Ke Alaula, Volume IV, Number 1, 1 April 1869 — Page 1

KE ALAULA.

BUKE I V. HONOLULU, APERILA, 1869. HELU 1.

WELA KE KULANAKAUHALE I KE AHI.

                Paea! Paea! Paea! Aia la ke puka nei na lapalapa ahi ma na ipuka aniani o keia hale nui mawaenakonu o ke kulanakauhale. Ua hiki mua mai na enegini kinaiahi, a ke pauma nei na lala o ka oihana kinaiahi i ka wai, a ke hookupono nei lakou i ke kiki ana o ka wai ma na ohe wai i na puka aniani ma kahi o ke ahi. Eono ohe wai ma ke alanui e hoolele nei ka wai iluna, a ua hoopii lakou i kekahi ohe wai maluna o ka hale ma kahi o na kanaka eha e kau nei maluna, a ke lele nei ko lakou wai maluna o ke ahi. He ikaika nae ke ahi; aole paha e pio wawe i keia mau ohe wai.
                He aumoe paha keia o ka po i puai mai keia ahi i wela ai ka hale. Ke ninauia ae la, ua pau anei na kanaka o keia hale i ka puka iwaho? Ke heaia mai la, "He keiki! he keiki! aia iloko o ka hale. Na wai e kii aku iaia!" Hapaiia ke alapii i ka ipuka aniani, a pii koke aku kekahi kanaka kinaiahi, a holo aku iloko o ke keena i piha loa i ka wela o ke ahi a me ka uahi. Loaa aku iaia kahi keiki uuku e hiamoe ana ma kahi moe; lalau aku kela a holo koke i ka puka aniani, oi loaa ole mai ke ahi iaia, oi haule ole hoi na oa o ka hale maluna ona.
                Nana aku na kanaka i ka puka i ka hoi koke mai. Aia la ke hoea mai la ma ka puka aniani e paa ana kahi keiki ma kona lima, a iho mai ma ke alapii. Huro na kanaka me ka olioli i ka ike ana iaia e paa ana i ke keiki.
                Lelele ka hauoli o ka makuahine i ka ike ana'ku i kana keiki aloha, i pakele mai ka make weliweli i ke ahi. Aia ka makuahine e ku nei malalo o ke alapii, e hapai ana i kona mau lima iluna, a ake ana e puliki aku i kana keiki. E nana pono iho oukou a ike aku iaia e ku ana iwaena o kanaka e pili ana i ke alapii.
                Kamahao, ka hana a keia kanaka kinaiahi i kona minamina ole i kona ola iho, a komo i kahi o ka make, e hoopakele i ke ola o keia w,ahi keiki malihini. E hoomanao mau oia i keia hana ona me ka olioli, a e mahalo loa ia oia e kona mau hoa a pau.
                Nani ke aloha o ke Akua i ka honpakele ana i ke ola o keia wahi keiki. Nani hoi ko ke Akua malama aloha ana mai ia oukou a pau, e na keiki, i hoopakele oia ia oukou i ka make i ke ahi, a i ka makani, a i ka wai, a hoohiamoeia oukou me ka maluhia i kela po keia po.

NO KE PALE ANA AKU I KA HOOWALEWALEIA MAI.

                E na hoa heluhelu i ke ALAULA, he wahi manao ko'u ia kakou. He nui no paha na mea i makemake i ke ola ma o Iesu la, aole nae he ikaika e pale aku i na mea hoowalewale, na kuko o ke kino, na mea lealea o ke ao nei, a me ka hoowalewale maoli ana mai o na hoa-hele hoomaloka.
                He oiaio no aole o kakou ikaika iloko o kakou iho, no ka mea he mana ke Diabolo maluna o kakou, oiai e ae ana kakou i kona alakai ana ia kakou. He mana nae ko Iesu maluna o ka Diabolo; a ina e hilinai aku kakou iaia me ka hooikaika pu e pale aku i na mea hoowalewale a pau loa, e kokua mai no ia.
                Ina hiki mai ka mea hoowalewale, mai kali iki kakou i ke kahea aku i ka Haku e kokua mai, a nana no e kokua mai e like me ka hoike ana mai o kekahi moolelo no kekahi keiki a'u i heluhelu ai.
                Ua ao pono ia o Kimo i kona wa opiopio, he