Ke Alaula, Volume IV, Number 2, 1 May 1869 — Page 5

KE ALAULA.
BUKE IV. HONOLULU, MEI, 1869. HELU 2.

KA LUU ANA NO NA DAIMANA.

                Heaha keia mea he daimana? He wahi puupuu poepoe uuku, me he anoano la i loaa iloko o ka i-a i kapaia he pipi. Me he aniani a-ia-i la keia mea poepoe liilii ke loaa aku. Ina he loaa aku he nunui iki ae e like me ka piko o ka manamana lima uuku, alaila he pii loa ke kumu kuai.
                O ke daimana ka oi o ka paakiki o na mea a pau, he hiki ia ke oki i ka hao a i ke kila, a he moku no iaia ke aniani.
                He mau tausani dala, a he mau haneri tausani dala ke kumukuai o na daimana nunui, a lilo i na'lii, a kauia maluna o ka lei ali.
                Ma ka Mokupuni o Kilone kahi e loaa nui ai o na daimana. Ma ke kii maluna ae nei, ua hoikeia ke ano o ka luu ana i ka pipi ma ke kai hohonu, e imi ana i na daimana.
                Holo na waa ma kahi o ka pipi a ku malaila. Ua hoomakaukauia na laau i kau kea ia ma ka aoao o ka waa. Ekolu pohaku i hoolewalewaia ma kekahi aoao, a elua paha ma kekahi aoao. Aia a makaukau ke kanaka e luu, lele aku oia iloko o ke kai, a hoopaa kona lima i ke kaula, a hookomo i kona wawae i kekahi wahi lou e hoopaa iho ai i kona wawae i ka pohaku. Alaila hookomo iho oia i kekahi wawae iloko o ka hinai. A makaukau ke kanaka luu, alaila, hookuukuu koke ia aku me na kaula elua, a na ke kaumaha o ka pohaku e huki koke aku i ke kanaka a hiki ilalo. Ohi koke oia i ka pipi i loaa iaia e waiho ana malalo, a hoopiha iho i ka hinai. Hookahi paha minute me ka hapalua ka loihi o ka noho ana o keia kanaka maloko o ke kai, alaila huki oia i ke kaula, a ike na kanaka o luna, huki lakou i ke kanaka a me ka hinai iluna.
                Aole pela ka luu ana o na kanaka Hawaii a makou i ike ai. He luu maoli ka lakou, malalo ke poo maluna na wawae, pela e luu ai, i hiki aku ilalo. I ka olelo a kekahi poe i akamai ma ia hana, ua hiki no ia lakou ke luu i na anana he kanakolu. Ua like kekahi poe kanaka me ka i-a iloko o ka wai.
                I ka loaa ana ia poe o ka pipi, lawe ia iuka, a waihoia he mau la, a palahe ka i-o, alaila wawahi ia ka iwi. Ina e loaa ke daimana maloko o kekahi mau i-a, he pomaikai loa ia, a i loaa ole, o ke pono wale no ia o ka luhi ana.
                He mea makemake loa ia na momi a me na daimana nui e na'lii. Ua hai ia mai, he kula pepeiao i hoonoia me na daimana ke Kaleopatara kekahi alii wahine o Aigupita nona ke kumukuai he $800,000.
                Ke hoomanao ae la makou i ko Iesu hoohalike ana i ke aupuni o ka lani me kekahi kanaka kalepa e imi ana i na momi maikai.
                "A ike aku ia i kekahi momi maikai loa, hele aku no ia a kuai lilo aku i kana mau mea a pau, a kuai lilo mai ia momi nona."
                O ke ola uhane i loaa mai ia kakou mai ia Kristo, oia ua momi nei i oi loa aku kona kumukuai i ko na mea e ae a pau loa.

HE WAHI KAAO E PILI ANA I KA LIONA.

                Ike kekahi kanaka, o Hakenekoka kona inoa, (he negero ma Aferika Hema.) i ka liona e hahai mai ana iaia ma kahi waoakua. He wahi laau wale no ma kona lima e pale aku ai iaia ke holo mai, a i ole e hana me ka maalea, e make ana no ia. A hiki aku oia i kahi pali, iho iki oia ilalo he mau kapuai ma kekahi pohaku e oioi ana ma ke kae o ka pali. Hoopaa oia i kona kuka me ka papale ma kona kookoo, a hapai maluna o kona poo. Ku mai ka liona ma kahi mamao iki aku e kiai ana a napoo ka la, alaila kolo malie mai oia me he popoki la a lele mama i loaa kahi negero iaia, no kona manao kuhihewa o kahi papale oia no ka negero. Ma ia lele ana ua haule oia ilalo o ka pali, a ua make loa, ma ke ku ana i na pohaku malalo o kahi e noho ana ka negero me ka makau loa. Pakele kona ola ma kana hana akamai. He ikaika loa ka liona, aka he noonoo ko ke kanaka, oia ka mea e oi ai ke kanaka mamua o na mea ola hanu e ae a pau a ke Akua i hana ai.
                Pehea; e nai keiki e lilo anei keia naauao o kakou i mea e noonoo ai a hooki ai i ka hewa a e imi ai paha i ka pomaikai o hai, a ina ia hana e hoonani aku ai i ka mea nana i haawi mai i keia waiwai nui? F. M.

                He kauwa hoolohe ke ahi ke hoomalu pono aku oe iaia, aka he haku hooluhi a hana ino loa mai ia ia oe ke lanakila ae oia maluna ou.

                O ke ao hewa ana iaia iho, oia no ka hoomaa ana iho i ke keiki e hele ma ke alanui o ka make.