka palapala. He ala ino, hehi aku oia i na anuu, a kikeke aku ma ka ipuka. Kahea aku kekahi leo nawaliwali iaia, e komo mai. Komo kela a ike i ka ilihune o ko loko. Maluna o kekahi puu opala, ma ke kihi o ke Keena, e moe ana he wahine mai nawaliwali loa. I kona nana ana i ua wahine nei, olelo kela, "Ua hiki mai ka oe," a uhi iho la oia i kona maka i kona mau lima.
                Kahaha o Mr. Patona i ka ike ana o ka wahine iaia oiai he malihini kela iaia, a pane ae kela, "Ike mai ka oe ia'u; he hiki anei ia'u e kokua ia oe."
                Pane mai ka wahine, "Eia wale no kau e hana mai ai, e hoolohe i ka'u mea e hai aku ai ia oe, alaila e kala mai i kuu hewa."
                Pane mai o M. Patona, "akahi no a halawai au me oe, heaha ka'u e kala aku ai ia oe?"
                Olelo ka wahine, "ua hana ino loa aku no au ia oe, o ke Akua no kai ike; aka e kala mua mai oe ia'u, alaila e hai aku au ia oe."
                Alaila olelo mai ka wahine, "He malihini au ia oe. He loio oe, a ua ike aku au ia oe ma na Ahahookolokolo. I kuu ike mua ana ia oe, ua hoopiiia ka'u kane no ka aihue, a ua hahao ia oia i ka hale paahao; no na makahiki elima, a make oia iloko o ka hale paahao. He kane aloha ole, a hana ino mai kela ia'u, nolaila, aole au i uwe nui nona. He keiki kane ka'u i aloha mai ia'u i kona wa i ona ole i ka rama. Ua kau loa kuu manao a pau loa maluna ona. Ua hoowalewale ia ka'u keiki o Keoni, e kekahi kanaka, a hele pu laua a wawahi, a komo aihue iloko o kekahi hale. Hopu ia mai laua, a i ka hooikaika ana o ka'u keiki i mea e pakele ai, make kekahi kanaka ia ia. Aole oia i manao e pepehi kanaka.
                Hoopii ia oia no ka pepehi kanaka, a o oe ka loio i hoopii iaia. Ua ahewa ia oia e make. Ua like au ia manawa me ka pupule. A liiia ka'u keiki, ua hoohiki au e hana ino aku ia oe, ma ia hope mai, ua imi nui au a loaa kou hale noho. Kolo hele au a puni kou hale, a ike au i kau wahi keiki maka palupalu. Komo aku au i kou hale, a nonoi aku e haawi mai i apana berena na'u. Nana mai kau wahi keiki, a ike i kuu ai ana i ka berena. Niele aku au iaia, a hai mai kela, he keiki hanau kahi oia na olua. Alaila manao au e aihue iaia."
                Hooho ae o Mr. Patona, "Kuu keiki e; mahea la ia. Ua pepehi anei oe ia ia?"
                I mai ka wahine, "E hai no au ia oe a pau loa. Hoi aku au i ke kulanakauhale. Ia la ae, ike aku au i kau keiki e hoopaa ana i ka lepa o ke kapa o kekahi kanaka. A ike mai ke keiki ia'u, haliu mai oia a kamailio mai ia'u. Olelo aku au iaia, he kaikamahine mai ka'u, e hele mai oe e ike. Pane mai kela, ua ae au e hoopili loa aku ia Keo, aole e haalele iki ia ia, malia paha e ae kela e hele pu me a'u. Pane aku au, aole, o kaua wale no, a lalau aku au i kona lima a kauo aku ia ia me ka wikiwiki loa ma na ala ololi, a hiki mai i kuu wahi nei. A hoonoho aku au iaia ma ka papa hele. Nana aloha loa mai oia ia'u me ka olelo mai, e oluolu oe e hoihoi aku ia'u, he makau au i keia wahi ino? Pane aku au iaia, aole loa au e hoihoi aku ia oe, aka, e hoopaa loa ia oe maanei, no ka mea, ua pepehi kou makuakane i ka'u keiki. Ike au i na palapala hoolaha nana, no ke keiki i nalowale; a ua hai aku au iaia i kuu ike ana ia mau palapala i mea e hoehaeha ai iaia. I kekahi manawa, kukuli mai kahi keiki imua o'u, me ka nonoi mai, e hoihoi aku au iaia i kona home, me ka olelo mai, aole oia e hai iki i kekahi mea ino no'u, a na kona makua e uku mai ia'u i na dala he nui no kuu hoihoi ana iaia. Aole au i manao iki i ke dala. O ka hana ino aku ia oe, oia wale no ka'u mea i makemake ai.
                He wahi kaikamahine mai ka'u ia manawa; he nui kuu aloha iaia. Pipili loa kau wahi keiki i ka'u kaikamahine, a no kuu ike ana he mea ia e oluolu ai ka'u kaikamahine mai, o ka noho pu mai o ua keiki nei, nolaila, palupalu iki kuu naau, a hana aloha aku iaia. I kekahi la, lohe au i kana olelo ana, ua make o Iesu no na mea a pau, a he hiki iaia e kala i na hewa a pau. Ninau ka'u kaikamahine o Kele, ina he hiki iaia e kala mai ia'u no kuu aihue ana iaia. Ae aku kela, ae, aka, ke manao nei au e oi aku kona makaukau e kala mai iaia, ina e hoihoi aku kela ia'u i kuu home. Emi iho ka ikaika o Kete, a kokoke aku kela i ka make, pane mai kela ia'u e hoihoi aku ia Beni. Hoole aku au; aole loa au e hoihoi aku iaia. Ia manawa hoopili koke aku o ua o Beni ia Kete, me ka olelo iho aia a hiki aku oe i ka lani, e hai aku oe ia Iesu, a nana no e hoounauna iaia e hoihoi aku ia'u. He nui ka mana o Iesu? Alaila kukuli iho oia, a olelo, 'E kuu makua ma ka lani, e hoopakele mai ia'u i ka ino no ka pono a pau.'
                Ia po iho no, make o Kete, a eia kana olelo hope loa, 'e hai aku no au iaia e Beni.' Makau loa au i kuu lohe ana ia olelo. Manao pinepine no au e hoihoi aku iaia. Aka aole no au i hooko ia manao, a loaa ia'u ka mai. I kuu mai ana, ao mai kahi keiki ia'u a hoala hou mai i na mea a'u i lohe ai i kuu wa kamalii, no ke aloha o ka Haku. No kuu ike ana ua kokoke mai ka make ia'u, nolaila, hoolohe au. I kuu ike ana he pokole kuu manawa i koe, kakau au i kela palapala ia oe, a na kekahi makamaka i hoouna aku."
                Ninau iho o Mr. Patona, "mahea la ua keiki nei?" Kuhikuhi aku ka wahine i kekahi keena maloko aku me ka olelo "aia no ia ke hiamoe la ma ia keena.' (Aole i pau.)

HE KAIKAMAHINE I NAHUIA E KA ILIO.

                Nui no na ilio hae ma Aferika Hema i keia wa. I ke ahiahi o kekahi la, e moe ana kekahi kaikamahine, ewalu paha ona mau makahiki, kokoke i ka ipuka o ka hale o kona mau makua, a holo kiki mai eha mau ilio hae.
                Paa kekahi ma kona poo, kekahi ma ka poohiwi, a elua ma na wawae, a holo aku me ia.
                Lohe ia kona uwe nui ana, a hahai koke kekahi poe, a loaa ia lakou. Hookuu no na ilio-hae i ke keiki, me ka eha nui nae, i na niho oioi o ia mau holoholona pololi. Malama pono na makua i ua wahi keiki nei, me ka makemake e hooluolu ia ia, aka, aole i hiki ke hoola i na eha.
                No ka manao e make ana ka laua keiki, makemake laua e lawe iaia iwaho o ka hale mamua o ka make ana, no ka mea, makau na kanaka o Kaferia e hoopa i ke kino i make.
                Lawe ae la kona makuakane ia ia ma kahi loihi mai kona home aka, a hoomoe ia ia i kahi kokoke i ka uku laau, ma kahi e lohe ole ia'i kona uwe ana, a haalele iaia malaila a make.
                I ka moe ana o keia kaikamahine eha ma ia wahi mehameha, hoomanao ae la ia i ka misionari, ua ike no ia i kona home, a i iho la ia iaia iho. E hoao paha wau e kolo aku i kona hale, no ka mea, he lokomaikai oia, a he aloha no, aole oia e kipaku mai ia'u."
                Kolo malie aku ia, me kona eha nui ma na wahi ino, a hiki aku i kona hale. I ka ike ana i keia keiki eha, a e kahe ana ke koko ma na wahi i nahu ia, nui kona aloha iaia. Hai aku oia i ke kumu o keia eha ana, a ua helu ia, he umikumamaha wahi eha, ma kona kino i nahu ia e na niho o na ilio-hae.
                Lawe ka misionari iaia a waiho ma kahi moe, holoi i na eha a hamo i ka aila i mea e hooluolu ai a hoopaa me na welu.
                Ua malama pono oia ia ia i kela la keia la, a hiki i kona wao i lai. I ka wa e malama ana iaia, a e lapaau ana i kona kino, ao aku oia iaia no kona Haku e ola'i; no ka oi loa o kana hana aloha nona, mamua o ka mea hiki ia ia ke hana aku.
                A kokoke ola na eha, ninau ka misionari iaia i kona makemake e hoi aku i kona mau makua? "Hoole oia, no ka mea wahi ana, ua kipaku mai lakou ia'u, ua hookipa mai oe ia'u, me oe no e noho ai"
                I kekahi la, e hele ana ka misionari i kahi e kokoke ana i kona hale, a lohe oia i kekahi leo, he leo o kahi keiki e pule ana. Nana ae la ia a o ua wahi malihini nei no ia, iwaena o ka nahelehele e pule ana i kona Maku i ka lani.
                Ma ia manawa mai, manao oia he keiki ia na ke Kahuhipa, maikai, nui na pomaikai i loaa mai i keia kaikamahine o Kafera, a i ke Akua wale no ka hoomaikai ana.
                Ina paha aole oia i haule iwaena o na ilio-hae, malia paha aole oia i lohe i ka hai ana i ka euanelio maikai, a ua make iloko o kona hewa.
                "Aole i like ka manao o kanaka me ko ke Akua." F. M.

                O ke keiki kolohe, aole ia he keiki haipule. Mai manao oe he keiki hoolohe oe i ke Akua, oiai ke hookuli nei oe i na kauoha maikai a kou mau makua.