Ke Alaula, Volume IV, Number 1, 1 April 1869 — Page 4

4 KE ALAULA.

KA PUNAWAI OLINO.
Leo: THE SPARKLING RILL.--Golden Censer.

1. Pu-ai mai-kai ma ke ao ana 'e Ko ka pu-na-wai o-li-no, Me ka hau ai-ai mai ka mau-na mai, Me ia no ka hi-nu-hi-nu. E i-nu ae mai ka pu-na-wai, A wai-ho i ka wai-na, E o-li-no no ma ka la-ma po, A ao e nau i-nai-na.
2. Kahe maikai o na kahawai
Mai na puu a na awawa,
A hulali mai ko lakou mau wai
Me na pahi oakaaka.
HUI.--E inu ae mai ka punawai, &c.
3. Mai hoopa e i ka waina nei,
Ma ka wai maemae ke inu,
He makana nei no ka lani mai,
Pau ka makewai ke inu.
HUI.--E inu ae mai ka punawai, &c.
4. Punawai laelae, no ka Haku mai,
I ka Haku ka hoonani,
A e pii i o inu mau kakou
I ka wai mau o ka lani.
HUI.--E inu ae mai ka punawai, &c.

KULA POKII.
SABATI I.
KO PETERO HAHAUIA ANA I KA HALE PAAHAO.--OIHANA II: XXI: 1-23

1. Heaha ka hana a Iesu i hooili ai i kana mau haumana i kona hoi ana ku i ka lani?
E hai aku i ke kala ana o na hala i kanaka hewa, ke paulele lakou iaia.
2. Pehea ka olelo a na haumana?
Ua pepehi oukou i ke Keiki a ke Akua, aka ua ala hou mai oia a ua hoi aku i ka lani, e kala mai no nae oia ia oukou.
3. Pehea kekahi poe hewa?
Mihi no kekahi o lakou, a noi aku i ke Akua e kala mai.
4. Pela anei lakou a pau?
Aole; huhu loa kekahi poe, a imi e pepehi i na haumana.
5. Heaha ka hana o kekahi alii?
Oki aku oia i ke poo o Iakobo, ke kaikuaana o Ioane, a hoopaahao aku ia Petero.
6. Pehea ka lakou hana ia Petero?
Hoopaa lakou i kona mau lima a me na wawae i ka hao.
7. Heaha ka hana a ua hoa'loha o Petero ia po?
Akoakoa lakou e pule aku i ka Haku e hoopakele iaia.

SABATI II.
HOOPAAHAOIA O PETERO.--OIHANA XII: 1-23.

1. Heaha ka manao o Herode, ke alii, i hoopaahao ia Petero?
Manao oia ia ia iho e lawe mai ia Petero iwaho a pepehi iaia.
2. Manao anei ke Akua e ae aku i keia alii ino e hooko i kona makemake?
Aole; hoouna ke Akua i kona anela ia po e hoopakele ia Petero.
3. Pehea o Petero?
E hiamoe ana oia iwaena o na koa, me ka paa i ka hao.
4. Heaha ka ka anela i hana ai?
Paipai mai ka anela ia Petero a hoala mai iaia, a haule aku kona mau kaulahao.
5. Ike anei o Petero i ka anela?
Ae; malamalama ae o loko o ka hale-paahao, no ka olinolino paha o ka anela.
6. Pehea aku ka anela ia Petero?
E aahu oe i kou kapu, a e hahai mai ia'u.
7. Hahai aku o Petero i ka anela a hiki aku i ka ipuka hao nui o ka hale-paahao; pehea ia ipuka i kiia?
Wehe wale aku ia ipuka nui imua o laua me ka hoopaa ole aku o kekahi.

SABATI III.
PUKA AKU O PETERO.

1. Pehea ka manao o Petero i keia anela ana i ike ai?
Manao oia he moeuhane keia ana e ike nei.
2. Hele laua a hiki aku i hea?
Hele laua a hiki i kekahi alanui, a haalele mai ka anela ia Petero.
3. Pehea o Petero i kona ike ana ua haalele mai ka anela iaia i ke aumoe o ka po ma ke alanui o ke kulanakauhale?
Kahaha nui ia i ko ke Akua hoopakele ana iaia mai ka lima o ke alii pepehi kanaka.
4. Hele aku o Petero i hea?
I ka hale o kekahi wahine haipule.
5. Ua hiamoe anei na kanaka o ia hale?
Aole; e ala ana lakou, e pule nui ana i ke Akua e hoopakeleia o Petero.
6. Kikeke aku o Petero, wehe koke mai anei lakou iaia?
Aole; hele kekahi kaikamahine e wehe i ka ipuka, a kali aku oia a lohe i ko Petero leo, holo koke kela e hai me ka wehe ole aku i ka ipuka.
7. Pehea ke kaikamahine i ka lohe ana i ko Petero leo?
Aole oia i wehe i ka ipuka, aka, holo oia i na hoa o ka hale a hai aku, eia o Petero mawaho ae nei.

SABATI IV.
KO PETERO HELE ANA, A MAKE O HERODE.

1. Holo lakou a wehe aku i ka ipuka a ninau aku ia Petero pehea?
Ninau lakou, "Pehea ia oe i hemo mai nei?"
2. Pehea hou aku o Petero?
Olelo kela, e hele a hai aku i ko'u mau hoa'loha i kuu hemo ana.
3. Alaila aha?
Hele kela e pee.
4. Pehea ma ka hale paahao i ke ao ana ae?
Imi nui ia o Petero, aole nae i loaa.
5. A lohe o Herode i ka hemo ana o Petero, pehea oia?
Piha loa oia i ka huhu, a kauoha ae e pepehiia na koa kiai a pau o ka hale-paahao.
6. Pehea kela alii?
He alii puni koko, he alii ino loa: huhu kela i ke Akua a i kona poe kanaka.
7. Heaha la ka hopena o ia alii?
Hahau mai kekahi anela iaia, a aiia oia e na ilo a make ia.

AOLE KOE IKI.

                Ma kekahi halawai pule, he nui na mea opiopio a me na mea elemakule i ala mai a hai aku' i ka nui o ko ke Akua lokomaikai mai ia lakou, a i ko lakou hoohiki ana e hahai ia Iesu. Iwaena o lakou kekahi kaikamahine, ehiku paha ona mau makahiki, i ala mai me na maka i alohilohi i ke aloha ia Iesu, a kahea mai la me kona wahi leo. "Ua pau loa kuu naau ia Iesu, aole koe iki."
                Aole anei he wahi manao maikai kela? Auhea la ke kanaka, a o ka wahine paha, e hiki ke olelo, "Ua pau loa kuu naau ia Iesu, aole koe iki?" Aole anei oia ka Iesu makemake? "E kuu keiki, e haawi mai i kou naau;" oia no ka ke Akua kauoha. E pau anei kona makemake, ina ua haawi hapa ia ka naau, a koe kekahi hapa? Aole loa; he pono ke haawi pau loa ia, "aole koe iki." L. L. N.

HE MEA HOOLANA I KA MANAO O NA KEIKI MAKUA OLE.

                Kapa ke Akua iaia iho, "O ka Makua no ka poe makua ole, o ka Lunakanawai no na wahine kanemake." I mai hoi o Davida, "Aia haalele ko'u makuakane a me ko'u makuahine ia'u, alaila e ohi mai o Iehova ia'u."--Hal. 91:4; Hal. 27:10.

                I ka wa i pauhia loa kakou i ka hiamoe, hoi aku ka uhane i kona home e imi i ka ikaika e hiki ai iaia ke hakoko me na pilikia o keia ola ana.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.