Ke Alaula, Volume IV, Number 1, 1 April 1869 — Page 2

2 KE ALAULA.

mau makua Keristiano kona, i hooikaika e alakai iaia iloko o ke ala pololei o ke ola. I kekahi kakahiaka ala mai o ua o Kimo la, a i kona hoopaanaau ana i kekahi pauku mai loko mai o ke Kauoha Hou, e like me kona maa mau, loaa iaia keia pauku. "Aole oukou i pule aku me ka hookaheia mai o ke koko i ko oukou paio ana aku i ka hewa."--Heb. 12:4. Ninau mai la kona aka no kona hoolalelale e kii i na pipi waiu, aole ona hiki ke kamailio me ia. Aole no i maopopo lea iaia ke ano o ua pauku la; aka e maopopo iki ana paha mahope.
                I kona hele ana e kii i na pipi, noonoo iho la ia, ua makemake no e lilo i haumana na ka Haku, aka mahope paha. Aole i pau kona makemake i ka lealea. Kiola aku ia i kona Kauoha Hou me ka uluhua i kr ao ana mai o ka ke Akua olelo. Komo mai nae ka manao hoahewa iaia iho. Heluhelu hou aku ia, "E hoomanao hoi oukou i ka mea i hoomanawanui i ke kue ana mai o ka poe i hana hewa iaia, o nawaliwali ko oukou manao a maule hoi oukou. Aole oukou i pale aku me ka hookaheia mai o ke koko i ko oukou paio ana aku i ka hewa." I ka pau ana o kona heluhelu ana, ua hoehaia kona naau, a olelo iho la, "Auwe! auwe! ua nawaliwali no au, ua maule no hoi! Me he mea la he paakiki loa ka hana pololei ana. Aole no e hiki ia'u ke lilo i keiki pono maoli." Moe iho la ia ma ka weuweu me ka uwe waimaka no kana mau hewa.
                Nana hou iho la ia i ke Kauoha Hou, "Me ka hookaheia mai o ke koko—heaha la ke ano o ia?" Pela kona noonoo ana. "Ke manao nei au oia ka hooikaika ana me ka ikaika loa, e like me ke kulakulai ana o na keike i kekahi wa; a puka ke koko ma ka ihu, a pepe paha i ko lakou hakoko ana."
                Ala mai la o ua o Kimo la, a hele aku la, me ka noonoo nae, "Aole no au i hana pela, aole no au i hooikaika me ka ikaika loa e pale i ka hewa."
                Kahea mai la kekahi leo, " Pehea oe, e Kimo e? E hele ana ka oe e kii i na pipi. E kau mai maluna o ke kaa."
                Pau ko Kimo noonoo ana, a kau ihola ma ke kaa, olioli iho la ia i ka holo maikai ana o ka lio.
                I mai la o Mr. Bolo, ka mea nona ke kaa, " I ka aha hookolokolo au; aole anei oe makemake i na dala elima?"
                "Ae," wahi a Kimo, "makemake loa no au."
                "Ina pela," wahi a Mr. Bolo, "ke hoomanao nei paha oe i ka la eha o Iulai i hala iho nei?"
                "Ae," wahi a Kimo, me ke kahaha nae.
                "Mahea oe ia ahiahi?" wahi a Mr. Bolo.
                "Aia no au ma ka puu Poina ia ahiahi, e nana ana i na ahi kao-lele," wahi a Kimo.
                "A heaha kou mea i ike ai malaila?"
                "Ka, ike iho la au i ke ahi kao-lele no paha," wahi a Kimo.
                "Ae, ae; a heaha hoi kekahi mea e ae au i ike ai?"
                "Ke ninau nei anei oe no ka ua naulu?" wahi a Kimo. "He ua nui ia ahiahi."
                "Aole no ia mea," wahi a Mr. Bolo, me ke ano uluhua i ke koho pono ole o Kimo; a ninau hou aku la, "E hoomanao, aole anei oe i ike i kekahi kanaka e mea ana e ki pu mai ia'u me ka pu panapana?"
                "Aole loa," wahi a Kimo me na maka kahaha loa.
                "A ua poina ka ia oe," wahi a Mr. Bolo. "E haawi aku au ia oe elima dala ano, a elima dala i kou wa e hoike ai mamuli o kela ano imua o ka aha hookolokolo."
                "Ua maopopo iho la ia Kimo ua makemake o Mr. Bolo iaia i hoike nona ma ka aha hookolokolo; a ua nui kona makemake i ke dala. "Ina hoi i hiki ia'u ke hoomanao ia mea," wahi a Kimo i nalu ai iloko ona iho, "e loaa ana ia'u he umi dala. Ka, pomaikai loa au ina ia mau dala he umi. Aole nae au i ike, ua poeleele loa. Ua ike au he mau kanaka, a oia wale no."
                " E hoomanao," wahi a Mr. Bolo, "a e loaa ia oe elima dala ano."
                "Aole hiki ia'u ke hoomanao," wahi a Kimo.
                "Ka, heaha la ia ia oe? He hiki no ia oe ke hoomanao? A hoike aku la oia i kana eke dala.
                He mea hoowalewale loa ino ia. "Ina hoi e hiki ia'u ke hoomanao," wahi a Kimo; "ina hoi he pono ke hoopunipuni aku,—he umi dala! Nui na mea e loaa mai ana ma ia mau dala he umi; aka, he olelo hoopunipuni no ia; aole hiki ia'u; aole pono ia'u; he pono ia'u ke pale aku i ka hoowalewaleia mai." Hoomanao koke iho la i kona pauku, "Pale aku me ka hookaheia mai o ke koko." "Ae, oia no," wahi ana; "ua like me ka unuhiia ana o ka niho; aka oia no ka'u e hana ai."
                Eleu loa iho la o ua o Kimo la, a lele aku la mai ke kaa aku, a haule ma ka lepo.
                Kuhi o Mr. Holo ua haule ia a eha, ninau iho la, "Ua eha oe?"
                "Aole," wahi a Kimo, "aka ua paa kuu manao; aole hiki ia'u ke hoopunipuni aku, i loaa mai ia'u ke dala." A lele aku la ia a haule ma kela aoao o ka pa e pili ana i ke alanui.
                "Aka, e Kimo e," wahi a Mr. Bolo—
                Ua holo loa aku la nae o Kimo, aole i lohe iaia, a ua hele aku o Mr. Bolo me ka hoohokaia mai.
                "Pomaikai loa au i kuu pale ana i ka hoowalewaleia mai; aole no i hiki ia'u ke hoopunipuni. Mai pilikia loa au."
                Ua pau kona luuluu o me ka nawaliwali; ua lanakila maluna o ka hewa. He mea e kona olioli i kona hoi ana me na pipi.
                Pela, e na makamaka, he pomaikai maoli no iloko o ka lanakila ana maluna o na hewa, na kuko iho o ko kakou mau naau.
                E hoomanao kakou i ka olelo a ka Haku, "Aka o ka mea hoomau aku a hiki i ka hopena, e ola ia."--Mat. 10:22. A i keia olelo hoi, "O ka mea lanakila, e hoaahuia oia i ke aahu keokeo; aole hoi au e holoi aku i kona inoa ma ka buke o ke ola, aka, e hooiaio aku no au i kona inoa imua o ko'u Makua, a imua o kona poe anela."—Hoikeana 3:5. L. L. N.

E MALAMA I KA MANAWA.

                Ina he wahi apana kanana uuku ka kakou e kakau iho ai, a he nui na manao, alaila, e kakau makalii ana kakou i na hua-olelo. Pela e ao kakou e malama i na minute i koe o ko kakou ola kino ana. E hana oiai ka la, o hiki auanei ka po--aohe kanaka e hiki ke hana ilaila.

                O ke aupuni maikai loa, oia no ke aupuni e ao ana i na kahaka e hoomalu ia lakou iho.— Goethe.

PAA I KA UA.

                Hookuu aku ko Keke makuahine iaia e hele e ike i kekahi wahine hoa'loha ona, o Kalona wahine kona inoa, he wahine keiki ole i aloha loa mai iaia. He maikai loa na ao i ko Keke wa i hele aku ai, aka emoole, ala mai na ao ino, a i ka auina la hoomaka mai ka ua.
                Olelo mai o Kalona wahine, "E moe oe maanei i keia po; aole makemake kou makuahine e hoi aku oe iloko o keia ua nui." Noonoo iho ua wahi keiki aloha makua la, "Pehea la e hiki ia'u ke moe maanei me ke kaawale mai ko'u makuahine mai?" Hele iki aku o Kalona ma kekahi keena, a nana aku o Keke ma ka puka aniani, e ake ana e ike i ka malie ana iho o ka ua, aole nae i mao iho. Kulu iho kona waimaka i ke aloha i kona makuahine. "Ina la e kii mai kuu makuakane a hoihoi aku ia'u." Alaila kahea nui oia, "E papa e! e papa e!" Aka, aole i lohe mai kona papa iaia, aia no ia ma kahi loihi aku.
                Alaila hoomanao ae kahi kaikamahine i ke Akua. I iho la kela, "E ike ana ke Akua ma na wahi a pau; ke ike mai nei no ia ia'u, a ua ike mai kela i ka ua." Pule aku kela i ke Akua e paipai aku i kona makuahine e hoouna mai i kekahi mea e kii mai iaia. Noonoo hou ae kela, "He hiki no i ke Akua ke malama mai ia'u maanei." A piha hou no kona mau maka i na kulu waimaka, a holoi hou aku no kela me kona mau lima palupalu.
                E hooikaika nui ana kela e ae aku i ka ka Haku makemake, a ia manawa kikeke mai o Mahoe ma ka ipuka; ua hoounaia mai me ka loulu nui e hoihoi aku i ua Keke nei.
                Olioli nui o Keke. Pane mai o Mahoe, "Ua hoouna mai nei kou makuahine ia'u e hoihoi aku ia oe."
                Pane aku o Keke, "Na ke Akua i hoouna mai ia oe."
                Olelo o Mahoe, "Ina na ke Akua i hoouna mai, ma ka waha mai no nae o kou makuahine ka loaa ana ia'u kana kauoha."